In Secrets (Montalban Gray - Cervantez Clash)

Chapter 24 Divided

Napailing ako sa loob-loob ko at lihim na sinisisi si Lily. So ito yung sinasabi niyang plano niya ngayong araw na 'to?

Mabagal akong napabuntong hininga. "Eh bakit nagalit si Asher?"

"Kinukulit ko nga kasi kailangan na naming asikasuhin yung para sa engagement party." Problemadong sagot niya. "Next month na yun pero parang wala pa ring nasisimulan. Kailangan ko nang sumakay ulit next week. Hindi kami magkatugma ng schedule. Yung pagdarausan ng party di pa rin yata maayos."

Napangiwi ako. Hindi pa man ako nakaranas ng mag-plano ng mga events, pero yung kwento ni Clary, parang nakaka-stress na at nakakapagod pa.

Nakaramdam ako ng awa at nakokonsensya ako sa nangyayare sa kanilang dalawa ni Asher, though wala naman akong kinalaman sa kinakaharap nilang problema ngayon. Pero knowing na napa-oo ako kay Lily kanina na tulungan siya sa plano niyang paghiwalayin sina Asher at Clary, I feel bad already.

She blackmailed me. Pagtatanggol ko sa sarili ko.

"Paano pa pag kasal na namin yung pa-planuhin namin? Ako lang mag-isa gagawa?" Malungkot na malungkot na patuloy niya.

Napatingin ako kina Asher at Brook na nag-uusap pa din. Para pa ngang ayaw makinig ni Asher kay Brook. Awang-awa naman ako kay Clary. Alam ko kasi yung story behind kung bakit hindi siya masasamahan ni Asher. Kagagawan ni Lily!

Isang malalim na buntong hininga ang pinakawalan ko. "Saan ba idaraos yung engagement party ninyo?" Tanong ko.

"Sa Batangas." Tugon niya. "Sa hacienda nina lola Alexandra."

"Eh yung food tasting saan yun?" Tanong ko pa.

"Random yun. Kasi nga mamimili pa lang kami kung kanino at kung anong menu ang ihahanda." Sagot niya.

"What?" Nabibiglang bulalas ko. "Next month na yung party tapos hindi pa pala na-finalize yung menu?" Di makapaniwalang tanong ko.

"Yun na nga eh!" Parang maiiyak na siya talaga. "Next month na pero parang wala pa ring nasisimulan."

"Eira." Makahulugang tawag sa akin ni Lily.

Napabaling ako ng tingin sa kanya, sinesenyasan niya akong pumunta dun sa kinatatayuan niya. Buti na lang nakatingin si Clary kina Asher at Brooklyn na hindi pa rin tapos sa pag-uusap sa bandang gilid, may kalayuan ng konti sa kinauupuan namin ni Clary. Umiling ako bilang tugon kay Lily.

Isang desisyon ang nabuo ko. "Clary." Tawag ko. Mabilis naman siyang nagbaling ng tingin sa akin. Nagtatanong ang kanyang mga matang nakatitig sa akin. "Kung okay lang sayo, ako na lang ang sasama sayo sa food tasting na sinasabi mo."

"Ha?" Naguguluhang sambit niya.

"Sabi ko, kung okay lang sayo, ako na lang ang sasama sayo sa food tasting na sinasabi mo." Ulit ko.

Namilog yung mga mata niya. "Really?" Di makapaniwalang tanong niya. Nawala na din yung lungkot sa mga mata niya at napalitan iyon ng pagkasorpresa. "I mean, okay lang ba yun sayo?"

Napangiti ako ng bahagya sa kanya. "Oo naman." Sagot ko.

"Hindi ba yun makakaabala sayo?" May alinlangang tanong niya.

"Hindi." Mabilis na sagot ko. "Isa pa, wala din naman akong gagawin."

Napangiti na siya sa wakas. "Oo. Okay lang sa akin na ikaw ang kasama ko."

Mas lumawak naman yung ngiti ko. "Pero ang tanong, marunong ka bang mag-drive?" Di naman na lihim sa kanya na hindi ako marunong magmaneho.

Natawa siya ng bahagya. "Oo. Wag kang mag-alala."