شفاه ذابلة

يتم لا ينتهي

البارت السادس
همس ليل
شفته من بعيد اجى يتمشى هو دشداشته البيجي وعكاله وغترته ....
جان هيبة وكله رجولة ..اسمر من لوحة الشمس
والشارب اسود مخطوط والعين سودة بيها نظرة
صكر ...
جنت اخاف احط عيني بعينه واستحي هم
بس من يبدي يوجه الفلح...
ابقى اباوع عليه ...واكول هنيال مرتك يالمزيون
بس ويني وينك ....
اقترب واني بيدي هدوم اشرها ومن كد ما عيني تتأمله...
لازمة الثوب بيدي يكطر مي ومادري بنفسي...
فات من يم سياج بيتنا ...
جريت نفس كلت يجوز ماشافني  لان باب الخشب مفتوح واني صايرة وراه...
رجعت عصرت الثوب ونفضته دأشره وسمعت صوته
_بوية بابكم مشرع على الشارع مايجوز هجي ..
وانتة واكفة بطرك الدشداشة...
التفت عليه خجلانة...هذا شلون لمحني...
_عذرني خوية الجهال تعرف اطب وتطلع...
_علميهم يردون الباب براهم...
ولا تكولين خوية هالجلمة تلجم گليبي
_شكولك لعد ...
_شلون انة وية كلمة لعد وصاحبتها..
يابنت الناس رايدج ...
اريدن تصيرين حلالي....
وحق كفيل زينب....اصونج وماخلي جنس مخلوك يدنالج...
بس أمري....
استحيت من حجيه ودنكت...رغم گلبي دگاته تتسابق
من اسمع حجاياته...
بس مو بيدي اخاف من الي حولي...
_ليش ما اسمع جاوبج....
چنچ تريدين تشلعين گلبي فوك ماهو متولع بهواج
_يابو حسين ..فدوة رحتلك مابية حيل للمشاكل
_چا ياهو  يقربلج وانتي حرمتي...
غيرن اخلي امه تبجي عليه...
والله يابنت الحلال ...ليلي ما انامه وانة افكر بيج
وماعاجبني حالج...
اخافن عليج من عيون الناس...
لو تفتحين گلبي وتشوفين معزتج...
جان عفتي ناسج وهلج وماعفتيني...
سمعنا صوت الجهال اقتربوا....
_فكري يابعد ناسي وانة متاني جوابج...
مشى وعاف عيني معلكة براه...
فتت لغرفتي ...جربت مخدتي وتمددت على البساط الي بالكاع ورجعت ابالي لذيج الايام من توفت امي
جان عمري ست سنوات وشوية ...
ماذكر منها هواي بس اذكر ريحة الحنية والطيبة
من اضمني لصدرها...
الشي الي ما انساه ...نظرات عيني الي جانت ادور عليها.بين النسوان بالفاتحة...
والاكثر كلماتهم الي جانت ادك بأذني...
_ديلا شلون قهر أمها عاشت يتيمة والبنية هم خطية
جنت ساعة العب وية الجهال....
وساعة ارجع ادور على امي مثل باقي الجهال...
شوية شوية استوعبت هية ماكو...
كرفصت بركن وظليت ابجي...
اجو الجهال يسألون شبيج..
صحت اريد امي....اجى محمد ابن عمي شافني ابجي..
جنت اشوفه جبير بالنسبة لي رغم بذاك الوكت عمره ١٥ سنة بس...
شالني وبوسني...فرحة ليش تبجين
_محمد وين امي
من سمعني هيج كام ادموعه ادير صاح على امه
_يمة فرحة ليش مخليتها  وحدها
_سودة علية بنيتي...جانت تلعب وية الجهال..
اخذتني يم بيبتي ...جنت اباوع عليها بس تنعي وتبجي...
خلصت الفاتحة...خوال امي اجو بوقتهة وتعاركوا وية جدي...
كالولة بنتنا جانت مثل الورد شموتها...
واذكر بيبية امي ماجتي كالوا هية مريضة ومن سامعة بخبر امي متمرضة بالزايد..
المهم...خوالي عايفين الفاتحة ومسوين يمهم فاتحة لامي ونكطعوا عن عمامي...
خلصت الفاتحة...واني زدت بجي ...
جانوا يحاولون يسكتوني بكل الطرق ياخذني محمد مرة ومرة عمي يشترولي...
اقنع شوي وارجع اصعد لغرفتنا ادور امي وارجع للبجي...
بيبتي  تمرضت من القهر...
عمتي سمر دكول جانت تحس بالذنب على امي...
وحتى من كامت من مرضتها...
ظلت لابسة اسود...وكل مغرب تكعد بالطرمة تنعي وتبجي...
