أسرار الزمان

الجزء 02

وكت جات التاية بت مختار .. وحكت لي ودار الزين .. قعد يضحك .. قال ليها .. والله يا النور حكايتك حكاية .. ماقال راجل وفارس .. زول ماقدر على البشير.. تاني داير يقدر على شنو؟ ..
النسيم قاعدة في الضل بتضفر ليها في سعف لي هبابة ..وراخية اضانا للكلام ..
والكلام ده زي الضحى كدي .. في زول دق الباب .. مشى ود دار الزين فتح الباب لقاهو ده واحد اسمو ود مكتول ..
من الحلة الجنبهم .. راجل كبير طاعن في السن قريب السبعين سنة .. يعني لو ماوصلا قرب ليها ..
سلم على ود دار الزين.. ود دار الزين يعجبك في الترحاب والكرم .. حبابو .. حبابو .. الله يكرمك بارك الله فيك .. شرفت وانست ياحاج والله الليلة دي شقة غريبة ..
طبعا اول حاجة خطرت على بال ود دارالزين .. انو ود مكتول .. داير النسيم لي واحد من اولادو .. لانو هو اكبر من وددار الزين بي عشرة سنة ولاشي ..
جرا ليهو العنقريب الهبابي .. وجدع ليهو فوقو بردعة (مخدة محشية صوف غنم) وقال ليهو كوع داب ماجات القهوة .. قال ليهو والله انا شارب القهوة وجاي عليك ..
انا جاييك في موضوع خصوصي كدي .. قالو لي عندك بت بقت للعرس.. وانا والله زي ماك عارف خالتك نفيسة .. خلاص بقت كُسّار؟ ..
دحين انا جيت اشوف البت .. وبتشرف حرم بي نسبك .. وشايل هدومي تب معاي .. كان البت عجبتني .. طوالي من دربي ده ماشي على البشير في بيتو .. ام بقى داير المسوح والدلكة .. بمسحو وبدلكو ..
اصلك ماتشيل هم البشير ده ,, بقدر عليهو تب وحات الله .. وان بقى ماجبت ليك منو الحجل ..انا اكون ود حرام ..
تاني داير شنو؟
ود دار الزين كان واقف على حيلو.. قعد في الواطة .. وعرف انو الراجل ده بنجح بنجح .. لانو زول مكار وثعلب في شكل انسان .. قال ليهو ده كلام شنو يا ود مكتول ؟ لكن النسيم بتي صغيرة . قال ليهو نان مالو؟ .. الشياب العرسو البنوت الصغار شويه؟
بس بقت علي انا؟ ..؟ وان بقيت نطيت من كلامك اخوي .. كمان قول لي ..خلني النمشي..
طبعا" ود دار الزين دخل في حتة ضيقة بالجد .. يعني لو قال ليهو كدي ولاكدي .. الزول ده يمشي ينشر الخبر بالبلد والبلدين .. ويشوه صورة الراجل العمدة ده .. قال ليهو خلاص .. انا ماعندي مانع .. بس انت امشي للبشير بكرة مو الليلة ..
قال ليهو ياخي انا مستعجل على العرس .. ماتخسرني يوم كامل ..
لكن خلاص يازول انا باكر.. من الصباح ماشي على البشير ..
اها هسع داير اشوف البت .. قال ليهو لالا شوفت البت بعد الحجل ..
المهم الراجل اقتنع وطلع .. اول الراجل من طلع النسيم جات لابوها .. قالت ليهو يابا ده شنو؟؟ الراجل المضبلن والكلام البقول فيهو؟؟ .. وحات الله ياابوي انا الزول ده باكر يموت لي يابا .. يابا ماتكتلني قبال يومي ..
قال ليها النسيم اصبري.. انا ذاتي ما ني رضيان بيه .. بس انتي شيلي الصبر .. النسيم بقت عايشة في قلق ..لانها سمعت كلام ود مكتول من اولو لي اخرو .. وعرفت ثقتو في نفسو ..
