ضحايا_١٥
#زينب_الموسوي#
بدت عمليات تغيير لوجهي استمرت ثلاثة اسابيع عانيت فيها الالم والالتهابات بالوجه
شفت وجهي بالمرايا اول مره
ليش هالگد وجهي وارم وانس اذا شافني مراح يعرفني
غلطانه الي يدقق بيج يعرفج وهذا الهدف الي يشوفج ميعرفج بالبدايه تمويه يعني
والله لو اموت ولا هذي العيشه اذا رجلي ماحبني بهذا الشكل
باوعيني رجال عراقي ميحب وحده شابه عيونها ملونه خدودها تفاحه
حنكها ضامر ودبدوبه اذا لگيت شخص ماحب هذي المواصفات الا اصعدج للقمر بعد شتريدين
انتي تتصورين الرياجيل ماعدهم گلب وميحبون
انس حبني بشكلي القديم واني على الحدود ومبهذله
وهسه راح يحبج بالشكل الجديد
خايفه لايطلع متزوج هسه وحده المانيا
لاممتزوج بعده عمليات مخلصت
شمدريج انتي بيه
متابعين اخباره بعد اسبوعين عنده عمليه اخيره ويخلص ورجله الثانيه ديعالجونه طبيعي ولساعه يعرج
سوده عليه كل هذي العمليات راح اموت بس اشوفه هم حجيتوا وياه عليه
لسه في ولد لبناني من طرفنا راح يمهدله الموضوع
وهذا الولد ثقه اخاف يفضحنا
الولد ميعرف شي كل الي راح يسويه يبلغ انس زوجتك تريد تتصل بيك لاتگول اسمها گول نغم وانت محمد لاتساله شنو الصار
وبعدين شلون
من يوافق ونتاكد مراح يحجي تتصلين. بيه وتحجون عن المعامله كزوج وزوجته اي تفاصيل ثانيه من تلتقون تحجون بيها
يمتى اتصل بيه
بالوقت المناسب الولد اول يريد يكسب ثقته
اوووووف شوكت يجي اليوم ونكون سوا ياربي وحقك تعبت
بعدها غادرت ولاية واشنطن لولايه ثانيه مراح اذكرها هنا وبديت حياة جديده معي راحت ام وليد بس تتاكد من خطواتي صحيحه
هذا التلفون بيه رقمي ورقم كل الي تعاملتي وياهم بس مسجليهم بغير اسماء تتصلين للضروره مراح نتركج التواصل بينا موجود ادري راح تسالين على انس
لاتتصلين هسه اني انطيج خبر
فدوه استعجلي والله هسه راح يموت حتى يعرف اخباري
الولد الي من طرفنا حاول ياخذ معلومات منه مگدر ساله متزوج مجاوبه كنت متزوج بالعراق مجايب سيرتج
ليش شنو نساني لو عباله خنته وميريد الناس تدري
احسن معناها محد يعرف شي عنج وعنه
اكيد متصورني طعنته وتركته
لاتبچين نغم وتفائلي خير زوجج مريض وديتعالج الله يكون بعونه
شعجب اليوم تحجين عنه بالزين
حجي قبل كان مقصود حتى تشهدين
ومتتراجعين
اذا تحبين تساعديني اختصري الزمن حتى اشوف انس
انشالله لاتنسين اسمه فؤاد ابو محمد
مرت الايام بترتيب وضعي بديت افهم الحياة هنا اخذت سياره زغيره عمل كان موجود الي بمطعم ايطالي سمحولي اكون علاقات مع ناس اكثرها باطار العمل مع امريكان احجي انكليزي بس مو مضبوط أمشيه حالي بعدها تركتني ام وليد وصتني كوني حريصه على حياتج وحياة الي تحبيهم
اگدر اسوي بيج على الفيس واطلب صداقه انس
انتي قدري الامور شوفي خطر عليكم لو لا وخلي بالج انتي ادليتي بالشهاده من امريكا يعني العصابه يعرفون الشاهد عايش هنا وتحت رعايتنا والدكتور روسي حكومته عدها مخابرات قويه احسبيها زين
فاض بيه بعد مااتحمل
ارجع يوميه للبيت الساعه اربعه العصر اگعد بشقتي اكل واتفرج تلفزيون مرات اروح للاسواق اشتري حاجات انولد عندي خوف من الكل من اطلع اي شخص يباوعني اتصوره يراقبني
من انام اسمع صوت افز اخاف احد بالشقه
صاحب البنايه مره دااطلع سالني ممكن تنطيني المفتاح اريد نعالج الشقى من الحشرات
لا ماانطيه الشقه مابيها حشرات واذا بيها اني اعالجه
من الخوف بالشغل بس افكر هسه دخلوا شقتي رجعت للشقه تركت الباب مفتوح ودورت كل جزء بيها اخاف في احد قفلت الباب بعدين وجريت القنفه على الباب
