غضب العشق ( نهوة)

البارت ٤٤

اجه يمي كعد ع المرجوحة اخذ الصوندة يرش بالمي وشهد واسد اجوي يركضون بالحجلة عليه ضل يلاعبهم واني كاعدة بصفة حط ايدة على راس اسد وباوعلي
غضب: عشق شوكت نطهر نمر واسد
عشق: شنو
غضب: نطهرهم شوكت
عشق: لا عفية غضب شنطهرهم بعدهم صغار
غضب: يا صغار اصلا كبروا مافطنت على هل شي الا من صديقي عزمني على حفلة طهور ابنه باجر وهوة ابنه عمرة ٣ اشهر
عشق: ماتحمل والله خطية يتأذون
غضب: عشق لعد شوكت نطهرهم كبروا ويتأذون اذا كبروا اكثر
عشق: منطهرهم احسن خطية والله
غضب: ههههه ولج هاي من كل عقلج ميصير لازم يطهرون هاي سنة نبوية
عشق: فدوة يبجون ويتأذون خاف يصيرلهم شي
غضب: يولي ميصيرلهم شي اني مو مطهر هم
اني مقهورة وخايفة بس من كال اني هم مطهر خربت ضحك ههههههههه
عشق: هههههه والله هههه يعني انته مطهر هههه
غضب: وسسسم اي والله اكو رجال ممطهر
عشق: ماكو ما طهرهم
غضب: لتتخبلين خطية الجهال
وكفت وشلت اسد من الحجلة: كلت مااا اطهرهم
دخلت جوة واني شايلة اسد مجرد ما افكر بالموضوع اخاف تذكرت من طهرو اخوية علي وشلون ضل يبجي يمممة يخوف حضنت اسد بقوة دخل غضب يضحك علية وشايل شهد
غضب: يولي قابل كتلج راح اذبحهم
عشق: ماكوو منطهرهم عفية كافي سد الموضوع
صدك والله سد الموضوع ٣ ايام رجع كلشي طبيعي بين الجهال والتنضيف ودوام غضب خابرتني قدس الساعة بال ٨ الصبح ورا ماطلع غضب للدوام
قدس: الو
عشق: هلاو شلونج
قدس: الحمد لله انتي شلونج
عشق: زينة الحمد لله
قدس: الجهال شلونهم
عشق: الحمد لله بس يتعبوني شوية
قدس: كلنا نفس الحالة اكلج خابرتج علمود تطلعين وياي للسوك
عشق: ياسوك غضب ميقبل اطلع بدونة
قدس: يولي دخابري وقنعي
عشق: لا خليني ساترة على نفسي ومجبوبة ببيتي اشرفلي
قدس: لتصيرين غبية خلي نطلع نتونس كوليلة بلكي يقبل
عشق: افرضي قبل والجهال شلون وين اخذهم وياي ما اكدرلهم
قدس: عوفيهم يم سرى وسهى يلة خابري يادوب نلحك
عشق: اكلة واشوف اذا ترزلت اجي ارزلج
قدس: ديلة بس كوليلة
سديت الخط منها واني متوهوهة اخابر غضب  واكلة ادري بي ميقبل الا اطلع ويا يلة شخسرانة خلي اكله حتى اشتري ملابس للجهال والي هم خابرت
عشق: الو حبيبي
غضب: ها عشقي
عشق: انته وين
غضب: بالدوام ليش
عشق: ها عبالي اكلك على شي
غضب: اي كولي
عشق: اريد اطلع ويا قدس للسوك تقبل
غضب: شتسون بالسوك
عشق : اشتري ملابس للجهال وسوالف شتكول عادي اذا متقبل انتضرك نطلع سو
قاطعني: اي روحي
عشق: والله
غضب: اي والله والفلوس يمج بالكنتور اخذي شكد تحتاجين الراتب كله يمج
عشق: راح اخذ ٧٥ اشتري للجهال ملابس
غضب: واخذي الج هم ٥٠
عشق: تسلم يا احلى ابو نمر
غضب: اخذيلي وياج شحاطة قياس ٤٣
عشق: تدلل بعد شتريد
غضب: رايد سلامتج هاا صدك الجهال وين تعوفيهم
عشق: راح اخليهم يم البنات اخذ بس نمر وياي
غضب: لا عوفي نمر واسد يم البنات اخذي شهد وياج
عشق: لا ليش اخذ نمر
