عطوة صلح

البارت 3

البارت 3
#عطوة صلح
ملاك الصمت

تبارك .. طول الليل واني ابجي .. ابد ماغمضتلي عين ماكدر انام .. طفلة واحس التفكير راح يموتني .. اصلا الي ديصير فوك طاقتي ماكدر استوعبه .. اتمنيته كابوس ويصير الصبح واصحى منه ..

بس من صار الصبح لگيته نفسه واقعي .. راح اتطلگ من حبيبي واروح عطوة صلح لرجال ثاني ..

الكلام يمكن سهل بس الوجع يفوق الوصف .. مو وجع بجسمي لا هذا يهون ..

الوجع بروحي بخاطري المكسور .. ياناس والله طفله بعدهي لعبتي تنام بحضني واخيطلهه ملابس واخاف من الظلمه وصوت الرعيد ..

صح مخطوبه بس ماعندي ذاك الفهم والوعي للي يصير بين الرجال والمرة من يزوجون هذا الي بعدين فهمته ..

العرس عندي بدله بيضه وحمرة واني وحبيبي نعيش ببيت واحد ..

گعدت الصبح مو بحال ريوگ ولا اكل رغم احس من البجي والتفرفح مال البارحه من بعد ماكلولي اليوم يطلگوني احس قوتي بايده ماعرف شلون عندي طاقه وقوة وبعدني واگفه ع طولي وبحيلي ظليت اتوسل بيهم .. بأبويه وعمي وجدي وأمي حته ميطلگوني لحد ماوكعت ع وجهي ومحد انطاني نشد ولا وجه ولا كلمه اصلا ..
امي تباوعلي بنظرة عاجزة .. مابيدهه شي .. وابويه كذلك .. كرهتخم وكرهت عزهم وضعفهم .. شكو جابوني لهل حياة الي كولهه ظلم .. مو المفروض يحموني ويسندوني ..

البنيه من غير ظلم مكسورة جناح ابوهه واخوتهه سندهه وخيمتهه وهي تاج ع روسهم عاد ويه الظلم شلون .. الحمل يصير مضاعف ع الاب والاخوة .. انضلمت وروحي تفرفح وتصيح يهل الرحم نصفوني
عينوني ..

ربي يفرفح گلب كل واحد وكف بطريقي وصار سبب بالي اني بي ..

من حلات روحي دخلت لغرفتي ولميت غراضي وملابسي وجهازي كامل وجديد بعده كوله بجيسه وذهبي .. لميته وطلعت لابويه اريد انطيهن اله علمود يبيعوهن ويوفون الديه مال الولد الي انقتل ..عقل طفله .. كلما اتذكر هذا الموقف اضحك ع نفسي شكد جنت غبيه وسخيفه وساذجه ..

الغريب بالموضوع خطيبي مختفي .. لايسأل ولا يتواصل ابد وكأنه مموجود ..

كلت يمكن بعد مايسمع الخبر يگلب عاليهه واطيهه بس مصار شي ولا سمعت عنه شي ..
مر يومين وخلال هاليومين عمتي ومرة عمي سولفولي الي جنت غافله عنه ..

حاجين ويه خطيبي ومقنعيه انو هذا هو الحل الوحيد علمود متصير السالفه سالفه دم بين العشيرتين وهو بكل سهوله مقتنع ..

طعنه بعد طعنه توجع وتكسر ..
لاعمري يتحمل ولاعقلي يستوعب ويشيل ..

ثالث يوم .. اني عبالي غلسوا .. بسذاجه دعيت ينسون الموضوع بس مانسوا .. اخذوني وبيومهه محمود هم اجه وطلگني يم السيد ..
دموعي بس تجري .. باوعتله وهو ينطق صيغه الطلاق .. ممتأثر مو مثلي .. ملامحه جدا هادئه وعاديه وماكو علامات حزن بوجهه   .. مترهي ومقتنع ..

رجعت للبيت .. ظليت حابسه نفسي اسبوع بالغرفه ..
وبهذا الاسبوع ماما تطلع تشتريلي وتجهزلي ملابس وملابس داخليه ومال نوم وشويه مكياج وعطورات ..
جهازي ذاك والذهب كوله رجعته لمحمود ورة يوم من فصخ العقد ..
بابا اشترالي زنجيل گلاده واني عندي تراجي وشكم قطعه ذهب بسيطه وتحضر جهازي تقريبا كمل ..

بالاسبوع الثاني استلموني حفافه وتنظيف وجهي وجسمي وحته شعري ميشوه .. طلعت غير شكل حته اني من باوعت ع روحي بالمرايه ماعرفت نفسي ..

رغم مغثوثه وقهر الدنيا كولهه بگلبي بس من جنت اصفن ع المرايه ابقى هواي اتمعن بشكلي ومتعجبه شلون هيج حلويت ..

طبعا اني بيضه عيوني كبار سود شعري اسود سرح بي كسرة بس هسه ميشته وجسمي ضعيف لان توني شبيت يعني ملامح الانوثه لسه مبارزة عندي وهمين طولي متوسط .. شي ع شي حلوة وصرت احلا بعد طلعتي من الصالون ..

الشي الي فاجأني الي راح اتزوجه بغير محافظه ..
يوم وثنين وتلاثه والبجي مافارگني صار هو سلوتي  ومحد رحمني من اهلي وعمامي .. كسرت خاطر الغريب وماكسرت خاطر اهلي ..

الى ان خلصت مهلة ال 15 يوم حضرتلي امي 3 جنط جهازي وملابسي واغراضي كامله واجه اليوم الي يجي بي الرجال الي راح يصير زوجي ...؟؟؟

للحكايه بقيه ..