Obey Him

Chapter 8

"Marami bang pogi?"

Napangiwi ako. "Marami naman po."

"Speaking of pogi. Kumusta iyong bago mong bodyguard?" Huminto siya sa ginagawa at lumapit sa akin. "Crush na crush ko rin iyon."

"Si Kuya Calder? Okay naman po siya."

"Oo naman! Okay talaga. Masungit nga lang. Hindi namamansin iyon, e. Manang-mana sa amo natin. Pero ayos lang. Makita lang sila, maligaya na ako. Sila na lang na mga guwapo sa bahay na ito ang libangan ko, pampaalis ng stress kay Mrs. Cruz kumbaga!"

Hindi ko na sinabi na iba ang ugali ni Kuya Calder kapag kami lang dalawa. Feeling ko, gusto ng lalaking iyon maging misteryoso siya sa mga tao. Ayaw ipaalam na deep inside, kengkoy siya. E di pagbigyan.

"Alam mo kaya ayaw kong magresign dito e dahil marami talagang masasarap sa mata. Maliban lang syempre don sa nag-e-early menopause na si Mrs. Cruz."

"Wag ka magre-resign, Ate Minda. Ikaw lang ang friend ko rito."

"Kaya  nga hindi talaga. Tinitiis ko na lang talaga iyang toyo ni Mrs. Cruz. Lahat ng kasambahay rito, tiis to the max sa babaitang iyon. Kay Sir Jackson lang iyon mabait. Plastic!" Ang sama ng mukha ni Ate Minda, mukhang naiinis talaga siya kay Mrs. Cruz.

Bakit kasi napakasungit ni Mrs. Cruz? Inaano ba namin siya?

"Sige balik na ako sa paglilinis at baka dumating ang bruha, malintikan na naman ako."

"Sige, 'Te." Tinungo ko ang hagdan.

"Nasa veranda pala sexy mong uncle at ang sexy mo ring bodyguard, nag-uusap," pahabol niyang nakangiti. "Mag-iisang oras na sila ron. Nagha-heart to heart talk yata ang dalawang guwapo!"

Nag-uusap sila. Close ba sila?

Sa glass door palang ay tanaw ko na ang dalawang matangkad na bulto na malapit sa pasimano ng balcony. May mapusyaw na liwanag malapit sa kanila, dagdag pa ang liwanag ng buwan kaya kahit medyo malayo ay nakita ko ang anyo nila. Mukhang seryoso ang pinag-uusapan nila Uncle Jackson at Kuya Calder.

Wala akong balak makinig, kundi lang may kung anong pumipigil sa akin para hindi ako umalis. Para bang may bumubulong sa akin na manatili. 

Lumabas ako at lumapit. Dahil wala ako sa line of vision nila kaya hindi nila ako napansin. Nakatagilid sa gawi ko si Kuya Calder at busy sa pagsimsim ng kape sa hawak na tasa. Si Uncle Jackson naman ay nakatalikod at mukhang busy sa pag-iisip. Hindi gumagana ang matalas niyang pakiramdam dahil hindi niya talaga ako napuna.

Bahagyang tumagilid si Uncle Jackson. Napatanga ako sa ganda ng mga mata niya sa liwanag ng buwan. He got gorgeous eyes, yet they were ruthless.

"I plan to take care of her."

Anong pinag-uusapan nila? Sino ang tinutukoy niya?