عطوة صلح

البارت 4

البارت 4
#عطوة صلح
بقلمي ملاك الصمت

تبارك ..
اليوم هو اليوم الموعود .. الاتفاق يجون اهل الولد الي انقتل وناس وياهم اكباريه العشيرة وسيد علمود يعقدلي ع الرجال الي راح يصير زوجي ..

اني لساعات الفجر ياله غمضت عيني .. ع فد بجيه .. تعبت وعيوني من كثر البجي غارن بنص وجهي ..

يمكن هنه ساعه لو ساعتين نمتهن وگعدت بالخمسه الفجر مخروعه ..
ماريد الوكت يفوتني واني نايمه اريد اشبع من اهلي واودعهم .. اريد اقضي اكثر واكول وقت وياهم ..

گمت مهدود حيلي بفترة هالاسبوعين ضعفت اكثر مما اني ضعيفه اكلي مو شي بس بجي والقهر اخذ من حيلي وصحتي ..

اباوع لوجهي بالمرايه عيوني منفخه ..

البيت مخبوص تنظيف ومسواگ وتعزيل عبالك صدوك عدنه عرس ..

اشوفهم يضحكون ويشتغلون ممهتمين عادي الموضوع عدهم .. ضحكاتهم ع جروحي تحط ملح بكل قساوة ..

اجوي الناس .. مجموعه زلم بيهم عشر زلم ومرة ووياهم سيد شفتهم من باب المطبخ من ديدخلون للمضيف ..
ماعرفت منو منهم الي راح يعقد عليه ولا سألت ..

شويه وصاحوني .. جدي صاحني .. لفيت شالي ولبست عبايه ودخلت المضيف ..
حته ماگلت السلام عليكم .. رأسا گعدت بصف جدي ..

بأول دخلتي لمحت ولد شاب انفه رافع خشمه توقعته هو الي راح يعقد عليه لان اول مادخلت عمي اخذ الزلم للهول .. مابقى بس هالولد الشاب ووياه رجال توقعته ابو الولد لان ينطيه شبه والمرة همين بقت والسيد ..

بدا السيد يحجي صيغه العقد واخذ الوكاله من ابويه حته يعقدلي لان قاصر ..

طول مكان السيد يحجي عيوني مدمعه واباوع ع ابويه بخذلان ويأس وعتب .. هلبت يشيل عينه ويصد ليه ويباوع بعيوني .. رضيت بقدري بس ردت نظرة منه تطمني للحياة الي اني مقبله عليهه .. ابد ماصدلي ولارفع عينه لعيني ..

اتفاجئت من السيد خلص مني والتفت يلقن الولد صيغه العقد مو الولد الشاب راح يعقد عليه الرجال الثاني ابو الولد الشاب ..

تخبلت الرجال حته اكبر من ابويه .. ابويه بوقتهه عمرة 34 او 35 سنه والرجال بحدود الاربعينات ..

رجال ضخم طويل متروس صدرة عريض اسمراني عيونه نرجسيه  وشعرة بي شيبات ولحيته هم ..

عقدلنه السيد وهالرجال صار زوجي ..

جدي التفتلي گال گومي البسي وجهزي نفسج تروحين ويه زوجج ..

صارت دموعي تجري عشرة عشرة .. رأسا گمت من مكاني طلعت من المضيف گبل لغرفتي  ..

امي لحكتني لان جانت ورة باب المضيف اول مافتحته الباب صارت بوجهي شهكت اخترعت وهي هم تفاجأت من طلعتي بس الشهگه الشهگتهه روحي وهمه ديزوجوني رجال حته اكبر من ابويه ..
كولهه بصوب و هالشغله بصوب ثاني ..