ومع ذلك ماحسيت بالامان الرعب الي كنت عايشته نساني التفكير بانس
وفقدت الامان بحياتي
بعد مده صاحب البنايه گلي
تحتاجين شريكه بالسكن تساعدج بالايجار
لا مااحتاج اني احب الوحده
انتي متزوجه عندج صديق
بلي متزوجه
مع الاسف كان صرنا اصدقاء
بعد مااتحمل طلعت الشغل اتصلت بام وليد
اني جايه ابقى عندج لحد تجيبون رجلي
ليش شصاير
في ناس تراقبني ومااگدر انام اليل
متاگده من هذا الكلام
متاكده وهسه راح اصعد الطياره وارجع
لا تعالي بسيارتج بالطياره يعرفون وين رحتي لاتركين اثر وراج
اوكي رجعت على الشقه لميت اغراضي البسيطه وطلعت بالسياره
رحت على بيتها تلگتني بكرا من الصبح تغييرين السياره اخاف ملاحقين خطواتج
عفيه الى متى ابقى هذي حياتي مهزومه
اليوم اجتمع مع دي ومدرائي نشوف فكره جديده
بقيت يومين عدهم قرروا ان يخلون مراقبه عليه لفترة معينه ويتاگدون ان اذا في احد ملاحقني
صرت حتى من امشي بالشارع اتلفت وحتى الي يگلي هاي اشك بيه
لحد يوم انهاريت رحت دخلت على المقر الي بيه ام وليد
سويلي حل انتم عايشين حياتكم واني ادمرت هسه اتصل بانس وروح عنده لالمانيا
اهدي اهدي تعالي نشوف دي
رحت على دي
نهايه كل هذا شنو وعدتوني بالامان ومشفت امان وعدتوني تجمعوني بزوجي ومشفت اي تقدم بالموضوع
ست نغم الحمايه عليج اگدت مافي شخص مراقبح كلها اوهام شخصية عشتار انمحت انتي وحده جديده صاحب العماره كان يتصرف طبيعي
وزوجج اليوم باليل تحجين وياه
صدوك تحجي اتصل بانس اقصد فؤاد
باليل تتصلين
صار الليل
اخذوني للشارع هذي شريحه التلفون تتصلين بزوجج عشر دقايق وتگطعيه تبدلين الشًريحه بهذي الثانيه عشر دقايق وتسديه وبعدها الشريحتين تحرگيها
اسمه محمد وانتي نغم هو عنده علم ودينتظرچ
رحت على سيارتي وگعدت بيها
متردده اتصل اصابيعي ترجف شراح اگول
اللهفه عندي اقوى من الخوف اتصلت رنه وحده شاله گال الوو بصوت عالي ورديت الووو وبچيت واسمع انفاسه
اتمنى اكول اسمك ومااگدر
وين چنتي
ضعت بس ماتيهتك وماخنت ولافرطت گتلك قبل لااروح اني مرتك وابقى مرتك
احجيلي لاتخليني وسط اسئله مالها بدايه ولانهايه
هسه مااگدر احجي خلي التفاصيل والعتب واللوم لحد نلتقي وتعرف كلشي بس صدگني ماخنتك ولانسيتك
الصار اكبر من تحملي فوگ طاقتي
گولي اي شي يريحني عفتيني لااني ميت ولاعايش ولچ القبلچ من رادت تتكرني گالت ماختفت بين ليله ويوم
لو اگدر احجي حچيت بس شي اله علاقه بالماضي الي اجيت منه اكثر مااگدر اوضح
شوصلج لامريكا تزوجتي هناك وطلعتي صح
فدوه لعينك اترك هذا الحجي شلون اتزوج واني زوجتك حبيبي
حبيبچ ها طفل اني ودتقشمريني مختفيه تسع اشهر وجايه هسه تكولين حبيبي
حقك ماالومك الي صار لايتصدگ ولاينعقل اذا عصبي اسد الخط واتصل بعدين
لا تسديه وجاوبيني اريد ارتاح
بيوم من الايام راح اجاوبك عن كلشي انت حجيلي اخبارك عندك اقامه بالمانيا
لا ماعندي العراقيين تارسين الكامبات وسقوط الموصل ضاعف اعداد اللاجئين وفي معارضه داخل المانيا ترفض استقبال اللاجئين
اني قدمتك معامله وانشاالله تجي يمي ونجتمع مثل قبل
مااجي اذا مااعرف كلشي ويامن رحتي
انشاالله افهمك بمرور الايام
سكت محجى
لاتسكت فدوه لعينك احجي گول اي شي
انتي احجي گولي شي يخليني اتاكد بعدج الي ومحافظه على الوعد
وعيونك الاغلى من روحي ماصرت لغيرك حتى بالاحلام ومنتظرتك وانام واصحى على سيرتك اسمك من اگوله تنزل دموعي مشتاقتلك مثل شوگ ام مضيعه الاولاد مثل غريب ويحلم بكلمة وطن ميته بدونك والله
الخوف والغربه والتعب كله يهون بس فراگك ماهان ظل ياكل بروحي
