السحر الاسود

بارت الاول

#بقلمي_سارة_المجيد

ومن اعمالكم سلط عليكم .. اكو مثل يكول الي يزرع خير يحصد خير والي يزرع شر يحصد شر .. ومن هنا نبدي القصة ...اعرفكم بنفسي اسمي لميس مرحلة ثانية كلية تربية طولي 159 رشيقه شعري اسود بشرتي حنطية لون عيوني نرجسي ...بابا يشتغل بوضيفة حكومية وماما ربت بيت وعندي اخ صغير عمره 7 سنوات اسمه علي ..حالتنه جوه المتوسط كاعدين ببيت اجار وتعبان كولش ... طبعا اني شخصية انطوائية ما احب الاختلاط بأحد وماعندي اصدقاء بس صديقة وحدة اسمها نور .. هيه بكلية الطب للاسف افترقنه من اختلفت دراستنه صرنه منشوف بعض هواي بعد ما جنه منفترق ابد بس وكت النوم ....ونور انخطبت لزميل الها بالكلية اني اعرفة بس مو علاقة قوية يعني هوه جان يزعل منها يجي يشتكيلي منها ... وره فترة للاسف الخطوبة اتفركشت ...عادي كولشي قسمة ونصيب واني ماعرفت بس بالصدفة هيج مادري ليش صارت علاقتي بيها باردة مو مثل قبل ... جنت اتمنى اعرف بموضوع فسخ الخطبة حتى اكون بجانبها بهل فترة .. المهم حياتي جانت ماشية عادي ..بس صارت شغلة يمكن الكم هم صارتلكم .. صار فطر بالحايط والمصيبة صاحب البيت طلع قرار بقدرت قادر بتفليش(ازالة) البيت يعني حتى مو ترميم لا ازالة ...وجان الحل احنه لازم نطلع من البيت ونشيل لغير بيت ...ف بابا بده يدور ع بيت او شقة للاجار بسعر مناسب .. بس للاسف كلها اجاراتها غالية نار ... واحد صديق بابا كله اخذلك بيت بأطراف بغداد تكون بعيدة هناك الاجار رخيص ومناسب اكعدوا هناك بين ما الله يفرجها عليكم شتسوي ...بابا فكر ورحب بالفكرة.. ثاني يوم رحنه للمكان لاكن الي بابا مكاله النه ..انو البيت موجود بنص المقابر 😨 .مادري جان يدري او لا لان اول مادخلنه كال لالالا ماخلي اولادي يعيشون هنا بس اني اعرف بالضروف الغبره شلون جانت للاسف ...فسويت نفسي مدايره بال وغلست .. كتله ليش بابا شبي المكان اصلا عادي اشو الميتين اهدء من البشر وعايشين بسلام مو مثل الاحياء العايشين وياهم ... وبابا خطية ماصدك من حجيت هل حجاية كيف كال انتي هيج رأيج .. كتله اي والله طبعا .. البيت جان عبارة عن دور واحد ب3 غراف يعني يادوب يكفينه ... اول مادخلت من الباب مادري ليش حسيت مثل ميكولون اهلنه العراقيين العتبة مو مريحة .. حسيت انقبض گلبي ..طبعا اكيد العتبة مو مريحة احنه راح نسكن يم الاموات 😣 ..خما راح نسكن بجزر المالديف 😥..
المهم طبينه ونظفنه البيت وجبنه غراضنه ورتبناهن ...واجه الليل كل واحد دخل لغرفته ...بهل وكت جنت كاعده ع الجرباية داقراء دروسي بس ليش اجذب ... مجنت منتبهه ع الدرس جنت افكر بمصيري .. يعني اني اذا اجه واحد يتقدملي .. يجيني هنا بالمقابر 🤔 ..
يله الي يريده الله هوه الي يصير ...
بهل لحظة سمعت صوت غريب ع حيطان شباك الغرفة من بره ..صوت مستفز كولش يكزبر الجلد يشبه خرمشة الاظافر 😣... الشباك جان مفتوح وكفت ع القنفه حتى اسد الشباك لان جان عالي ...جان اشوف ..راح اوصفلكم بالضبط المشهد ..شفت قطط سوده حوالي هيج 6 او 7 قطط ..صغيرات وكبار ... بقيت اكش بيهن واصيح عليهن كش كش يله روحوا كششش ..
