الموءوده

2

☆ الــــــمــــــوءودة ☆
الـــكــاتــبــة : #نـــازك_الــبــور ✎

الــبــارت " ² الــثــانــي ² "

امل : مابقى شي كله اسبوع و اكعد بس استلم نتيجه النصف الثاني ..

ام امل : الله كريم يمة ..

امل : كمت غيرت هدومي و صبيت الغدا ..

كومي لموش اتغدي ..

لمى : ماريد ..

امل : يوو يا لمو يمعودة يعني ما اتعودتي ع هذا الوضع قابل جديدة السالفة .. دكومي اكلي كوومي ..

لمى : راسي يوجعني اريد انام ..

رند : اكلي امل عوفيها ترتاح و تكوم تاكل .. قبل لا يجي مهيمن و يسويله زفه

امل : الله يستر ..

اتغدينا و صلينا .. امي مكسورة حيل بس تكابر ع الكسرة حتى لنحس بضعفها و ننكسر و نضعف .. امي مصدر قوتنا .. اذا انهدمت ننهدم وياها و بدون مقدمات ..

مر الاسبوع ع خير .. العرايك بالبيت بالشهر مرتين و مرات تلث عركات .. ضبطنا وقتهن .. عدهم استعداد ع خاشوكه تكب العيطه و الصياح .. اشكد نحاول ناخذ حذرنا بس نفشل و تفشل كل جهودنا بالحذر ..

كعدت بالبيت .. عطلت اقرا للامتحانات الوزارية .. ملل و قلق مو طبيعي اريد بس تجي الامتحانات و اخلص من هذا الضغط النفسي ..

ام امل : هاج يمة ..

امل : يمةة ليش تعبتي نفسج اني اصبلي جاي ..

ام امل : لا يمة داشوفج نايمة ع كتبج حتى شعرج مدتمشطي ..

امل : والله يا يمة ضغط .. تعبت .. اشكد اقرا احس روحي ممسيطرة ..

ام امل : عادي يمة هذا من حرصج .. ان شاء الله تسهل و تنجحين و ترتاحين ..

امل : آمين يارب ..

بقيت سهرانه اقرا للساعه بالـ 2 بالليل .. تعبت و نمت .. احس جسمي متكسر مدري ليش ..

كعدت الصبح بـ 8 و نص .. بس اني و امي نبقى بالبيت الصبح كلها تروح .. البيت بدون رند و لمى كئابه .. كمت من الفراش ..

هااي شنوو ..؟؟؟!! يمةةةةة يمةةةة الحكيلي يمةةةةة

ام امل : ريگت الجهال و ابوهم و راحوا للدوام .. بقيت انظف .. مكعدت امل سهرت ع كتبها سودة علية .. فجاءة سمعت صياحها .. ركضت للغرفه ..

عيوووني يمةةة شبيج .. شبيييج ..؟؟

امل : من داكوم انتبهت ع بجامتي و رجلي دم ..!  تخبلت من الدم .. انهاريت كمت اصيح و ابجي ..

يمةة دممم دمممم يمةةة ..

ام امل : اهدئي يمةة اهدئي ماكوو شي صرتي مرة ليش البجي حبيبتي المفروض تفرحين ..