قبل الموت مو بكثر هسة...جان الشايب الي بالثمانين من عمره من يموت ...
كل اقاربه تحزن وية اهله ويبقون لابسين اسود لدورة السنة...
حتة الجوارين يلبسون وية اهله احتراما لهم...
وابوية وامي شباب راحوا...يعني مصيبة لهم...
اني صارت عندي فزة من يوم عمتي سمر كعدتني بصياحها على امي...
فكعد مرات بالليل مخروعة...
اذكر مرة كعدت على صوت صياح...باوعت ماكو بيبتي يمي...
طلعت شفت جدي كامش عمي كريم يكتل بيه...
وعمي صالح يحاول يفكه...
وبيبتي كاعدة على صفحة بس تبجي...
مابيها حيل جان....
من صبحنا الصبح رحت لعمتي اسالها براءة طفلة
_عمة البارحة شفت جدي يكتل بعمي كريم..
ليش...واشو عمي كريم صار هواي مايجي للبيت
باوعت علية واذكر نظرتها...
_عمة لو تدرين جان ماسالتي على هالعار
عبالها مشتاقتله...اصلا اني جنت اكرهه لان اذكر شلون يكتل امي....
مرت الايام ودخلنا بالسبعينات من القرن الماضي
دخلت لمنطقتنا الكهرباء ...جانت موجودة بغير مناطق...
حركة البناء والتطور كلش زادت بهالفترة...
بدت الجامعات تمتلي بنات بعد ماجانت نسبتهن قليلة...
بيتنا  عمي هم طور بيه...اشترى طباخ منظدي..
وراديو نسمع بيه كل ليلة اخبار...
ومن ينام عمي ياخذه محمد يعلك بيه اغاني تنذاع
لعبد الحليم وام كلثوم وناظم الغزالي ولميعة توفيق
عمي كريم رجع للبيت بس مابطل سوالفه...
اني سجلت مدرسة وجنت حيل شاطرة...
عمتي سمر الله ينطيها جانت مداريتني عبالك بنتها
تغسلي ودضفري شعري وتشتريلي ملابس بالمدارس وبالعيد ...
بس انام يم بيبتي وجدي...
ومحمد جان دائما هو يقريني....
عمي كريم ازوج....وزوجته سبحان الله نفس اخلاقه
دائما تتعارك وية بيبتي وعمتي سمر...
ومن يجي رجلها اظل تشكيله عليهم...
ويطلع يتعارك وية امه...
جانت خالة كورها وياي...
دائما تصخرني...ومرة كتلها عندي قراية ماكدر..
كامت ضربتني...
من شافتها عمتي سمر تخبلت
_ليش تمدين ايدج عليه
_وانتي شكو...مامؤدبة وتجاوزت وضربتها
_كلشي ولا دكولين عليها هجي...
اصلا فرحة كلش مؤدبة...
_شمدريج...وبعدين مالج شغل
_الي شغل ونص هاي بنتي
_لا والله...الي ادري بيه امها ماتت من زمان
جنت واكفة ورة عمتي ايدي علةى خدي ودموعي ادير...
ومن ذكرت امي نقهرت حيل جلبت بعمتي من ظهرها
_انتي شنو من بشر...مين الله خالقج...
لا تستحين ولا تخجلين...امشي منة لا اكلب الدنيا عليج
اول مرة اشوف عمتي هيج عصبية...
_لا والله مو هو بيتج واطردين بكيفج...
هذا بيت رجلي مثل ماهو بيت رجلج..
ومالج كلمة علية...
هزت ايدها وفاتت...
بيومها بيبتي جانت رايحة للنجف...كل اسبوعين او ثلاثة دروح لقبر ابوية وامي...
هو واحد مدفون يم الثاني...بس من ترجع
دكون مهدود حيلها...وعيونها وارمة من البجي...
من رجعت انطتنا الحلاوة الجايبتها ودخلت غرفتها تنام وترتاح...
رجع عمي كريم صعد لغرفته...
شوية ونزل يصيح...فرحة ...فرحة..
طلعت من المطبخ اركض...
_هاعمو
هو راسا جرني من أذني...
_لج بكد القندرة  وتتطاولين على الكبر منج
كمت ابجي واني ماعرف شمسوية
_والله عمو مامسوية شي...
ضربني راشدي...والنوب اتجذبين
طلعت عمتي سمر...جرتني منه شسالفة خوية
شلك على البنية...
_معليج انتي...طلعتوا عينها جيبيها خل ادبها
هية تجرني وهو بجرني واني ابجي بنصهم..
طلعت بيبتي من غرفتها...
_ها يكريم حولت النوب على الطفلة...ماكفاك الي سويته بأمها...
التفت عليها...مرة ماتت شلي شغل اني...راح اظلون تعيدون وتصقلون بنفس الحجاية..
