الساعة 1الظهر
سندس قاعدة علي اعصابها وقالقة علي سراج ومن بعد قهوة الصبح معش كلت شيئ ولما شافت للساعة ولقتها 1 هنا طفح الكيل وصبت ومشت للفيلا لقت عمها كيف جاي
سندس:خير
محمد وعفاف:خيرات
سندس:عمو سراج ماجش للشركة
محمد:والله شنو انقولك يابنتي ماجش للشركة وانا بروحي مشغول عليه
عفاف:حي عليا راه تطلع صايرتله حاجة
سندس بخوف:بعيد السو اعميمة
محمد:ان شاءلله مافيش شيئ وانا حندير اتصالاتي توا وانشوفو شنو ايصير
خش محمد المكتبه ايدير في اتصالاته وسندس وعفاف مقمعزات يرجن في رحمه ربي وهنا الاثنين قلوبهن نار شر من بعضهن
بعد نص ساعة محمد طلع عليهن
عفاف:ها طمني عرفت مكانه
محمد:ماخليت مستشفى ولا حبس ماسألت فيهن ومافيش اي خبر عليه
عفاف:باهي الحمدلله
سندس:باهي وين ممكن ايكون
محمد:انا حنرد انكلم فيصل بالك يقعد شافه او كلمه
عفاف:هي كلمه توا
محمد رن علي فيصل وفيصل رد
فيصل:ها طمني جا سراج
محمد;لا والله مازال ماجا انت ماكلمكش ولا جاك
فيصل;لا كلمني ولا جاني وكلمت كل الشباب اللي يعرفهم ماحد شافه
مع خشت سراج للفيلا
عفاف:وين كنت شغلتنا عليك
محمد:خلاص يافيصل اهو روح
فيصل:باهي تمام الحمدلله وسكر
سندس:معقولة ادير فينا هكي
محمد:وين كنت وليش قافل تليفونك
سراج:كنكم مركبين
محمد:من امس وانت طالع وقافل تليفونك وماحد يندري عليك وين واتقول كنكم مركبين
سراج:بس انا مش عيل صغير عشان تنشغلو عليا
عفاف:عارفينك مش عيل صغير بس نحن انشغلنا عليك
سندس:وين كنت من امس
سراج شافلها زين:مادخلكش بيا
محمد: تحشم علي وجك واحكي مع مراتك بأدب
سندس:انا عارفة انك زاعل ماللي صار أمس بس هو موضوع عادي مايستحقش اتبات برا وتشغلنا عليك هكي وعالعموم انا أسفة ماكانش قصدي انزعلك
سراج:ومن قالك اني زاعل وانتي من عشان نزعل منك
سندس شافتله زين:سراج انا تأسفتلك مش داعي للكلام هذا
عفاف:دوسة ماغلطتش فيك وفوق هذا تأسفت بس انت اللي مدرعنك كنك
سندس:سراج شكله مازال معصب مني انا حنمشي نقعد اليوم عند هلي لين اعصابه يهدن وبعدها حنحكو
عفاف:شنو تمشي انتو حتروحو مع بعضكم وسراج لاهو زاعل ولا معصب اصلا سراج ماعمره زعل منك
محمد:سراج خوذ مراتك وعدو حلو مشكلتكم في حوشكم وصالحها لانك زعلتها
سراج بعصبية;لا نبي انصالحها ولا نبيها وخلوها تمشي الهلها وتقعد عندهم ديما
سندس:سراج انت كنك شن صاير معاك مش معقولة هذا كله لاني قتلك ارقد في الفيلا صحباتي بيجني
سراج:بتعرفي كني
سندس:ياريت
سراج:انا معش نبيك انا كنت نبي منك شيئ معين وخذيته توا طيري فوتيني
محمد ضربه كف:شكلك مش متربي وتبي ترباية من جديد
سندس وجعتها ضربت سراج وجت بينه وبين باته
سندس:لا عمو مش هكي انا عارفته سراج معصب ويحكي في الكلام هذا لان زاعل مني توا حنمشو للحوش وانتفاهمو ومسكت يده
سندس:هيا الحوشنا سراج
سراج كر يده من يدها وبعصبية:بشنو تفهمي قتلك معش نبيك انا راه ماحبيتكش انا كذبت عليك
سندس:لا مش صح وانت اتحبني وانا انحبك انت بس معصب
سراج بعصبية:ماانحبكش اطلعي من حياتي انا بنرد نفس ماكنت معش نبيك
سندس:لا مش طالعة من حياتك وانت اتحبني واكبر دليل علي حبك ليا انك تغيرت عشاني
سراج:لا ماتغيرتش وكله كذب وفيلم درته عشان نوصلك وناخذ اللي نبيه
سندس تبكي:لا مش صح انت تكذب
عفاف:سراج انت شن صايرلك
سراج:ماصايرلي شيئ انا معش نبيها خلاص انتهى الموضوع
سندس:مش بجوك سراج
سراج:لا بجوي ولعبة انا بديتها انا بننهيها خلاص
سندس:حبنا مش لعبة
سراج:اي حب تحكي عليه اصلا مافيش حب انا كذبت عليك افهمي
سندس:سراج لو صح كلامك شوف العيوني وقول ماانحبكش
سراج لف وجه للجيهة الاخرى:سندس انتي طالق
#يتبع
حي علما طلقها😭😱
قولكن سراج كنه وشن صاير معاه هل صاح حبه الها كان لعبة او تأثر من كلام تالين ولا قولكن طلع ايحب تالين😱
أما فيصل اللي قرر ايطلع الفرح دغري شن حيكون رد رانيا عليه🤔
اما صلوحة قولكن حيكسب قلب رنا وايغير رأيها أو لا 😕
كلا الاخ رؤوف زايط والجو تمام عنده بس قولكن حيقعد هكي بعد يسمع خبر الخطبة 😳
كله حنعرفوه في الحلقة الجاية
حبيباتي مازال بس حلقتين وتكمل😍
أسفة لو فيه لخبطة في الأسماء وأكيد رأيكم ايهمني 😉
گـتـابـتـي Koka Saleh
أنت تقرأ
منحرف واحببته
Romanceكانت تلك الإختلافات سبب جمعنا لنكمل قلوب بعضنا💗 These differences are the reason why we gathered to complement each other's hearts
الجزء 48
ابدأ من البداية