غضب: يضوجج هوة اني اطلع وياج بكوة نسيطر علية مو وحدج عاد
عشق: لعد راح اخذ بس اسد هادئ ميضوجني
غضب: لا شيسوي ابني بالسواكة اخذي شهد
عشق: ماشي مثل متريد
غضب: يلة حبيبي عندي شغل باي
عشق: الله وياك
سديت الخط  من غضب خابرت قدس كلتلها قبل كالت يلة تحضري راح ادزلج زينب تجيب الجهال وياج كلتلها ماشي وسديت الخط رحت بدلت للجهال حضرت الحليب والحفاضات وملابس احتياط جهال خاف يوصخون نفسهم بدلت الي ول شهد اخذت ١٥٠ من الكنتور وقفلت الكنتور وحطيت المفتاح بالمزهرية خاف يطب حرامي ويبوك الراتب كلة بس اني وغضب نعرف مكان المفتاح وين اجتي زينب علية حطيت التؤام بالعربانة وطلعت قفلت الباب واخذت المفتاح غضب هم عندة نسخة زينب لزمت ايد نمر وطلعنا بعد شارع واحد بيت عمي وصلت ل بيت عمي سلمت ع البنات وعلى قدس واية ومرت عمي عفت الولد يمهن ووصيتهن عليهم وع الحليب واكلهم وطلعنا اني وقدس وزينب بتها وشهد اخذنا تكسي وصلنا للسوك بال ١٠ لل ١١ اخذت تراكسودات للجهال وملابس طلعة شحاطة ل غضب واخذت سيت نوم لونة بيجي ودشداشة واحتياجات للبيت وقدس بس تفتر تدور على بنطرون ل قصي دوختنه لل١١ ونص ندور ميعجبها ولا واحد واكفين ويا ابو المحل يشوفنا بالبناطير دك موبايلها طلعت بالباب جاوبت واني واكفة ويا ابو المحل وشهد تبجي ضاجت حارة الدنيا وكامت تبجي اني اسكتها واباوع ل قدس
ابو المحل: هذا تركي اصلي ولونة دارج هالفترة
عشق: مو الي للبنية هسه تجي تشوفة يلللة ام زينب
اشرتلي بيدها وهيه تخابر بمعنى انتضري
اجتي وهيه تخابر: اوك هسه جايين مع السلامة
عشق: منو خابر
قدس: قصي يسأل شوكت نرجع
عشق: والله تأخرنة وانتي تفرفرين بينه حتى شهد ضاجت وكامت تبجي يلة عاد
قدس: اي اي
اخذت البنطرون واخيرا طلعنا اخذنة تكسي وصلنه للفرع شفت فرقة يدكون وناصبين  جادر وغدة زلم يتغدون
عشق: هاي شكو
قدس: امشي ننزل ونشوف
وكفنه التكسي بعيد عن الزلم ونزلنة قدس دفعت الكروة نزلت ع السريع لان زلم برا دخلت للحديقة مال بيت عمي ذابحين خروفين وجداري ولد عمي واكفين يطبخون ويصبون هاي شكو باب الاستقبال مفتوحة من بين كل الاصوات ميزت صوت اسد وصراخة روحي فرفحت مادري شصار بية قدس اخذت شهد من ايدي ذبيت العلاليك من ايدي وتوجهت لباب الاستقبال عمامي وولد عمامي ابوية واخوتي واكفين جرباية بالاستقبال مفروشة فرشة بيضة وصوت بجي نمر وصراخ اسد اقتربت شفت جهالي لابسين دشاديش بيض ورافعيهن لبطنهم ومطهريهم وهمة يبجون غضب كاعد يسكت بيهم وميكدر وكفت اباوع واني مصدومة اكبر عذاب لكل الام من تشوف جهالها كدامها يتعذبون ويتألمون دموعي نزلت واني اشوفهم يتصارخون من الألم
احمد ابن عمي: بالخير ام نمر يوم الي تشوفيهم عرسان
كلماتة وعتني للي ديصير وخلت غضب ينتبه لوجودي كام وكف كدامي
غضب؛: ام نمر ب
عفته ووخرت على جهالي نمر يباوعلي ويبجي واسد يصرخ حضنت راس نمر وابجي ويا لازمة ايد اسد وابوس بيها احس نفسي عاجزة اقترب غضب حط ايدة  على جتفي دفعتها طلعو عمامي وعافونه وحدنه