ابوها ..قال ليها اصبري بس .. وشوفي عمك البشير بطفشو كيف ؟
لكن ماااا اظنو والله الراجل ده معروف يسوقك البحر ويجيبك عطشان ..
المهم يازول ود دار الزين .. مشى لي عمو البشير.. وقعد معاهو نص يوم كامل يحذر فيهو .. ويوصي فيه ..قال ليهو الزول ده ياعمي زول مكار ..انا دايرو لاعند الفلي .. يسوي ليك .. الفلي (قصع القمل) ..
قال ليهو اصبر لي .. والله الكلب اخليهو يحلق لي اباطاتي .. هههه
غايتو جنس حالة !!
المهم نشوف ان شاء الله ربنا يستر على النسيم من الراجل العجوز المخادع الاسمو ودمكتول ده ..
الزول ده قالو من الصباح جا جاهز . وقال ليهو اسمع يا البشير عشان مانبقى ناس كلام فاضي .. انا لو خدمتك 15 يوم وما شكيت ولا مليت .. بتورني محل الحجل؟
قال ليهو يازول مابتقدر .. انت فشار ساكت .. قال ليهو بس قول لي .. قال ليهو اي بوريك ليهو .. بس انت تم الخمسطاشر يوم ..
والله الزول ده قالو البشير سوا ليهو سوا .. ماخلا حاجة في الدنيا دي بتنخدم ماخدمو ليها .. طحن العش وعجن العجين وسوا العصيدة وعاس الكسرة وفرك الملاح وخش الروب .. ود مكتول يخدم ويغني طربااان .. ومبسوط ومتكيف .. وقال ليهو يا حاج البشير.. ياهن الخمسطاشر يوم ديل ولا بلاهن .. على بالطلاق كان داير لك سنة اقعد معاك .. ات ماك يااكا ؟ انا وكت لقيت لي بنية عمرها 18 سنة وناسبت ود دار الزين بتعلبني الخمستاشر يوم؟؟
على كل حال البلد كلها متابعة الوضع بي توجس شديد .. والناس مطلعين ود دار الزين غلطان .. كيف يخت بتو في محك زي ده .. ود دار الزين خايف من ود مكتول يقضي ال15 يوم وتاني هو مايبقى عندو كلمة والنشوف البحصل ..
يوم السبت مشى ود دار الزين لي سنار المدينة وعندو صاحبو من ناس المجلس اسمو (بامبي) ..ود دار الزين حكا ليهو الهم العليهو .. بامبي قال ليهو يازول ماتشيل هم انت مرقتني من ورطات كتيرة انا بحاول امرقك منها .. ان شاء الله اقدر ..
اها طبعا قبل فترة يمكن قبال شهرين .. كان في مشكلة حاصلة في القصر الملكي في مدينة سنار .. والمشكلة كانت كارثة هزت القصر الملكي وهزت كل اركان ممكة الفونج .. المشكلة بدايتها كالاتي ..
الملك كان في مشكلة بينو وبين الملكة .. ام الامراء .. وحلف الا يتزوج فيها .. اتزوج ليهو بت صغيرة وجميلة.. من منطقة على بحر ابيض ..
والملكه الام حقدت حقد شديد خلاص .. وحلفت الا تكتل الملكة الجديدة .. الملكة الام عندها اربعة اولاد .. صبيان بالغين شباب يعني ..وجايين ورا بعض كل واحد فرقو من التاني سنتين ..
وكانو مغرمين بالصيد زي ابوهم .. اها يوم الاتنين الصغار ومعاهم الاخو الكبير ..طلعو الصيد .. وخلو واحد اللهو نمرة اتنين .. خلوه في القصر ..
وطلعو الصيد اتاخرو لغاية الليل .. وامهم في نفس اليوم ده ناوية تسمم الملكة الجديدة .. والملكة الجديدة كانت بتتزين في الجناح الخاص بتاعها وما اتعشت .. والعشاء بتاعها رز ..موجود في المطبخ الملكي .. والقائم على الطباخة شاب اسمو ابو خوسه .. ابو خوسة اصلا كان جندي من المحبين للملك .. والملك عملو رئيس الطباخين مخصوص لانو زول امين وبخاف ربنا ..
