#لمة_بنات
#زهراء
10
زينب
انفزعت وشاغت روحي اجت تطلع من خشمي .. بهتت بعد ما اكدر اتحرك جمدت واني واكفه يم الباب واشوفلك ناهد. مربعة على سريري يم نعمان الي نايم على يمينة و وجهة عليها واديه تحت وجه. هو مطروح وكان مغمض مدري غافي ما ركزت المهم نايم يمها وهي تلعب بشعره وهو مثل المبتسم مرتاح اااخ
كلبي صار ينغزني . وهي انتبهت عليه بس ملحكت تصدر ردة فعل من سمعت صياح بروين
رجلية ركضن وحدن على الدرج ونزلت لغرفة خالتي لكيت ورد هم جاية تفرك بيدها وجابن ماي رشينا بخفة على وجها ، وبروين كاعد جوة رجليه تبجي واتكول
:- امي راحت ماما ردي ...
..................................
زينب بت ايمان :-
ركضت لفوك اشوف نعمان لان عثمان نايم بعده مكسر
زينب :- الحك علينا نعمان
ياربي نومه كلش ثكيل هالرجال موتني الا كعد اعيونه مطكطه
:- شكوو
:- امي امي نعمان روحها غابت تعال وياي الحكنا
طبعا اكبر غلط الواحد يصحي الواحد بهاي الطريقه حتى وان كان امر خطر حصل لازم اكعده برواق وبعدين من يصحى اتبلغة اني لا من خبصتي كعدته بهاي الطريقه اصيح وابجي .
كمز من وعى وركض لامي ..
دخلنا شفناها صاحية واجر نفسها كوة ..
نعمان :- يمة اشبيج حطن شي على راسها على ما اشغل السيارةة
ايمان كوة كالت : لا يمة . اريد انام ما كو داعي
تلهث جانت وكامت من الكنبة وانطرحت على السرير واحنه ساعدناها نورة ماتت من البجي اكثر وحده متأثر
واتحظن وتبوس بأمي كوة وخرناها عنها
نورة :- ماما خل نعمان ياخذج للدكتور اشبيج كوة تتنفسين
اشرت بأيدها رافضه
انطرحت التمينا عليها كلنا بناتها نورة حظنتها من خلف وانطرحت ابصفها وماما اندارت عليها وحطت راس نورة على ايدها واني يم رجليها ادكلهم من فوق الشرشف و ورد يم راسها من الناحية الثانية تقرة ايات
زينب ورجلها واكفين ،،ونعمان يحاول يقنع امي خاف بيها شي وهي اتكله لا ما بيه . اهنا دخلت مرت عمي وبناتها زينه ، و ناهد وكفت ابصف نعمان وكالت سلامتج خاله ..
نعمان :- نورة كافي
ايمان:- يمة اشبيج ما بيه شي
وهاي تبجي وامي حطتها على صدرها يكلك طفله عمرها شهرين ولا تكبر انوير بزر الكعده وبزر الشيب ابصراحه كلنا مونستها واحلى شي سوته اليوم من كتلت زينة فوخت كلبي لان وكفتها هسة مبينه مو خالية اتباوع لزينب وتوزع ابتسامات وزينب مثل السخان من يطلع بخار من يحمى واكفة وتعصر من العصبية بس ساكته .
زينب مرت نعمان :- نعمان تعال اريد احجي وياك .
راحت وهو ما راح خلفها وكف يم ورد وكال
نعمان :- اشوية وردة
وخرت وكعد بمكانها باس راس امه وكال
:- اشلون صرتي هسة احسن
:- اي ماما روح لمريتك
ربت على راسها وكام من يمها .
حسيت اكو نظرة خاصه بينه وبين ناهد من طلع !!
..............................
زينب مرت نعمان
كنت انتضره على نار ...اول مادخل كال
:- اشبيج شكو
كالها بمزاج معكر رديت عليه واني اباوع اله بنظرات إتهام
:- شعدها بغرفتك هاااا اشلون ادخل ناهد لغرفتي....
صحت
:- نعمان لوين وصلت بيكم الدنائة ولكم