غضب: حبيبتي ان
قاطعته: لتتتتحجي غدرررتني من وراي خنت ثقتي بيك شلووون تأذي جهالي هيج كتلك ماررريد
غضب اقترب : والله علمودهم
دفعته ووكفت: بحياتي ما اثق بيك بعد ابددددد اكرهك واموت منك
حضني وحط راسي على صدرة ادفعة وهوة يشد على حضني ويبوس راسي
غضب: والله ادري صعبة عليج واني هم صعبة يعني اني عاجبني اشوف جهالي يبجون من الوجع بس لمصلحتهم
اضربه على صدرة واصرخ: كله من وراك اكرهك واموت منك بعد بحياتك ماخليك تشوفهم وخرررر مني وخرر
ابتعد مني كعدت وحطيت اسد بحضني ارضعة وهوة يشهك ودموعة تنزل يعض بصدري  من الوجع الي بي واني ابجي ويا وامسح على راس نمر
عشق بدموع : كافي حبيبي تبجي والله راح تموتني
نمر ببكاء: اووواة
شوصفلكم شعوري احتركت كأنما احد شايل جمرة ويحطها بكلبي زاد بجيي ويا بجية وحضنت راسة على صدري واني اباوع ل غضب احس روحي تطلع واريد احركه ل غضب
عشق: الله ليوفقك
اقترب مني حط ايدة جوة ضهر نمر والثانية جوة رجله وشالة ويهزة يحاول يسكتة وهو يبجي واسد بحضني يبجي ويرضع واني ابجي
نمر ببكاء: بابا اوواة يوجعني
اخذت نفس قوي: اااااااخ غضببببب اخخخخخ منك
غضب دار وجهة عني ويهزة لنمر: كافي حبيب بابا والله علمودكم لو كبرتو اكثر تتأذون
عشق: اكررررهك
ميجاوبني يدري بية كلبي محروك
بكوة نام اسد ورا نص ساعة نام ودمعته على خدة حطيتة بفراشة مسحت خدة وكمت وكفت نمر بعدة يبجي اخذتة من ايدة حط راسة على صدري ويبجي ويشكي من الوجع واني اباوع ل غضب بحقد ودموع: اكرهك والله اكرهك
اقترب يبوس راسي دفعته
غضب: والله احبج واحبهم
عشق: واني اموت منك اليوم رجعت نفس غضب زمان ونفس الكره الي بداخلي رجع عليك
غضب: والله لمصلحتهم شوفي اسد لان صغير نام وارتاح بينما نمر ت
قاطعته: اسكت ولا نفس لتخليني اموتك انته مو اب انته واحد حقير ونذل وغدار
غضب: عشق افتهمنة كافي تغلطين ادري كلبج محروك وساكت كافي
عشق: لا لان تدري بنفسك غلطان متحجي
غضب: اي غلطان ارتاحيتي
عافني وطلع وطبك الباب ورا واني حاضنه نمر وابجي ويا الى ان هدئ ونام ورا شوية نومته بصف اسد وطلعت سرى وسهى ديغسلن مواعين وقدس شايلة شهد تبجي تحاول تسكتها باوعتلها : جنتي تدرين موو لهاي ضحكتي علية وطلعتيني وياج
قدس: والله معلية اني غضب ك
قاطعتها من اخذت شهد بقوة منها : بحياتي ما اثق باحد بعد
من شافوني هيج محد حجى شي اخذت شهد وكعدت ارضعها يأذيني صدري لان اسد جان يعضني حولتها على صدري الثاني وارضعها دموعي تنزل واني امسح على راسها وبكلبي حقد على غضب يمكن اريد اشرب من دمة على سوايتة هاي الى ان نامت شهد من التعب وفرت السوك
سرى: اصبلج غدة
باوعتلها مجاوبتها نضراتي جانت كفيلة تسكتها شلت شهد ووديتها لغرففة عمي ومرتة نومتها ع الجرباية وطلعت للاستقبال لكيت غضب كاعد يم الجهال يمسح على راس نمر وضهرة علية مشافني اباوع ل اسد يشهك بنومتة غضب لزم ايدة وباسها
