بين نارين

جزء 1+2

الجزء الاول

محمد ،،،عمري 28 سنة خريج هندسة معماري من جنت بالجامعة مريت بتجربة حب لكن مانجحت وباءت بالفشل كنا شلة طلاب وطالبات من قسمنا وباقي الاقسام واحيانا من كليات اخرى تربطنا علاقات قرابة واحيانا اصدقاء طفولة او ناس تعرفت ع ناس وصرنة كروب مشكل من عدة مراحل واختصاصات جنت احب بنية تربية تاريخ وكانت اختها وياية بقسمي فتجي دائما مع اختها تبادلنا النضرات اكثر من مرة وحاولت اتقرب منها وهية بادرتني نفس الشعور كنت بوكتها مرحلة ثانية وهية اولى صارت بينة علاقة تلفون ومراسلة جنت بيوم الي مااحاجيها او اشوفها احس نفسي ضايع او ناقصني فد شي جانت احلى سنتين بعمري وحبيتها كلش
ناهد ،،،27 سنة من اول مادخلت كلية ومرحلة اولى وبعدني مااعرف شي عن الجامعة واجوائها جانت اختي تاخذني وياها لقسمها جانت علاقتهم كلش حلوة بعضهم وعبالك اخوة
جان محمد ذكي الشعبة مالتهم وهادئ وحباب عجبتني شخصيتة كلش وجذبني صارحني بأعجابة وبادلتة نفس الشعور
جانت علاقتنة كلش قوية وبيوم الي مااشوفة او احاجي جان مامحسوب بعمري
بس جان محمد فقير ومعدوم الحال يعني حالتة ع كدة يعني مااتذكر بيوم هداني فد هدية تسوة وبعيد الحب اطك شي يجيبة الية ورداية
جنت بالبداية احب هيج فيكات منة واحسها رومانسية بس بمرور الوكت كمت اكره حتى الورد وجنت اشوف صديقاتي وشنو يجيبولهم الشباب الي يحبوهم جنت اضوج وانقهر ع حالي بس مافد يوم صارحتة او حسستة بهل شي
كل بنية بينة تحب ترتبط بشاب مقتدر وحالتة المادية زينة حتى يكدر يسعدها ويوفرلها كل احتياجاتها ومتطلبات الحياة
تقدملي فهد من نفس قسمي وجان اطك شي بالقسم اللبس والسيارة والكشخة والعز الي عايش بي جنت اكرهة اول مادخلت الجامعة واحسة مغرور ومدلع نفسة من تقدملي رزلتة وكتلة مخطوبة هاي باول سنة
بثاني سنة جانن بنات قسمي طايرات وراه ويحسدوني لان تقدملي جنت مرات اقارن بينة وبين محمد بعدين اكول فدوة حمودتي ميجي لأظفرة هذا
بس بعدين كامت مواقف بسيطة تزعجني من محمد ونتعارك لاشياء تافهة واعوفة واروح
فهد ظل يحوطني بنظراتة ومقطع الامل كمت ابادلة نفس النظرات هو حس انو رائي بي تغير رجع تقدملي واني سكتت فكلي راح ادز اهلي ع اهلج هذا كلة ومحمد ماعندة ادنى فكرة عن الموضوع
اجوي اهلة وجانت والدتة امبينة جدية ومعبسة ومعاجبها الوضع كالت ماعندي الا فهودي على 3 بنات والبنات متزوجات وهو فرحتي بهل دنيا فميطلع بوحدة يعيشون ويانة واكيد حتجون وتشوفون بيتنة والعز العايشين بي راح ترتاح يمنا وتعيش معززة مكرمة
اهلي كالولي نصيب زين وميتعيب ومو كل يوم الوحدة تجيها هيج قسمة
اني صرت بين نارين ويلي محمد وحبة وغلاتة بكلبي وويلي فهد والقسمة الي مترفضها اي بنية ظليت افكر واتصل بية محمد حاجيتة واني مختنكة اسمع سوالفة واحس روحي مربطة ومااعرف شأسوي
جان والدة متقاعد وعايشين ع تقاعد والدة وبيتهم كلش قديم وبسيطين كلش

