مُحسن:بوك عنده املاك كبيرة في ايطاليا وتركيا وتونس ومصر وفي ليبيا ايضاً
ياسين واية:كيييف؟
اية:بس نعرف الي في ليبيا بس
مُحسن:عارف ف هذا علاش بوك وصاني اني نقابلك وانتي عارفة الدنيا حياة او موت ف قلت خلي نعطي الامانة لي اصحابها قبل مايصيرلي شي لقدر الله
اية:بعيد السو بس بس هكي حيصير صراع بين الكل
مُحسن:بوك دار احتياطاته كلهم وسجل لكل شخص من اولاده ممتلاكته الخاصة ومنساش امك ايضاً
اية قعدت سارحة وتفكر كيف وليش وعلاش بوها محكاش لي حد وهل امها تعرف او لا؟!
مُحسن:عارف اسئلة هلبا تلود في راسك بس في موضوع اهم من هكي
اية:الي هوا؟
مُحسن:اسف اني قاضي وعندي محكمة توا ف لازم نمشي بكرا انشاءالله بنفس الموعد هذا وفي المكان هذا نتلاقو ونكون جبتلك الاوراق والادلة وحكيتلك ع الموضوع التاني
اية:تمام مشكور وربي يعاونك
مُحسن:بارك الله فيك يابنتي
ياسين:في امان الله
مُحسن:الله يخليك عن اذنكم
ياسين واية:اذنك معاك
قعمزت اية وهيا تفكر وفي حالة صدمة:بابا طلع عنده املاك من غير مانعرفو
ياسين:اي غريب هي نروحو
اية:هي
ادهورو شوية في المحلات الي في طريقهم وخدو عشي وروحو
وصلو تعشو وصلو ورقدو
تاني يوم ناضت اية دوشت وصلت وجت تنوض في ياسين:ياسينو حبيبي نوض
ياسين:نعممم شوية بس
اية:هيا جعانة بنفطرو
ياسين:هيا هي
ناض دوش وصلى وبدل ونزلو للبوفيه فطرو وطلعو ادهورو لين جي وقت المقابلة
مشو للقهوة طلبو 2 ستاربكس
وصل مُحسن سلم عليهم وقعمز
ياسين:شن تشرب ياعمي
مُحسن:اسبريسو
ياسين رفع يديه للنادل وجاه:لو سمحت واحد اسبريسو
طبعاً يكلم في النادل بالايطالي
اية:اي احكيلي
فجأة جي شاب في عمر ياسين او اكبر بشوية
اية وياسين:؟؟؟؟!؟!!
مُحسن:عادي متستغربوش عرفهم بي نفسك
الشاب:اسمي مراد مواليد 92 ليبي
مُحسن:المهم مستغربين من هذا صح
ياسين:اي
مُحسن:هذا الي بيشاركم في الورثة
أنت تقرأ
العيلة
Randomروايه تحكي علي حوش الجد او بالاحرى على العمام باللهجة الليبيه( الطرابلسيه ) 👌👍
