شمشتاگلك يابو العيون الما يطيحن كحله
مخليني مثل الظل عدل وحده ويموتون اهله
هسه انت مارايد تجي خليني اچذب ع الخلگ
مو ياهو ليسألك علي وتگله ما ارجعله
شسويت بيه بفرگتك ؟ يميزوني گمت من الوجع دمعة يتيم بحفله
عندك علاقه ويه الدوه ؟ تكرهني وموصي علي ؟
جربته كله بغيبتك والعله نفس العله
غرگان واني بغرفتي والماي ما طخ ثوبي
ما اختلف ع البالجرف بس هو مخنوگ بنهر واني بصور محبوبي
من چنت اجرحك تقترب معجب چنت بسلوبي
واني ادري ليش اتغيرت جامد وما انحب صرت من صلحيت عيوبي
وكل الرسايل خلصت وديتلك حبر ابيض
امسح الغثك واقتنع زين انت بس صوچ الحظ
وارجع .. ارجع واذا عودي كبر ؟
لتگول متعافي ترى مرات من كثر الوجع چتف البنادم يعرض
وتسولف الهم ع الوفه واني ابو خدود الثكله
يبين چذبها من الصدگ الأحباب لمن تفترگ
واحد يخبل ع الهجر واحد يخوف شكله
شگد ناس تانتني ومشت
الماي صبح غيم واني انتظرك رادوني روجه وما رحت
وبقيت ملح ابرك يل تارس ضلوعي فشل 💔
شگد چنت محتاج انحظن من باوعتلي بظهرك
بين الگلوب الفارگت لدروب شمرة نيه بس انت شيجيبك علي
بالشوك ماعندك عرف خاطر تهم بالجيه
البلبل المتربي بقفص ما يغث روحه على الغصن ما فاهم الحريه
شناقصني ما ادري المهم بجفاك الي يباوع علي من كيفي احس بالفشله
امفشلني مثل البالحرب ايجازونه حسباله نصب
تاليها بديار الغرب حاير يظل بالبدله
من الدنيا طبيت اشتري وشفتك وما گلت السعر
بكلشي اشتريتك بالنده بروحي بصفار اوراقي
لگطه ورگض بيك ارگضت وباقيلك تصيح علي
بس اني من كثر الفرح ما خذت منها الباقي
يمدني روحي اعلى الگبر جيتك محمل عافيه ورديت بس باخلاقي
ومن بعد كل هذا صرت وحداني
وذوله اليمدحوني گبل صحبانك وصحباني مابيهم الگلك شلون تخونه ؟
الخلاك تنسه مرايتك وتمشط اعلى عيونه
بس هو مو صوچك ترى الگلب يتمرگص ع اليأذونه
يا گلبي دگلك ثايه الوادم تراها تشيطنت يلنيتك مصلاية
مثل وياهم من تحب واحسب الكل حچايه گلهم نمت من العصر
مشغول والگالك عذر الملهوفلك گله انتظر
بس تضعف يعوفك ترى اليرگض وراك هوايه
وانت .. انت ويه ربك عايفك رب .. ويحن ع العايفه مو على العايف خله
شيسامحك واني انتچي ما رجعتني امشي عدل
عملة فراگك عمله يومين حاسبهن وانه ما چن اعرفك من سنه
چنك بالاول صاحبي وگاظيها نفس الرحله
شمشتاگلك يابو العيون الما يطيحن كحله
رائد ابو فتيان