صوتهن جان مرعب .. المهم سديت الشباك واتعوذت من الشيطان الرجيم .. ومرت هاي الليلة والوراها هم مرت عادي ماكو شي ...بس القطط كامن يزيدن واني اتعودت عليهن ... بيوم خلصت دوام الكلية داطلع شفت صديقتي نور الي حجيتلكم عنها منتظرتني بالباب ...سلمنه ع بعض وهاي ...
نور .. اكولج لميس اريد اسئلج ع شغلة ممكن واتمنى متضمين عليه ..
لميس .. لا حبي ليش اضم كولي عادي
نور .. اني سمعت انتي ساكنة بالمقابر ؟!
لميس .. اي عادي وين المشكلة تعرفين الضروف ..
نور .. لا اني مو قصدي شي ..ااااا ااااني
لميس .. انتي شنو يا نور
نور ...اكولج تكدرين تلكيلي جثة ..
لميس .. 😳😳 .. الكيلج شنوو !!!
نور .. جثثثثه
لميس .. مرعوبة ومصدومه .. ليششش
نور .. اريدها لدرسي لان عدنه مادة تشريح وهل مرة لازم الدرس عملي .. ف انجيب جثث وندرس عليها علمود الامتحانات عادي اكيد انتي سمعتي ع هل شي ..
لميس .. يعني شنو تريدين جثة بني آدم 😐
نور .. يعني بربج قابل داكولج اريد جثة فارة
راح تعرفين تتصرفين لو لا فهميني ..وشوفينه احد واني ادفعله الي يريده
لميس ... معرفت شجابوها كمت اتلعثم بالكلام وقاطعتني وكلتلي ادفعله 8ملايين دينار .. وبهاي اللحظة اتوقف عندي الزمن وسرحت بأفكاري ... زين ليش ما اخذ نص المبلغ واشوفلها واحد يطلعلها الجثه ..لان حالتنه متدهورة ومتأزمة ع الاخر .. كتلها زين اني خلي اشوف وبعدين ارد عليج ... عفتها ومشيت وبقيت افكر شلون اسوي هل عملة ..اني محتاجه الفلوس اني كل الهامني الفلوس وبس .. ماكو غيرة عمو جابر ..اي ماكو غير الدفان الي بالمقبرة .. اي مو اني صرت من اهل المقابر واعرفهم كلهم .. رجال بعمر الخمسين اكيد يكدر يفيدني بهذا الموضوع اقشمرة بفلسين واخذ اني الباقي 👹.
وسبحان الله واني راجعه بطريقي للبيت شفت عم جابر كدامي سلمت عليه وسئلته عن احواله ..كلي زين الحمدلله ع كل حال بنيتي
لميس .. اني اريد اطلب منك طلب .. اريد اتدبرلي جثة
عم جابر .. شنو جثه قصدج تدفنين
لميس .. داكولك اريد جثه تكدر تتصرف وتجيبلي الجثه
عم جابر .. بأستغراب وذهول .. وشتسوين بيها 😕
لميس ... ها مو الي لصديقتي عدها درس عملي وتريدها لان عدها امتحانات وخطية اتروح ترسب لو ماعدها جثه واكيد راح ترجعها يعني ...
عم جابر .. بخوف واشمئزاز . اعوذ بالله من الشيطان الرجيم يابنتي هل شي حرام
لميس .. داكولك ياعمي جابر هذا علم وللدرس اتريدها والدكاترة كلها هيج اتسوي .. يعني مجايين الك طلبة ورايدين منك جثه ..
عم جابر .. اي اجوي وطلبوا مني صح واني رفضت وكلتلهم لااااء ..
لميس .. زين عرضوا عليك 3 ملايين ؟!!
عم جابر بذهول .. شنو !!!
صدك تحجين
لميس .. اي والله داحجي صدك راح تاخذ 3 ملايين ..
