ساعة 05:00 م
محسن مصبي ف المطبخ يدير في كاكاو ؛ جابه و جاء لعندي مدلي المق : تفضلي اميرتي
اني سقمت روحي من ع الكنبه و خديت منه
خش محسن الحمام خدا الدبش من الغسالة و بدا ينشر فيه في المنشرة يساعد فيا في كل شي مش مخليني ندير حاجة لان حملي صعب و الحركة المتعبة ممنوعة عليا
بعد ما كمل جاء قمعز جنبي
محسن : حبيبي كيف حاسة روحك بعد الترجيع احسن ؟
اني حطيت ايدي ع فمي و خشمي : محسن خليك بعيد كم مرة بنكرر ؟؟ 😷
محسن اتضايق و وخر
اني بحتت فيه و اتضايقت عليه صح نحبه و نموت فيه بس وحمي جايني عليه مش طايقة نشم ريحته و هضا الشي يقطع فيا بالعرق
اني : اسفه واجد عارفه روحي زودتها عليك بس مش قادرة والله ، اني قلتلك خليني نقعد عند هلي لعند مايمشي مني الوحام بس انت صممت
محسن مسك ايدي و هو امباعد : مستحيل نخليك تطلعي من عندي و انتي في امس الحاجة ليا ، حتى و انتي تاعبة و كارهتيني على قلبي كيف العسل يكفي انك حامل بقطعة مني في احشائك مهما نديرلك مانوفيلكش حقك
اني نشوفله و مدمعة ضميري يأنب فيا تجاهه لاني مانعاملش فيه كويس و هو مدللني و شايلني على كفوف الراحة
اني دموعي نزلو : معادش تزيدني يا محسن
محسن حط ايده تحت عيني : سادنا دموع يا قليبي فترة حملك كلها و انتي تبكي و متضايقة
اني سكتت
محسن : شنو رايك نطلعو نغيرو جو ؟
اني مسحت دموعي : اي اصلا نبي نشري حاجات ناقصيني عشان خطوبة مهيب
محسن : باهي صبي ناخدوهم توا
اني صبيت : لالا خليك انت تو نعدي بسيارتي
و خشيت للدار نغير دبشي
محسن فهم اني مانبش نركب معاه في سيارته عشان ريحته ، الريحة اللي كنت نموت فيها و اللي اول مانشمها نذوب ذوبان فيها توا كارهتها و نشم فيها جيفة 😷
الله غالب وحمي جاء عليه 😞
غيرت دبشي و خديت مفتاح سيارتي و جيت بننزل
محسن خدا مفتاح سيارته و نزل معاي
اول ماطلعت هو طلع معاي قعد يمشي وراي بسيارته لعند ماكملت مشاويري مخليني طول الوقت تحت انظاره من خوفه عليا
_________________
نـرجـس : عمـو خلينـي انصـلي و انقـولك
بـات محسـن : تمـام الولـد مشـاءلله عليـه. و بـانـي فوق هـله صـلي و قوليلي
نـرجس صبـت: حـاضر " و طلعـت "
ابتـسام تستـشور فـي شعـرهـا. : خيـر خيـر شـن الضحكـه هـذي و الابتـسامـات
نـرجس ضحكـت وصكـرت البـاب و وقفـت عليـه: جـانـي عـريس
ابتـسام حطـت الاستشوار : كـذابــه احـلفـي و مـني هذا ويـن يعـرفك تكلمـي
نرجـس قمعـزت على السـرير: ولـد جيـرانكـم و حـالتـه كـويسـه
ابتـسام : اللـه. ! معتـصم اكيـده
نرجـس فتحـت الـروشـن و لقـت واحـد واقـف. : هضـا قـصدك
ابتـسام جـت وراهـا. : اي هـوا هههه حظـك حـلو
نـرجس : بـس مفـيش هيبـه كيـف محسـن. ! محسـن توقفـي قـدامـه،يفـرض عليـك شخصيتـا بلغصـب
ابتـسام: عـلاش تحكـي هكـي انتـي جربتـي اصـلا توقفـي معـاه
نـرجس بـدت ادمـع. : مستاحشــه محسـن و ربـي
ابتـسام لفتهـا ليـهـا. : عـاودي. ؟ ناسيـه شـن جـاك مـن وراء الححـب هضـا ؟ كـم يـوم رقـدتـي و انتـي تبكـي نوضـي لـروحك و انسـي هـي حـامل و حتجيبـلا ولـد او بنـت
نـرجـس حضنتهـا بالقـوه. : ربـي ايوفقنـي معـاه حنصـلي الاستخـاره و انشـوف 💚
__________________________