وبعدين شنو ماعندي كلمة بهالبيت...
ترة اني هم لي حصة بيه...
_هاي حجاية الحية مرتك...جاوبته عمتي سمر..
التفت عليها وضربها...
واني ظليت اعيط من شفته..رجع علية...
جرني من شعري...
بهالهوسة دخل محمد وشافه تخبل اجى ركض دفعه...
وعمي كريم كام له...لك ساقط تدفعني رجع اضارب هو ومحمد....
جان محمد مو وحده ابوه وياه بس بعده بالباب
دخل على صوت الصياح...فاككهم
كريم...شفت صالح تربيتك السكط...ابنك يمد ايده علية
صالح....محمد صدك هالحجي
محمد...يابة شفته يضرب امي ورجع على فرحة
صالح...ليش
سمر...من ورة مرته حط البنية ملخها من الكتل...
ومن كتله ليش رجع ضربني
صالح...لك عار انتة ماينصلح حالك...لك فوك يتمها انت تتكوة عليها...
والقرعان اذا شفتك اتمد ايدك عليها الا اكسرهة
وهاي مرتك لمها لا تعرف شغلي وياك ووياها
مرته جانت واكفة على الدرج...من سمعته هيج
كامت تصيح...ليش تايهة لكم...ماعندي اهل...
كلكم التميتوا علية وعلى رجلي اني اعلمكم
المت هدومها واخذت عمي وطلعت...
بيبتي رجعت تنعي وتبجي...وعمي صالح رزل محمد لان تجاوز على عمه...
بهالوكت جدي جان كلش مريض...
بعدها بأيام توفى...وعمي كريم حضر الفاتحة بس مرته لا...
طلعت الاربعين ...واجى يداعي بورثه
صالح...صدك لو كالوا ذيل الجلب ماينعدل...
لك ابوك بعد ماجف ترابه وجاي ادور ورث
كريم...يعني شلون انتة وولدك تتنعمون بالفلوس واني متهجول ابيت اهل مرتي
صالح...محد طردك...انتة مشيت ورة مرتك
كريم...وهسة اريد حقي...انتة ليش متخاف الله..
انطيني حقي...
شوي كبت العيطة بينهم اني ركضت ختلت بالغرفة كمت اخاف من الصوت العالي...
بيبتي طلعت دحاول تهدي وهية مريضة...
بس عمي كريم طلع وهو يهدد بيهم...
مرت الايام وبيبتي صحتها بالنازل....فقدت الولد فقدت الزوج وفوكها دومها تذكر امي مدري لان تحس بالذنب..
مرات اسمعها تشكي لسمر ودكلها نهجم بيتي ..
هاي حوبت اليتيمة ...
عمتي سمر جانت اصيلة...مافرقت بيني وبين ولدها...
بس ابقى احن لامي...اكو شغلات تحسيها بس امج
تكدر تمنحها لج...
وعمتي جانت دوم تكعد تحجيلي عنها
_امج مثل الذهب...گلب ابيض ...ولسان حلو..
دضاحك الهوى...وحجايتها بلسم
وابوج هم جان خوش انسان عمره مارفع صوته على احد...
ونادرا ماشفته عصبي ...دومه هادئ
هو حبها لامج حيل ودلله وهية بجاهه صارت مثل الوردة ودتفتح...
بس من راح كامت تذبل...جنت اشوفها يوم عن يوم تذوي...
اسمع ونينها تالي الليل من تدخل غرفتهة وتكوم تلوليلج...
ماكو مثل وفة امج لابوج ...
جانت تختم حجيها بدموع تحسسني شكد امي طيبة جانت...
وتزيدني شوق لها....
محمد ابن عمي بهالوقت نقبل طبية...
وجان ناجح من الصف الرابع...
هالحجي بسنة ٧٩ ...اني نجحت من الثاني متوسط
وابن عمي الثاني علي ثاني هندسة
والثالث حسين بالاعدادية خامس...بوقتها الاعدادية مابيها سادس حدهم للخامس...
جنة ننتظر نتيجة حسين وشينقبل...
محمد تغير ...كام يحاسب على اللبس...
وراح اشترالي ربطة وطلب من امه تشتريلي ملابس طويلة وردن
_يمة شجاك...بعدها صغيرة
_لا يمة شنو صغيرة...اصلا وصلت السن الشرعي من زمان
_يمة اشو انتة عكس الناس...من طبيت كلية المفروض شفت اشكال...
_قابل شفت
_مو دشوف البنات من يطلعن ...كله بناطير جارلس
وشعر
_وهذا حرام ...ماعدهن اهل يوجهوهن نصير مثلهن
تعاي فرحة خوية...
اني اخوج الجبير اسمعي كلامي...
