غضب العشق ( نهوة)

البارت ٣٠

الممرضة بهمس: صباح العافية
عشق جاوبتها بهمس : صباح النور امي وين
الممرضة : قبل شوية كعدت راحت للمغاسل
عشق: اها ماشي
الممرضة: مبين يحبج ابو نمر
عشق: اي والله الليل كله كاعد عوفي شوية نايم خطية
اتقربت يمي عدلت الكانونة ضربت الابرة انطتني العلاج وطلعت امي طبت للغرفة صبحت عليه وسألتني على حالتي ووضعي كلتلها الحمد لله كعدت ع التخم شايلة قرآن صغير بيدها تقرة بي اني باوعت ل غضب شلون نايم ضليت اباوعله واني هايمة بي الى ان انفتحت الباب ودخلت الدكتورة باوعت للساعة بالتسعة
الدكتورة: صباح الخير ام نمر
عشق: صباح النور دكتورة
الدكتورة: شلون صرتي اليوم
عشق: الحمد لله احسن بس عبالك شياشة بنص بطني مدكدر اتحرك
الدكتورة: طبعا لان سيامة بداخلج كلها عشرة ايام زمان واشيلهن الج
شالت الطبلة جيكت حالتي اجتي يمي رفعت الغطا باوعت ل غضب وابتسمت شافت العملية كالت كلش زينة تكدرين تخرججين منا ل ساعة وخلي يمشوج شوية كلتلهاماشي امي تشكرت منها راحت الدكتورة واني اباوع ل غضب دائما نومة خفيف بس اليوم من التعب نومة ثكيل نمر ابن الزفرة كام يتنعوص ويتحرك على صدرة اقتربت وخرت ايد غضب داشيلة جان يفتح عيونه
غضب: هاا حبيبتي وين ماخذته
عشق: صباح الخير ابو نمر عيني ميصير هيج بعتني من اول يوم وبدلتني بابنك
غضب: مخبل ابدلج اني
عشق: هههه جيبة ارضعة وانته كوم غسل حتى نطلع الدكتورة كالت تكدرين تطلعبن
غضب: شوكت جتي
عشق: قبل شوية من جنت نايم
اخذت نمر من حضنه رضعته وغضب كام يغسل وجهة شوية وطلع عدل نفسة وشال نمر اخذة مني
عشق: ماما اريد اغسل
امي: اي ماما
كامت حتى تجي تساعدني
غضب: لا عمة انتي اخذي نمر  اني اغسللها
امي اخذت نمر من ايدة هوة وخر الغطا من فوكاي نزل دشداشتي عدل رجلي ونزلها للكاع كرفص كدامي وشال تكرمون نعالي لبسني يا
تعرفون معنى اوفى رجال بالنسبة الي هذا اني الي اشوفة ب غضب رغم كل كبريائة وكرامتة وعصبيته كدام الكل بس وياي حنيته غير شكل حتى امي شكد حنينة عليه بس مو مثله يعني يلبسني بيدة وينزل جوة رجلي شنو من حب هذا الي شايلة بداخلة افتخر لليوم اني مرتة ل غضب وافتخر اكو هيج انسان يحبني ومخليني ما احتاج لاي انسان كائن من يكون
وكف كدامي وكفني وهوة لازمني على كيفة يمشيني حتى ما اتأذة وصلنه للحمام غسل وجهي وايدي وركبتي وطبعا لازم يبوس بالركبة
غضب: وج والله مشتاقلج روحي مفرفحة عليج
حضنت ركبته وبسته : والله اني هم
ضل يبوس ورا شوية غسلي دخلت للتواليت وهوة واكف يمي كملت اخذني وطلعني وكفني بالغرفة لبسني حجاب والعباية فوكاها باس راسي وكال اسوي الاجراءات واجي ام نمر طلع يسوي الاجراءات واني واكفة يم سرير نمر اباوعلة شلون نايم ابن ابو حواجبه معقوجة تقريبا ورا ربع ساعة اجه غضب امي شالت نمر ومست كدامنه اخوية موسى اجه بوسني وباركلي شال الجنط مالتي ومال نمر والبطانية وطلع اني امشي على كيفي ولازمة ايد نمر من عكسة وهوة يمشي على كيفه وياي الى ان طلعنا صعدوني بالسيارة بصعوبة غضب خطية يمشي على كيفة اخاف بالطسات اتاذة من نوصل لطسة يخفف ويمد ايدة يلزم بطني ويعبرها وصلنه للبيت واكفين فرقة بالشارع وعمامي كلهم واكفين وكصاب وعقيقة ل نمر نزل غضب وفتح باب السيارة نزلت واني لازمته وامي نزلت وراي شايلة نمر الفرقة كامت تعزف الكصاب نوم الضحية بالكاع