اها الملكة خلت ابو خوسة الطباخ نام .. وجات دخلت المطبخ وكبت السم الابيض في الرز بتاع عشا الملكة الجديدة ..
وابوخوسة صحى بي بالحركة وشاف الملكة دخلت المطبخ وطلعت .. واستغرب شديد ..
لان الملكة مابتدخل المطبخ نهائي ..
لكن ماخت في راسو اي احتمال انو ممكن الملكة تكون كبت السم في العشاء ..
اها يازول ربنا حفظ الملكة الجديدة .. ونامت بدون عشاء .
لانها كانت منتظرة الملك.. والملك اتاخر مع قادة الجيش ..كانت في مشكلة بتخص الجيش ..كويس؟؟..
اها كانت الملكة الجديدة منتظراهو تقضي ليهو احتياجاتو الخاصة حتن بعدين تتعشى .. بس ربنا حفظها ونامت .. قبل مايجي الملك ..والملك جا متأخر.. لقاها نايمة في السرير بالعرض .. صلحها وعدل ليها رقدتها .. غطاها ونام ..
في اخر الليل جو الامراء التلاتة من الصيد .. وكانو متأخرين ..
واحد فيهم قال ليهم.. نحن الليلة شبعنا لحم صيد .. ندخل المطبخ ده نشوف كان القا لي شي حلو ..
هنا اب خوسة سمع الكلام ..وقال ليهو ايوة يامولاي الامير في العشا حق الملكة الصغيرة .. وماجاتو .. الظاهر نامت .. اجيبو ليكم؟؟
قال ليهو جيبو .. جابو ليهم .. وهو ماعارف الاكل مسموم .. اها اكلو التلاتة ..في الرز المسمماهو امهم لامن شبعو .. وماتو التلاتة قبل الفجر ..
الصباح جو لقوهم ميتين التلاتة .. نادو الطبيب الملكي قال الناس ديل ماتو متسممين .. طبعا" مافي زول عارف انهم اكلو الرز ...
الا الطباخ اب خوسه .. والطباخ طبعا" مسؤول من اي اكل يتعمل في المطبخ الملكي .. يعني ممكن ينكر عادي .. ويقول يعميني ..
اها لمن نادوهو .. وسألوهو .. في التحقيقات الاولية ..
سأله القاضي الملكي .. الامراء ديل لمن جو من الصيد اكلو حاجة ولا نامو طوالي ؟؟
قال لا جو قالو دايرين لهم حلو..
وانا دخلت المطبخ جبت ليهم العشا الكان مفروض تاكلو الملكة الصغيرة .. كان رز باللبن والسمن .. والملكة الصغيرة ما طلبتو الظاهر نامت بلاعشا ..
قال ليهو الرز السواهو منو؟؟ ..
قال ليهو سويتو انا .. قال ليهو يعني انت كبيت السم لي الملكة الصغيرة ؟؟..
اب خوسة قال ليهو ابدا ما كبيتو .. وماعندي مصلحة انو مولاتي تموت ..
اب خوسة في اللحظة كان داير يحكي قصة الملكة الكبيرة الجات بالليل ..ودخلت المطبخ ومرقت .. وهو متاكد انو الملك ح يصدقو ..
لكن اب خوسة سكت وبقى يتكلم مع نفسو .. قال يااب خوسة .. المراة فقدت تلاتة اولاد في ليلة واحدة .. وهي الكتلتهم .. انا تاني ارمي فوقها تهمة بعد الحزن والمصيبة العايشة فيها هسع دي؟ ..
رفع راسو وقال للقاضي انا بستحمل مسؤولة الاكل .. لكن والله ما كبيت فيهو سم .. وماعايز اتهم لي زول انا ماشفتو .. وربنا يعلم ماشفت بي عيني زول كب سم في الاكل ..
وانا مستعد لاي عقاب ينزل علي .. لانها دي مسؤوليتي انا ..