للكاتبة ميار الشمري
الجزء الثاني

محمد ،،،جان اسلوب ناهد وياية جاف وتنتر بكلامها سألتني شوكت حتخطبني استغربت من سؤالها حبي وينة ووين الخطبة حاليا
ناهد ،،،يعني شوكت ممكن مفكر تخطبني مثلا
محمد،،،حبيبي غير نتخرج ونأمن ع مستقبلنا بلكي نتوظف اثنينة ونكون نفسنا حتى ع الاقل منتعب ولا اطفالنا يعانون
ناهد،،،ضحكت استهزاء نتوظف!!! انت هم متأمل تتوظف بالعراق العظيم الخريجين تارسين الشوارع عطالة بطالة وانت تريدنا اثنينة من نتخرج نتوظف عود نتزوج الى ان امشط الشيب
محمد،،،استغربت من كلامها شنو الي غيرج ناهد مو جانت هاي احلامنا ومخططاتنا لو نسيتي
ناهد ،،،محمد تصبح ع خير تعبانة واريد انام
محمد،،،اوك براحتج بس ممكن اعرف شبيج اكو شي ناهد
ناهد ،،،لا ماكو شي سديت الخط ودموعي تنزل فتحت الجهاز وكسرت خطي ومسحت كلشي يربطني بمحمد وبجيت الى ان ورمت عيوني كعدت اختي نهاد وحضنتني
نهاد ،،،لتبجين حبي باجر تنسيه وتعيشين احلى عيشة وبعدين لتصورين السعادة هي بالحب ترة محمد ميكدر يقدملج ربع الي راح يقدملجياه فهد انتي اختاريتي واختيارج ان شاء الله صح محمد متأمل بوظيفة حتى اذا توظف شنو راح يسوي الراتب بعيشتنة الصعبة هاي وفرضا متوظف بعد ميتخرج ب5 سنين خوما تظلين على امل وتنتظرين وفرصج بالحياة تقل والدنيا تمشي ومتوكف على احد
ناهد ،،،حسيت حجي نهاد ريحني او اني كمت اقنع نفسي بي
محمد،،،ظليت 3 ايام اتصل بناهد جهازها مغلق مريت عليها لكليتها كالولي مداوم ماخذة اجازة خفت عليها وحسيت كلبي نخزني ماارتاحيت للموضوع رحت لنهاد وسألتها وكالت مابيها شي لحيت عليها
نهاد ،،،محمد شيل ناهد من بالك ماالكم قسمة مع بعض انساها وشوف حياتك والدنيا متوكف على احد
محمد،،،شلون ،،،شلون شنو هالحجي نهاد ؟؟
نهاد ،،،هاي الحقيقة الي المفروض تتقبلها ناهد خطوبتها الخميس والبارحة انقرت فاتحتها انساها وشيلها من بالك
محمد،،،صرخت انتي شتسولفين منو غصبها وبمنو ارتبطت احجي !!!
نهاد ،،،والله يامحمد محد غصبها هية اختارت ومثل ماكتلك هاي الحياة قسمة ونصيب رجاءا بعد لتجيبها بالطاري راح تصير على ذمة رجال ثاني وعافتني وراحت
محمد،،،حسيت كلبي وكف وبعد ميدك وفجأة صارت الدنيا سودة بعيني ماوعيت الا اني بالمستشفى كالو هبوط بالضغط ظليت بالبيت اسبوع بس تحطمت وحسيت بعد ماللها هالحياة اي طعم ميار الشمري
ورة الاسبوع جبروني اداوم لان فاتتني امتحانات وكثرت غياباتي رحت داومت ورجلي اخذتني لكليتها ماشفتها ظليت افتر وحدي بالجامعة الى ان خلص الدوام وكفت بالاستعلامات انتظر الخط واشوف ناهد تقدمت احاجيها مكدرت جانت مخلية ايدها بأيد طالب بقسمها جانت حتى تضوج منة وتحجيلي عنة شكد يتفيك جانت تضحك هية وياه وركبت ويا بسيارة طاكة عرفت هية ليش غدرت بية وباعتني قررت من لحظتها اباوع لنفسي ولمستقبلي واشيلها من بالي وشكد ماجان مستواي زين ثابرت واجتهدت اكثر حتى احقق طموحي وصح الحياة ماراح توكف لا على ناهد ولا على غيرها
ناهد ،،،انخطبنا اني وفهد وجانت خطوبتي تخبل والكل حجة بيها جان ينثر علية فهد ميخلي من هدايا وفلوس ومخلي بس جان بارد فطير ومو رومانسي مااعرف ليش جنت اقارن بينة وبين محمد جان محمد حنون ورومانسي كلش يمكن لان مارة بقصة حب قبل هيج دأحس حاولت اقنع نفسي بي وجان المقرر من نخلص المرحلة الثالثة نتزوج
جنت اسأل نهاد ،،،محمد مديسأل عني شو حتى مااجاني ولا استفسر
نهاد ،،،لا عيني لا سأل ولا شي هذا سجاج عيني بكتبة ودراستة بحالج هو تعاي شوفي شلون رجع مستواه احسن من قبل ،،،،وجنت اكول بقلبي ميفيد الحجي اذا اكلج سأل وتأثر وظل اسبوع ميجي مابيها اي داعي وانتي صرتي ع ذمة رجال ثاني
ناهد ،،،حسيت تأنيب الضمير اني تركتة بدون اي مقدمات او شي خف عني كلت شلون باعني بسرعة وماسأل بية لا ومستواه رجع احسن من قبل اي مو جنت اني الي مضيعة وكتة وشاغلتة شلتة من بالي واقتنعت بقسمتي
تخرج محمد ونهاد بس مكدرت اروح حفلة التخرج مالتهم حتى مااقابلة ولا التقي بي بس شفت صور حفلة التخرج وجان حالة غير حال وممبين عليه متأثر حقدت علية وبعد حتى ماافكر بي
بالعطلة اتزوجت واختي نهاد تزوجت بعدي بأشهر
ميار الشمري