سندريلا عراقيه❤️

بارت الثالث

حنين:::

رجعو للبيت اني جنت محضرة العشه اشو همام ضايج دخل لغرفته وقفل الباب وعمتي ميعاد وميادة يتبسبسن وعمي ينفخ ويكول

ربي منك الصبر..

يااا ذوله شبيهم شصار هناك..بعدين من خلصت شغل دخلت انام يم ميادة سمعتها تسولف وية اختها سعاد وتكولها:
خطية همام معجبته البنية تردين الصدوك البنية مدحدحة..وشعرها محلو بس هية بيضة وملامحها ناعمة..عفت امي يم همام تقنع بيه؟؟

ومن خلال حجيهن عرفت انه همام مرايدها وعمتي تلح عليه..وفعلاضلت كل يوم تدخل لغرفته وتسولف وياه وبعدين سمعتها تهلهل وتكول:

اي يمه همام الله يفرح كلبك مثل مافرحتني

الصبح سمعتها تسولف ع الموبايل وهي فرحانه وتكول:

اي عيني..يجرالكم بيها خير وتدلل عروستنا.
وسدت الموبايل وهم كامت تهلهل طايرة من الفرح..والتمو عمامي ورة اسبوع وصارت المشية وتمت الخطبة بس اشوف همام مو فرحان يبستم للناس من وره كلبه..افكر والله خطية شاب مثلة تتحكم بيه امه وبحياته..حددو موعد للعقد..وعمتي كامت تشتري غراض وفتحت الطابق الثاني مال البيت ع اساس الطابق الفوك كله راح يصير لهمام ولمرته..واجه يوم العقد يركض..ركض..بس همام منسه هو وعدني اروح بالعقد فالصبح بيوم العقد دخل لغرفتنا وانطه فلوس لميادة كلها:

طلعي.. للسوك واشترن ملابس حلوة انتي وحنين اكيد امي راح تروح كبلج..فانتي بدلي انتي وحنين وتعالن ورانه..ميادة لتجين للعقد اذا متحيبين حنين وياج مفهوم؟؟

فردت ميادة:

اي همام بس اخاف امي متقبل وتسويلنه مشكلة؟؟

لتخافين امج ملتهيه ويه ام ميساء..تريد تخلص العقد شلون مجان واذا صار شي اني موجود جيبيها وتعالي خطيه خلي تشوف بشر وتغير جو..

فاني كلت:

همام..اذا تصير مشاكل بالعقد بسببي ماكو داعي اروح..روحو انتو.

واني انتظركم هنا؟؟

حنين كتلج ترحين يعني ترحين..

وطلع وعافنه..خطيه احس بي ممرتاح..بس..يحاول يكابر..المهم..عمتي ميعاد طلعت الظهر لبيت البنية فميادة استغلت الفرصة وطلعنا للسوك ميادة راحت ع محل فساتين يخبلن تلبس واحد وتنزع واحد واخيرا اختارت فستان كريمي..قصير وبيه شراشيب كلتلها:

ميادة الفستان قصير خاف يحجون عليج؟؟

ولج انتي شبيج عوبه هو عقد قابل فاتحة يالله تعالي خلي اختارلج فستان حلو..

لبستني هوايه..فساتين تكولي:

ولج شنو هذا جسمج يخبل مثل المرمر..كل الفساتين تخبل عليج والله محتارة شختار واحد يكول للاخ اني احلى منك..