dedication to Sinityy
TITLE: Akademia De Harkiah
Genre: Fantasy, Romance, Adventure, Action
Written By: whitechocolatebaek
All Rights Reserved 2019
---
PROLOGUE:
Ang Harkiah ay isang kaharian kung saan ay lahat ng taong ipinanganak dito ay nagtataglay ng special abilities at may kakayahang mag-summon ng weapons na nakatakda para sa kanila simula nang maipanganak sila. Ang kahariang ito ay nahahati sa walong bayan ang Harkiah at kabilang dito ang Parasula, Fireo, Nieves, Aeraria, Taiga, Riveris, Lurgo, at Zottei.
Ang PARASULA ay ang sentro at pinakamalaking bayan sa lupain ng Harkiah. Ito ang nagsisilbing sentro ng merkado o bagsakan ng mga kalakal mula sa pitong karatig-bayan. Doon matatagpuan ang Arasula Mountain, ang malaking pamilihang nasa Lilac Village, at ang sikat na eskwelahan na tinatawag na Akademia De Harkiah.
Kung mga matitibay na battle armor at espesyal ng kagamitang ginagamit sa pakikipaglaban ang pinag-uusapan, ang bayan ng FIREO ay nangungunang bayan. Ito ang pinagkukunan ng ibang karatig-bayan lalo ng mga nag-aaral sa Akademia. Sikat din ang lugar na ito dahil sa Bulkang Effir na nagbubuga ng naglalagablab na bato at tubig na dumadaloy sa nag-aapoy na Ilog Fireo.
Ang NIEVES ay ang pinakamalamig na bayan dahil sa madalas na pag-ulan ng nyebe. Malaki ang ambag ng Nieves sa Harkiah kasi ito ang pinagmumulan ng magaganda at de kalidad na mga kasuotan sa buong lupain. Dito lang makikita ang mga puno at hayop na tila diyamante na nagniningning.
Ang AERARIA ay may pinakamatibay na barrier at tanging bayan na nasa himpapawid ng Harkiah. Iilan lang ang nakakapasok dahil nandito ang Harkiah Palace, ang palasyo ng Mahal na Hari at Reyna ng buong Harkiah. Kailangan mo pang sumakay sa isang ulap na hugis karwahe na kailangang hilain ng pitong ginintuang kwago para makarating dito. Mayaman ang bayan na ito sa mga mamahaling bato na ginagawang alahas o kagamitan sa bahay. Dito rin nagmula ang mga kuwagong mensahero ng Harkiah.
Sagana ang bayan ng TAIGA sa mga espesyal na prutas at gulay pati na rin mga halamang gamot na nakatanim sa Tierra Forest. Ito ang ginagamit ng mga dalubhasa sa pag-gawa gamot na epektibong makapagpagaling ng sugat o karamdaman. Dito mo rin makikita ang pinakamatandang Healer pati na ang higanteng puno na nagsisilbing sentro ng buong lupain ng Taiga. Ito rin ang bayan na pinanggalingan ng kasalukuyang Reyna ng Harkiah.
Ang RIVERIS ay ang natatanging bayan na nasa ibabaw ng tubig kaya kailangan pang sumakay ng bangka para makapunta rito. Ang harang nito ay gawa sa tubig, pangatlo sa may pinakamatibay na harang sa buong Harkiah. Mayaman ang bayan na yon sa mga lamang dagat at doon rin matatagpuan ang Coliseo De Riveris, ang pinaggaganapan ng mga malalaking tournament ng Harkiah.
Ang bayan naman ng LURGO ay ang may pinakamalaking farm at pastulan sa buong Harkiah. Maraming baka, kalabaw, manok, baboy, kabayo, kambing, usa at kung ano pang hayop na makikita mo sa isang farm. Halos doon nagmumula ang mga karne ng baka, baboy, at manok na binibenta sa iba't ibang bayan. Doon matatagpuan ang Devil's Eye, isang gubat na puno ng mga mapanganib na halimaw na doon mo lang makikita.
Ang huling bayan ay ang ZOTTEI. Ito ang pinakamaliit at pinakamahirap na bayan sa Harkiah. Karamihan ng nakatira doon ay mga taong mababa ang katayuan sa lipunan o medyo salat sa yaman. Kakahuyan ang sumasakop sa kalahati ng lugar na ito. May matatagpuan kang isang kuwebang tinatawag na Graven Cave, may makipot itong daan papuntang Taiga.
Isang kaharian.
Walong bayan.
Isang pagsusulit.
Isang paaralan.
Isang babae.
Siya si Ellie Cornelia, labing walong taong gulang na ipinanganak sa bayan ng Riveris pero lumaki sa munting bayan ng Zottei. Maganda, mabait, matalino, maabilidad, at matapang na babae. Isa sa mga pangarap niya ay ang maging katulad ng kanyang yumaong ama. Makapag-aral sa Akademia De Harkiah at makasali sa Sylveria Guild tulad ng ama niya.
Siya, kasama ang kanyang mga kaibigan, sundan ang kwento at samahan sila sa kanilang paglalakbay sa loob ng kaharian ng Harkiah.
Written By: whitechocolatebaek
All Rights Reserved 2019
---
