ليلة سمر
همس القوارير
البارت ١٢ والاخير
وفعلا رجع باسم من الدوام واني هستوه فات للبيت وسويت نفسي دابجي بصوت عالي اجه يركض خطيه وكف بالباب وگالي شبيج خو مصاير شي كمت اني من مكاني ومغطيه وجهي وانطيته الموبايل فاتحته على رسايلها وطلعت من الغرفه ما احس اله وهو رگع باب الطارمه وطلع واني ركض عالشباك واباوع من الشباك صاير عصبي ويصرخ عليها ويغلط واني شتردوني ضليت ارگص من الشباك ههههههه ورجع وهمين ما حجيت وياه بس ابجي طبعا دموع التماسيح هههههه وبقيت امكاني وهو خطيه خليته يلوب كل شويه يفتح موبايلي ويشوف الرسايل ويحرك برجله هو هيج باسم من يتوتر وعفته ورحت نمت اخذت موبايلي ورحت اراسل نبأ والليل كوله نضحك ونسولف وما اتصور باسم نام لان كول شويه اشوفه يطلع ويطب ومرات يمر عليه بغرفة الجهال واسوي نفسي نايمه
وثاني يوم همين نفس الحاله حولت الشريحه اول مفتحت الموبايل دكت رفعت الخط واسمعها تحجي بعصبيه
انتي وحده حقيره اله اعلمج اله اخلي رجلج يطلكج وشوفي يا سافله يا منحطه وانواع الغلط واني كولشي ما جاوبتها بصراحه محبيت انزل لهيج مستوى المهم سديته بوجها وخابرت نبأ كولتلها بالاخبار كان تگول
نبأ : هسه تدزينلها رساله وتگوليلها راح انشر رقمج بالمنطقه وراح اوصله لرجلج واخوانج وتخابرين فهد هسه يخابرها وينسق وياها واني هم راح انطي رقمها لاخوي عادل يخابرها شگولك احنا نشرناه احنا منريدها تنضر بس مجرد نخوفها وخلي فهد يكوللها ولد انطانياه وگلي هذه وحده مو زينه واذا خابرتج لا تردين عليها ولا تمسحين شي وانتي بعد كولشي لا ترسلين
سمر : ولج انتي شنو من افكار عندج ماشي راح اخابر
وهمين صودك خابرت على فهد اتفقت وياه الموضوع سر بيني وبينه وگتله وحده تريد تهجم بيت اختك وخطيه بس خابرته مخابرها وگاللها انو هذا رقمها اخذه من واحد بالمنطقه الفلانيه ورقمها طاش بالمنطقه وكاتبين عليه وحده ........ ما اشوف اله التلفون مالتي احترك من الدك واني اضحك وبقت تدك خمسين مره تقريبا ودزت ٣ رسائل كولها غلط ومسبه واني ابد ما رديت ورى ساعتين اتفقنا عادل اخو نبأ همين يخابر ونفس الكلام الي حجاه فهد حجاه عادل وهمين حسيت بيها تخبلت ونهارت اول شي غلط وبعدين لا والله بدت تتوسل ودزتلي رساله كاتبه بيها
الله يخليج ستري عليه اني وحده متزوجه لا تنطين رقمي بعد لا يوصل لزوجي وانفضح واتطلك وخلاص رجلج بعد ما اريده ولا اعرفه ولا يعرفني ورقمه مسحته وعذريني لان دخلت حياتكم اتوسل بيج تعوفيني لوجه الله
هذه الرساله من قريتها دزيتها لنبأ ومسحتها
نبأ : ههههههه شفتي شلون ناس ما تجي اله بالعين الحمره