معليج بحجي امي....المفروض نرضي ربنا..
والله فرض على البنية لبس الحجاب بعمر تسع سنوات..
جان من يحجي ينزل لعقلي عباله طفلة بعدني
_شو دكوللها اخوج
التفت على امه وخزرها...
_فرحة روحي خوية سويلي جاي
من طلعت سمعته...
_يمة شبيج...فرحة اختنا ...ربت ويانة
_يا يمة انة اريدهة لواحد منكم
_صدك تحجين هاي اختنا ..
ماسمعت بعد شحجوا....
بس بدت عمتي دائما تتعارك وية محمد...
ماعرف السبب بس اسمعها دكوله مرات
_يمة وينك وين هالحجي...هو ابوك كوة يصلي
مين طلعتلي بهالافكار
_يمة هاي مو افكار هذا دينا الحنيف..
وابوية ماكو واحد وجه على طريق الدين
_عوفك يمة من هالسوالف مابقى شي وتتخرج دكتور...
يمة لخاطر تعبنا انا وابوك....
محمد كام مايسمع اغاني مثل قبل...
ويوم عمي جابلنا تلفزيون اسود وابيض جان
ماقبل عليه...
ودائما صايم...وميقبل احد يتأخر عن صلاته...
لحد يوم جنت فوك انظف وسمعت بابنا نركعت...
وباوعت من المحجر عمتي ركضت لبست عباتها وفاتوا زلم لابسين مدني...
بقيت جامدة بمكاني
_وين ابنج
_خوية يا ابن
_محمد
_شبيه محمد بالسوك وية ابوه...
اشر لواحد وياه صعد ركض...اني فزيت ونزلت اركض ختلت ورة عمتي...
_هاي بنت حماج اليتيمة...
اني فتحت عيني...شعرفه
عمتي بس هزت راسها واحسها ترجف من الخوف
طلعت بيبتي تتوجى
_شكو يمة ذولة منو
_لا تخافين حجية عدنا شغلة ناخذها ونطلع
نزلوا الاثنين الفوك بيدهم كتب....انطوها للرجال الواكف يحجي...
_سيدي لكينة ذني
كلبهن ....بهالاثناء دخل محمد ...
اول مادخل راسا هذا اشر للزلم لزموا محمد..
وبدوا يجرون واحنة كمنا نصيح...
التفت علينا ...
_ماريد اسمع صوت ...مايصيرلكم طيب ترة
طلع وعمتي كعدت بالكاع ادك وتلطم....
_ليش يمة حمودي...ليش ضيعت مستقبلك...
مو كتلك عوف هالطريق
_عمة وين اخذو محمد
_شمدريني اويلي عليك وليدي...
نكلبت الدنيا بعد ماراحوا...اجى عمي...
واجوا اهل عمتي ...خابرتهم بهالفترة صار عدنا تلفون بالبيت...
ناس طابة وناس طالعة...
واني ماافهم شيصير ...
بس واكفة بالمطبخ اسوي جاي...
بس مرة اجت اخت عمتي يكولولها ام حسام
دخلت الجاي لكيتهم يحجون..
من شافتني
_اللهم صلي على محمد واله
هاي بنت المرحوم حاتم..
_اي خيتي الله يرحمه...
_ماشاء الله صايرة تشبه ابوها ...شكد عمره
_١٣ سنة
_حقج تخافين عليها...بعد محمد ماكو اخبار عنه
_لا والله خية ماخلينة
هسة شلون دبريني ام حسام...
عينة الكلادة مالتي راح ...
والنوب هاي المصيبة...
_والله ام محمد شكولج...بس واحد نادس عليكم
_ماكو غير الحية مرت كريم
_باعي خلي اكولج فكرة...
باعت علية...خالة فروحة الجاي برد جيبيلي غيره
طلعت اسويلها واني افكر من شنو خايفة عمتي
ومحمد منو اخذه ..
شفت عمتي وصلت اختها للباب ولبست عبايتها...
_عمة راح اروح لجارتنا ام حارث
ظليت افر باذاني شصاير هنا...
بالليل...عمتي جمعت عمي وولدها بالصالة...
وخلتني يم بيبتي...
ردت بس اعرف شيحجون...حسيت عبالك اني مو من عائلتهم ولازم ماعرف شيصير بينهم...
بعدها عمتي كامت تلبسني بيجامة جوة الدشداشة...
وتنيمني يمها فوك وتنزل عمي وولدها علي وحسين جوة...
_عمة شكو ليش ماتحجيلي ...
جانت تبوسني
_انتي بنتي الي ماجبتها...وامانة زهرة خيتي
وتسكت...
وبنص ليلة كشرة....فزينا على ركع الباب وصوت
عالي يصيح...
....وللحكاية بقية .