الرجال اتحول هههه لغة الفلوس تحكم كلي ماشي انتظريني اليوم بالليل وره صلاة العشاء ...اوكفي ع اول المقبرة.. اتصلت ع نور وكتلها تعالي اليوم بالليل وره صلاة العشاء وجيبي سيارتج واوكفي بأول الطريق مال المقابر راح تاخذين الجثة الي انتي تريديها 👹...
نور بفرح وممصدكه كلتلي صدك تحجين انتي متتخيلين شلون خدمتيني ..قاطعتها كتلها لامتخيلة ولا شي جهزي فلوسج وتعالي بالموعد ..
وبالليل رحت بنفس المكان الي اتفقنه اني وعم جابر اوكف بي بقيت انتظره ...جان يجي ويكولي تعالي ويايه ..مشينه و وصلنه يم قبر منبوش وكلي يله
لميس .. شنو يله 😕
عم جابر .. يله نزلي ويايه نطلع الجثه اني رجال شايب ماكدر وحدي اطلعها ..
لميس .. لالالالا ياعم جابر ماكدر لعد انت راح تاخذ 3 ملايين ع شنو .
عم جابر .. هه انتي هم اكيد ماخذه مثلهن 😏
يله حبابة نزلي ويايه لو تريدين اقفل القبر وارجع لبيتي...
لميس .. ماشي ماشي امري لله حنزل😒..
ونزلت وراح اشرحلكم المشهد بالضبط واتخايلوا نفسكم بمكاني ..مقبرة بالليل ماكو اي مخلوق بهل مكان الي انت بي وقبر مفتوح ونزلت حتى تشيل جثة ميت بيديك 😨 .. جسمي جان يرجف من الخوف لان اصلا اني مداخله مقبرة قبل هل وكت ..المقبرة جانت سرداب نزلنه جانت متقسمة مثل الغرف القبور البيها طبينه لغرفة منهن وجان اسمع صرخة زرفت اذاني زرف ... جفلت وردت افقد الوعي لزمت ايد عم جابر .. كتله هاي شنو هل صرخة عفيه ...كلي لتخلي بالج انتي مو جايه تسرقين منهم عادي راح تسمعين من هل اصوات كثييير 👹 يله طلعي ويايه الجثه ماظل وكت ...وفعلا ساعدته وشلنه الجثه لمكان السيارة مال نور جانت واكفه بنفس المكان الي اتفقنه عليه ... وحطينه الجثه بجنطة السيارة وكلتلي نور فدوة لعمرج اشكرج حبي ..ونطتني المبلغ وكتلها يله انتي روحي روحي يله ...
عم جابر .. ها بنتي تريدين مني شي بعد 🙄
لميس .. ها لا اشكرك هسه اجي بس اتصل بتلفوني وارجع انطيك فلوسك ..
جابر .. تتصلين بتلفونج لو تعدين الفلوس وتقشمريني بكم فلس 🙄 ..
لميس .. اهووو عمو جابر هسه احنه اتفقنه ع شكد الفلوس راح تاخذهن ...
اخذ الفلوس عم جابر واني رجعت للبيت واتمددت ع الجرباية من التعب والتوتر والخوف نمت محسيت ع نفسي .. فزيت ع صوت جان يهمس بأذاني 😳 فتحت عيني الدنيا ظلمة هندس .. ردت اكوم من مكاني جسمي مثل المشلولة مكدرت اتحرك .. جسمي عبالك لوح خشب مجمد حتى رگبتي مداكدر احركها .. حسيت بشي ديطلع من يم الجرباية وديلزم برجلي بقيت اتعوذ من الشيطان الرجيم برعب وخوف جان يطلع شي ثاني وثالث وحسيت مثل المخالب وصوت القطط .. انوب سمعت صوت ثعبان اصخام 😱 ياربي دخيلك فدوة اروحلك انقذني شنو هذا اعوذ بالله من الشيطان الرجيم جان اسمع صرخة قوية وراها كولشي اختفه وكمزت من الجرباية والعرك ديصب مني ...كمت رحت للمطبخ اشرب مي .. واني دامشي بجانب الحمام سمعت نفس الهمس مرة ثانية
.. يعني اني مجنت احلم
اريد افتح باب الحمام حطيت ايدي ع اليدة مال الباب وجسمي يرجف من الرعب فتحت الباب وجان اشوف 😨

يتبع ...