طبعآ قلبي وقع في رجلي
معقوله الشايفو ده استاز خالد
عملت نفسي ماشايفو
بس هو ناداني بكري يابكري اتلفته عليهو كيفك استاز خاالد
انشالله خير مالك في بورسودان
قالي والله ماعارف اقوليك شنو
من شهر كان عصمت ود احمد اتقدم لي رنا بنتي
قلبي وقف
قلت ليهو مشالله ربنا يسعدم
قالي والله حصلت مشكله رنا رفضت
وانا ضربتها
وبقت مابتاكل ولا بتشرب
واسه جبتها هنا في مركز بتاع تداوي بالقران رقيه شرعيه وصفو لينا
قلت ليهو سلامته ماتشوف شر
طيب عصمت عمل شنو
للاسف يابكري ولدي والله عقدنا ليهو قصبآ عنها
واسه عصمت مابي يطلق
وقال يخليها كده عشان صغرتو قدام الناس
قلت ليهو يا استاز ربك بهونه
اسه انتو نازلين وين
قالي والله عندي حسن ود حمدان خالي شغال هنا في المينا
وساكن في سلالاب
قلت ليهو خلاص خير يا استاز
انا طبعا في الكليه وسلالاب بعرفه
بس اديني الوصف او اي حاجه اصلكم بيها
قالي خير خلاص انت بدوك ازن متين
قلت ليهو ازن شنو
اسه لو ممكن بمشي معاك
طبعا نسيت العسكريه
كلمت دفعتي ومشيت مع استاز خالد
طبعآ كنت خايف اشوف رنا بالحاله دي
وكل ما العربيه تمشي علي سلالاب كان ضربات قلبي بتسرع والعربيه تسرع وضربات قلبي تسرع
لحدي ما وقفت العربيه وقلبي وقف
نزل استاز خاالد
دخلت في غرفه مطرفه
خمسه دقايق قالي اتفضل يابكري
حيلي ماااات ورجولي بقت ماشايلاني
شفت ليك توب مجدوع في نص السرير وماشفت رنا
شفت بقايا رنا
قلبي وجعني شديد
وهي كانت شبه نايمه او هايمه او مامجمعه
استاز خالد قاليها رنا ده بكري جاي يسلم عليك.
والله خايفكم تقولو فلم هندي بس رنا
وقفت علي حيله وبقت تفتش في الغرفه وينو وينو
انا دموعي نزلت وبقيت ماعارف اتصرف كيف
احضنه اتمنيت لو الارض تتشقه وتبلعني
عيونه جاااات في عيوني
بكري جاي بعد شنو
جيت بعد ابوي ماباعني
جيت بعد امي مالبست دهب قطر
جيت بعد ما ناس بيتنا غيرو باب الشارع وابوي لبس الجلابيه السكروته
ابوها كان واقف زليل ماعارف يتصرف كيف
كان حاسي بالزنب
مديت يدي اسلم عليها
قالت لي بكري للاسف ما ح اقدر اسلم عليك
انا مبيوعه لي عصمت
انا اهلي استلمو فيني مبلغ زهيد
للاسف جيت متاخر
انا بدون اشعر قعدته علي ركبي في الواطه وبدون اشعر بقيت ابكي بي حرقه
واستاز خالد مخلوع من البيحصل ده
لاهي شيفاهو ولا انا حاسي بي وجودو
بكري تعرف خروف الكرامه
تعرف لمن ناس الحله يجمعو قروش ويشترو ليهم حمل يصبحو ويوزعو كيمان
اها انا وزعوني كيمان
كوم مقابل الدهب
وكوم مقابل القروش
وكوم مقابل المغترب الجا دفع المبلغ واشتري البهيمه
ابوها قاليها رنا قولي بسم الله
بكري كدي اقيف علي طولك فهموني في شنو
انتو بتعملو كده بينكم في شنو
قالت ليهو بينا في شنو
بينا مافي اي شي
بينا انا وهو شريان موصل دمي مع دمو
بس قطعتو الشريان ده بي اوسخ سكين
وافقدت الوعي
انا بقيت في حاله تاني وناس البيت اتلمو
واستاز خالد شوف عيني شفته دمعتو في عيونو
الدنيا ضلمت في وشي وحسيت اني خزلتها
مكان فيها حاجه لو وقفت معاها
مكان بكلفني شي حت لو ابوي يولع فيني كنت اتصدي لي عصمت
كرهته نفسي
حسيت بي اني متامر مع اهله في البيعه
انا كان كل همي اهرب عشان ما احضر البيعه بس للاسف شاركته في البيعه
طلعوني بره الاوضه الفيها رنا
طلعته وقفت في الشارع ودموعي اربعه اربعه
معقوله رنا اتعزبت كل العزاب ده بي سببي
انتظرته معاهم لي المغرب
ومشينا المركز بتاع الرقيه
والشيخ قري عليها
قاليهو مشالله مافيها حاجه بس عاوز تتغزي وتشرب وتاكل
استاز خالد قاليهو هي بتقوم باليل تبكي
الشيخ قاليهم والله انا حسب خبرتي مافيها مش ولا ملبوسه بس البت فاقده زول غالي عليها
استاز خالد اتلفت علي
وطلعنا
لمن وصلنا بيت اهلم استاز خالد خلاني مع رنا في ااحوش وطلع
هي بس كانت بتعاين لي وتبكي وانا زاتي ببكي معاها
قلت ليها حبيبتي عاوزك تعرفي حاجه من اليوم مافي شي بفرقنا من بعض
وحت لو اخسر القدامي والوراي مابفرط فيك
بس عاوز تقومي بالعافيه
وانا نزل البلد شهر 7 الكلام ده كان في شهر5
المهم مسكتها من يدها وهي كانت بترحف من فوق لي تحت ومستحته ليها دموعه
جا استاز خالد
تصدقو ماخفته ولا فكيت يدها
استاز خاالد قاليها رنا هاكي اشربي العصير ده
سبحان الله البت تقول عطشانه ليها سنه
شربت الكبايه في دفعه وحدي استاز خالد لمن ظهر الفرح في وشو
جابو لينا صنيه فيها اكل
الغريبه استاز خالد شكلو استوعب انو علاج رنا في يدي
اكلنا انا ورنا وكل ماعيني تجي في عينيه دمعته تنزل
المهم استازنته منهم بس كانت رنا في احسن حال
قالت لي عاوز تخليني تاني
قلت ليها قدام ابوك انا لو اخلي الدنيا دي كلها مستحيل اخليك
الغريبه ابوها كان ماعارف يتصرف
بس همو كلو يطمئن علي بنتو
رجعته اامعسكر وختوني في الحبس وخلقو لي صلعه وعزبوني عزاب الله واكبر
المهم بعد تلاتا يوم دخلت لي القائد
وحكيت ليهو قصتي من الاول للاخر
قالي خلاص امشي وتعال بكره
بس احزرك تاني اوعك تجيني في موضوع زي ده
دي عسكريه فاهم ياطالب
حيتو وقربته اطير من الفرح
وصلت بيت اهله الفي سلالاب
دقيت الباب فتحت لي الباب شافعه
قلت ليها عمو خالد في
جا زول من ورا الشافعه قالي اتفضل بس والله ..
يتبع........