غضب: اسف حبيب بابا
بجيت وطلعت شهكة مني ندار غضب باوعلي ووكف داطلع ركض وسد الباب حصرني ويا الباب يريد يحضني
غضب: اسف حبيبتي
مجاوبتة بس ادفع بي
غضب: عشقي جاوبيني
باوعت بوجهة وعيونة بقوة: انته مستحيل يسموك اب
حضني بقوة واني اريد ادفعة ما اكدر حضنته وابجي : أذيتهم شلون انطاك كلبك
غضب يبوس راسي: والله اني تأذيت اكثر منهم بس لازم ماشفتي نمر تأذى اكثر من اسد لان اكبر منه
عشق: ليش ماكتلي
غضب: مو كتلج ومارضيتي عرفت اذا اكلج ترفضين
عشق: اني عايشة وهيج أذيتهم اذا امو
غضب: اششششش والله مو قصدي
عشق: غدرت بيه انته وخر ابتعدت من حضنه ودفعته
عشق: بعد ماخليك تتقربلي لا اني ولا الجهال
غضب: ب
فتحت الباب وعفته وطلعت واني كاعدة بالصالة واباوعلهم يشتغلون وهوسة عماتي والبنات ونسوان عمي والجناين هوسة للعصر النسوان بدت تجي للاستقبال يكعدن اجتي ملاية سوو مولد نبوي كلها تباركلي واني اتشكر منهن بس كلبي نار كلما اتذكر غضب يبوسون الجهال وبعدهم يبجون نمر متأذي اكثر من اسد كلشوية يريد يلزم جرحة بكوة مكعدي النسوان كالو لبسي اسد حفاظة حتى ميتأذى لبسنا صدك شوية صار احسن بس نمر حبيب امه حرك كلبي وهوة يشكي ويكول اووواة يوجعني شهد تبجي واسد يبجي كلشي مفتهمت غير بس ارضع والنسوان تباركلي لليل نصبو العشا اني مقبلت اتعشة كعدت يم جهالي شوية سكتو خف الألم عنهم كملو العشا وراحو لل ٩ كملو غسل المواعين والتنضيف دخل غضب واني حاطة ساد على رجلي وحاضنه نمر وشهد بصفي نايمة
غضب: يلة عشقي نروح لبيتنا
نزلت اسد من حضني وكمت لبست عباية ورجعت هوة شال نمر واني شلت شهد قصي شال اسد طلعنا زينب ويانة شايلة العلاليك الي تسوكناهن اليوم وجنطه الجهال وصلنه للباب غضب عدل نومته نمر على جتفة وفتح الباب دخل قبلنا نوم نمر ع الجرباية واني واكفة اخذ اسد من قصي وتشكر منه
قصي: تصبحون على خير
غضب: وانته بخير ابو زينب تعبناك ويانه
قصي: تدللون يلة اودعناكم
طلع قصي وزينب
قصي: اني اسد الباب اخذو راحتكم
طلعو غضب يباوعلي نومت شهد ع الجرباية ونداريت نزعت عبايتي وشالي واني اباوعله بالمرايا حط اسد ع الجرباية اجه باتجاهي طلعت بسرعة حتى ميقترب ويحضني ادري بنفسي ارضى بسرعة ولازم اعلمة قرارات الجهال مشتركة بينه ميغدرني مرة ثانية وياخذ قراراتهم وحدة طلعت للصالة طلع وراي دخلت للحمام ع السريع وقفلت الباب سبحت لفيت نفسي بالمنشفة وطلعت لكيتة كاعد يباوع تلفزيون بالصالة باوعلي سويت نفسي ماشفته فتت للغرفة داسد الباب دفعها وفات نداريت دافتح الكنتور وكف وراي مد ايدة ولزم باب الكنتور حتى ما افتحها حط خشمة على شعري
غضب: اسف حبيبتي
مجاوبتة مد ايدة على ايدي ومشاها على طول ايدي
غضب: مشتاقلج
فتحت الكنتور وابتعدت منه طلعت دشداشة كصيرة وسديت الباب وهوة واكف وراي لزمني من خصري دفعت ايدة داطلع من الغرفة
غضب: ليش تطلعين بدلي هنا
