صوتك
************
صوتك ندهني او مو حلم وفزيت من نومي
وكَلت..
مو صدكَ لايمكن صدكَ!!
والروح وي صوتك مشت
وناديت
والخطوه ابعدت..
والصوت وي مشي الجدم *من ينلحكَ.. ما ينلحك ..
وعالأثر نمشي اعله الأثر..
والشوكَ سابكَنه سبكَ
والكَلب لم روحه واجه..
ودكَاته احسهه بلا وعي..
مو مثل يوميه يـــدكَ !!
* * *
ويم بابك وياحيرتي مدري اشندهني وجابني؟!!
وحتى نسيت اشلون
عالباب من ادكَ؟!
* * * *
ظنيت ما اشوفك بعد من شفت
ضويات الدرب يطفونهه
شما تعتلكَ
* * * *
ومن شفت شتلات الفرح.. مات الفرح ومثلمه
والحزن صار اسنين ياكل بالعــــــــركَ
****
ورادوني مااشوفك ابد.. ضمو تصاويرك علي
واعلنو لازم نفـــتركَ
* * * *
وشالوك حتى من الحلم!!
وحلمك يجيني بلا صور
وبـلا خلـــكَ
****
ولمن افز.. يبجي الحلم.. واثنينه اعله الروس
نتكَابل ندكَ
ورادوني مااشوفك ابد.. والعين مثل ام الولد..
وانته الولد
لمن اجت ..ماشا فتك ..الجفن صار الزيج
كَامت بيه تشكَ
وياحال من بعدك عشت غصن وخذوني من الشجر
وذبوني يم نار الهجر..
واليوم باجر احتركَ!!
* * * *
وعشت بطركَ روحي وسوادين العشكَ
واسأل عليك وتيهت… واسأل منو ..
وبيمن اثق؟!!
* * * *
وانسدن بوجهي احس كل الطرق..
والكَه الأسأله وكيفت
والكَاهن الجلمات ويضيع الحلـكَ
* * * *
وخلني اسولفلك بعد.. ياواهسي وغيرك منو؟
والروح اجت مسودنه..
واشبكَهه وي روحك شبكَ
* * * *
لاتبجي اطيح ويه الدمع ..والروح اسويهه نفس
ومناشغ اشهكَني شهكَ
* * * *
وبريتك يا ريتي ولمن اصيرلك نفس
لاخنكك ولا
اختنك