قام الملك عاين لي اب خوسة كدا في عيونو.. وقال ليهو يا اب خوسة انت كذاب .. انت صاح ما سممت الاكل.. لكن عارف السمم الاكل منو وداير تسترو ..
لكن يا اب خوسة بي سترك لي الزول ده .. باكر بكرر السم للمكلة الصغيرة ..
اب خوسة قال ليهو حاشا وكلا يامولاي.. الملكة الصغيرة ربنا زي ما حفظها الليلة .. بحفظها من ايدي الخونة لي قدام ..
قالو في اللحظات دي الملكة الكبيرة بي غادي تبكي على اولادي وتكب في الرماد فوق راسها ..وبقت زي المجنونة .. وتتكلم برة من راسها .. وقالت السم كبيتو انا ..وانا الكتلت وليداتي ..
والملك قال اصلا ماتتعاقب .. عفاها .. بس نفاها لي منطقة في جنوب كسلا ..قعدت في قصر ريفي هناك ..
واب خوسة الملك طردو من الشغل .. وجردو من املاكو .. ومنعو من حقوقو .. لكن ماعاقبو .. لانو عارفو صادق ..وعارفو عمل كدا ليه.. عشان قلبو حاني على المراة الفقدت اولادها التلاتة .. اب خوسة طوالي اتلملم من القصر ومشى قريتو .. واشتغل حطاب .. عايل امو وابوهو واختو الصغيرة كانت بترعى في بهايم شوية كدا ..
واب خوسة بقى يمشي يقطع الحطب ويجي يبعو للناس فوق حمارتو .. والعز الزمان داك .. والقروش ديك كلها راحت ..
اها اب خوسة ده.. صديق مقرب لي بامبي بتاع المجلس صاحب ود دار الزين .. وبامبي كان متأثر شديد بي قصة اب خوسة ..
بامبي طوالي ركب مشالو في قريتو ..
ولقاهو قاعد يفتل ليهو في حبال .. وابوهو وامو كبار في السن
واختو الرسالة عمرها 12 سنة قاعدة في الضل تصوط في عصيدة دخن ..
قال ليهو والله يا اب خوسة ان بقى ربنا داير يرفعك الليلة بس جاك
السعد ..وان بقى اصلك زولا" شقى وحظك شوم.. كمان بنشوفك ..
اب خوسة قال ليهو احكي يا طيب الاصل ..
بقى يحكي ليهو بالنسيم بت ود دار الزين .. وجمالا .. وجنون الناس بيها والمال البجي بي وراها .. والعز .. قال ليهو والله النسيم سمعت بيها والدنيا كلها بتنضم بها ..
قال ليهو دقيق النكمل لك باقي النضم ..
..حكا ليهو بي قصة ود مكتول العجوز الح يتزوج البت ..
اب خوسة قال ليهو طيب مادام ود مكتول هسع في فترة الاختبار .. خبارك انت جايني ؟
قال ليهو ود مكتول انا بعرف اصرفو ليك بس انت تقبل لي بالموضوع ده انا والله داير ابرك .. وبعد ناتعرس النسيم عندي طلب منك تلبيهو لي .. قال ليهو طلبك شنو؟
قال ليهو ده سر بقولو ليك بعد النسيم تبقى مرتك ..
قال ليهو انا ياخوي ان بقى ماشفت البت مابقبل .. وانا ماني من الناس البعرسو عشان السماحة . السماحة تطير .. انا داير لي بت تحملني وتحمل ابوي وامي ..
قال ليهو خلاص انت اركب حمارتك وشيل حطبك وامشي دق الباب
حق ناس ودار الزين
والكلام ده يكون بين الشرقة والضحى ... عشان الوقت ده التاية بت مختار ام النسيم بتكون مشت على السوق .. والنسيم بتفتح لك الباب
وانت بتشوفا .. وبعد تشوفا بنعرفك كان بتنستر ولا بتلحق ود السيد الانشقه بي شوق النسيم ..

يتبع.....