مجاوبته طلعت للاستقبال ديطلع وراي سديت الباب ووكفت بدلت وطلعت واكف بالمطبخ وفاتح الثلاجة يباوع بيها من سمع صوت الباب انفتحت ندار باوعلي: جوعان انتي مجوعانه
مجاوبتة دخلت للغرفة مشطت شعري اجه وراي وكف يباوعلي : جوعانه اصبلج وياي
مجاوبته توجهت للجرباية رفعت البطانية اتغطة ويا الجهال
غضب: مو داسألج جوعانه اسويلج وياية
اني حاضنه اسد وهزيت راسي بمعنى لا
غضب: احسن اني هم ماريد
اباوعلة اجه فتح السبلت وعله البرودة وجهة علينه وطلع سمعت صوت باب المطبخ ينقفل ودخل للغرفة طلع شورت وفانيلة ومنشفة وطلع للحمام سمعت صوت باب الحمام انسدت رفعت راسي ديسبح مكدرت انام ضليت اباوع ع الجهال شوية وسمعت الباب  انفتحت غمضت عيوني علساس نايمة فات للغرفة شمر الخاولي ع الكاروك مال شهد طفة الضوة واجه ماكو مكان بالجرباية اني عن قصد ماخليتله مكان نومت الجهال براحتهم سمعته يكول استغفر الله تقدم باس راسي ويشم شعري بقوة باس الجهال ووكف خلي اشوف وين يروح فتحت عيوني شوية راح للفراش اخذ بطاني ومخدة ندار علية غمضت عيوني حسيت بشي على رجلي وثكل فتحت عيوني شوية شفته حاط المخدة فوك رجلي ونايم ومتغطي رجله طالعة من الجرباية لان طويل انقهرت علية بس يستاهل غمضت عيوني واني احس بي يتكلب ممرتاح بنومته سمعت صوت جهازة انفتح سامعين صوت الموبايل اللمس من ينفتح ويصير مثل صوت المي سمعت هذا الصوت فتحت عيوني شوية اباوعلة خاف ديراسل ويخوني سمعت صوت يكول بسم الله الرحمان الرحيم فتح سورة قرآنية وحطه يم راسة مد ايدة على رجلي من فوك البطانية شوية وشال المخدة من جوة راسة وشمرها بالكاع وحط راسة فوك البطانية على رجلي احاول اتجاهلة بس كلبي مينطيني حسيت بالبطانية نرفعت شوية من يم رجلي مد ايدة جوة البطانية لزم رجلي ايدة باردة تجاهلتة شوية وخلصت السورة القرآنية شال ايدة من رجلي حسيت بي يتقربلي ماد نفسة على طولي همس بأذني : يولي تعبان لتسوين هيج
مجاوبتة سويت نفسي نايمة
غضب بهمس: والله ماكدر انام وانتي زعلانة
حط راسة بركبتي يبوس ويشم واني بكوة لازمة نفسي دقايق وابتعد رجع لنفس نومته انتضرت نص ساعة فتحت عيوني نايم سحبت رجلي على كيفي من جوة راسة جوعانه اريد اكل كمت على اطراف اصابعي فتحت الباب وطلعت للمطبخ مطفي الضوة بس ضوة الصالة داخل للمطبخ شوية فتحت الثلاجة طلعت جبن كلاص حطيته ع الكاونتر رحت ع الطباخ فتحت النار ع القوري ورحت فتحت المجمدة داطلع خبز ماحسيت الا ايد على خصري ونفس بشعري : مو كتلج جوعان

🌹🌹
للكاتبة Lamar Alzankna

--------
وحدة من المتابعات كالت البارحة كلتي ورا الحفلة انزل ثنين ونزلتي بس واحد 🌼

وحدة من المتابعات تكول البارحة لل٣ ونص بالليل كاعدة انتضرة عبالي تنزلين🌼

وحدة من المتابعات كالت لخاطري نزلي بارت هسه 🌼

والمتابعات كالن كملي 🌼🌼🌼🌼

لذلك نزلت هذا البارت وبالليل هم انزل بارتين لان التصويت الاكثر كالو بارتين بالليل علمود الدراسة ❤❤❤

❤❤❤❤❤❤❤❤❤❤❤❤❤❤❤❤❤احبكم❤❤❤❤❤❤❤❤❤❤❤❤❤❤❤❤❤