جوة رجلي وغضب واكف بصفي وشايل نمر غمضت عيوني ذبحو وكامو يكبرون حطو دم على كصت نمر وعلى كصتي دخلوني طلعن النسوان يشمرن جكليت فوكانا اني ونمر وغضب ويهلهلن ويباركن بوسوني وكلها تكول بالخير ام نمر مبارك عليكم ام نمر ول غضب هم باركوله ويبوسو دخلوني لغرفة الخطار محضريها الية كعدوني بطني توجعني حطو كاروك نمر بصفي مسحت الدم من كصتي وكصة نمر دخل ابوية بوسني وباركلي وبوس نمر حط فلوس جوة راسة ابو غضب هم بوسني وباركلي وبوس نمر وهم حط فلوس جوة راسة عمامي كلهم نفس الحالة ولد عمامي باركولي وطلعو اني كاعدة بس ألم موتني اشرت ل قدس اجتي يمي
قدس: ها عشق
عشق: قدس فدوة عندي ابرة  مهدئة بالعلاكة يمج اضربيلي ياها موتني الالم
حضرتها وضربتها بالكانونة احس نفسي وصخة ورجلية تلزك وحدة بالخ من الوصاخة
عشق: ماما اريد اغسل
ام عشق: اي ماما دقيقة
كامت وياي تكومني
دخل غضب : ويننن ماخذتها
عشق: اغسل
غضب: ارتاحي عمه بس خلي عينج على نمر اني يم عشق
لزم ايدي ومشاني للحمام
عشق: غضب صعدني لغرفتي ما ارتاح جوة
غضب: حبيبتي لازم خاف يصير بيج شي لاسامح الله
عشق: اووف
غضب: يلة حبيبتي امشي اصعدج
لزمني داصعد اول درجة ماكدرت شالني على كيفة وصعدني للغرفة فتحها برجله ودخل وكفني نزعني الشال والدشداشة بقيت بال اتك اباوع رجلي دماية ومعقمات لعبت نفسي من شكلي غضب قفل الباب واجه وياي دخلني للحمام نزع  دشداشتة حتى ميتبلل بقى بالشورت والفانيلة غسلي على كيفة خاف يصير شي بالعملية غسل شعري لفني بالمنشفة وهوة يشاقيني واحلى ام نمر وهل سوالف مالته طلعني من الحمام طلعلي دشداشة ووكف كدامي يبوسني ويبوس  بركبتي يشم بشعري ويهمس احبج ام نمر زوركني لبسني الدشداشة وكعدني ع السرير لزمت وجهة بين ايدية وبسته من خشمة
عشق: شكرا غضب شكرا يا احلى ابو نمر والله شماسوي ماعوضك
غضب: اشششش ي عمر غضب انتي شعندي غيرج ليش اني ما حاس بيج رغم متريدين طفل وانتي بعدج صغيرة بس علمودي حبلتي وجبتي رغم الالم والوجع ألالم الي بيج كله داحس بي اعرف صعبة عليج الامومة وانتي بهل عمر واعرف فرضت نفسي عليج وانتي متريديني اريد اعيشج احلى عيشة ماريدج تحتاجين ل غيري انتي كل حياتي ومحورها انتي انطيتيني احلى هدية قطعة منج نمر اجمل شي بحياتي من بعدج
لزمت ركبتة وابوس بي
عشق: اني شكد غبية وجنت رافضتك وماعرفت بحبك والله احبك هسه احبك واموت عليك
تقرب علية وكام يبوسني بلهفة واشتياق واني اندمجت ويا ماحسيت الا من الباب اندكت واني اسمع صوت بجي نمر ابتعدت منه: غضب عفية كوم هذا نمر جوعان
غضب:..

🌹🌹
للكاتبة: Lamar Alzankna

------
ادري والله هواي داطلب منكم تعذروني بس صدكوني مشغولة ودائمآ دتطلعلي سالفة وادري مدانطيكم حقكم ومقصرة وياكم والله ان شاء الله اعوضكم هذا البارت ٢٥٤٣ كلمة وراح اكتبلكم بارت هسه هم طويل تعويض الكم وتدللون ي حياتي انتو❤❤

البارحة الليل كله سهرانة اشتغل والصبح جان عندي طلعة ورجعت نمت للمغرب يلة كعدت جان البارت ١٢٤٣ كلمة كتبت فوكا تعويض الكم ❤❤

ماعرف شلون اشكركم على تفاعلكم الي يخبببببببل والتعليقات والتشجيع والتصويت كلشي يجنن حييييل اشكركم ❤❤

شنو رأيكم ب الغلاف الجديد للقصة بدلتة  صممتليا المبدعة زهراء
💜💜💜💜💜💜
حسابها في الانستغرام _zahraa_sa_        💜💜💜💜💜💜

❤❤❤❤❤❤❤❤❤❤❤❤❤❤❤❤❤احبكم❤❤❤❤❤❤❤❤❤❤❤❤❤❤❤❤❤