كافي تبچين موتيني
حاضر راح اروح واتصل بيك فد شويه
اني اتصل بيج
لا اني اتصل
غيرت الشريحه الثانيه ودگيت
ليش غيرتي الرقم
لاتسال وتدوخ روحك احجيلي عنك حياتك
ماشيه دااشتغل بدون علم الدوله واتعالج واتواصل واي اهلي
مسالتيني على العمليات لو ميهمچ
مااريد اعرف العمليه مراح تغيير من حبي الك
خلصت عملياتي ومابيه شي هسه
الحمد لله ربي يحفظك من كل سوء
راح تخلصيها تبچين اليوم
خلص سكتت مراح ابجي
بعدچ تبچين خليها دموعج لحد نلتقي واضربج كم ضربه على الي سويتيه بيه
متسويها اعرفك
اريد اشوفچ افتحي كاميرا
ميصير اول اسالهم
منو همه الي تساليهم
عمامي وخوالي غير
ها طلعولج عمام وخوال واني ماادري
ئي طلعوا عشيرتي الها فرع بامريكا ومااتصرف شي اذا مااخذ رائيهم
وشيخ عشيرتكم منو
اوباما غير ليش متعرفه
فادي منين يعرفچ
يافادي الولد اللبناني جابلك اخباري
بلي هو منين تعرفيه
عمامي دزوه عليك يفهمك بس لاتحجي اي شي اله لان مجرد واسطه
هو اني تعرفيني احجي
ظلينا نسولف بين العتب واللوم والشوق انتهت المكالمه نزلت من السياره رحت على جماعتي بعدهم ينتظرون
هسه شراح تسوون
تخلصي من الشراىح ومنا وجاي اتصلي بيه من رقمج عادي بدون متحجون عن تفاصيل شي
نگدر نفتح كاميرا من ارجع للشقه
تگدرين فقط كوني حذره بالكلام
والمعامله شوكت تخلص ويجي يمي
هذي شغلتنا لاتدخلين بيوم نتصل بيج نخبرج فؤاد جاي
يعني شگد تقريبا
بين ثمانيه وست اشهر
هوايه والله
اصبر بس اصدقوا ويايه والله بعد مااتحمل
مقدرين صبرچ والخدمه الي قدمتيها لهذا البلد وشهادتج بالمحكمه انقبلت واجراءات الحكم ماشيه روحي على شقتج واتصلي بزوجج واستعيدي حبه
اوكي رايحه
وصلت لشقتي اتصلت بانس
ها ابو محمد نمت لو بعدك گاعد
حلو هاي ابومحمد بعدچ تتذكرين
ليش انت نسيت
ولا يوم نسيت وانشالله نلتقي ويصير محمد
سكتت مارديت
ليش سكتي تعرفني استحي من هذا الحجي ولچ تستحين مني ياما انتظرنا وتحملنا وتحسرنا
اگلك اگلب صفحه عوف هذا الحجي لوقته راح ادزلك صورتي ها بس شويه اني سمنانه وبعدين نفتح كاميرا
يله دزي منتظر
دزيت الصوره گلي
هذي مو انتي شنو هاي
متاگد مو اني هذي العيون الي حبيتها مو هي والشفايف ياما بوستها والرگبه الي تركت اثار عليها باوع زين ابو محمد شويه الوان وكم باوند سمنانه
الحنچ متغير ليش كنت احبه
مضطره مو بيكفي والله يله افتح كاميرا اشوفك وتشوفني
فتحنا كاميرا ظليت اصرخ واكمز مااعرف شلون سيطرت على نفسي مكلت اسمه مديت ايدي على الشاشه ودي المسه وبچيت وضحكت
انتبهت عليه هو يباوع بدون ميحجي
ومبتسم
فدوه بعد مااتحمل اريد اكول اسمك يابعد اسمي ورسمي
متغيره هواي بيج شبه من قبل بس قليل والخبالات هذي جديده كنتي عاقله
والله تخبلت لان مامصدكه انت گبالي واشوفك انت صاير گيمر بليه گشوه فدوه
هو الي اخترع الكاميرا مااعرف يخترع شي ثاني يخلينا نطلع منها ونصير سوا
ئي والله ياريت
مابقى موضوع محجينا بيه كلشي كل حبنا وحزنا وعواطفنا ادلينا بيها عيونا مارفعناه عن بعض بس بالرمش ادينا توصل للكاميرا وترجع كلمة احبك واحبج تجاوزت الارقام القياسيه
للسبعه الصبح نحجي
اندگت الباب ودعته ورحت شفت منو
ام وليد شبيها عيونج وشعجب اليوم تضحكين
سهرانه طول اليل ويه حبيبي هسه سديته
وبشري انشاالله العمليات بيها امل لو راح تخلصوها سوالف وتطبيق ماكو
حتى لو راضيه بس على عنادج عملياته ناجحه وكلشي مابيه وگلي بس يوصل نسوي طفل
ها بيها الخير عيني هذي الشقه لازم تركيها لان مو النا لولد مسافر وراح يرجع
في شقه قريبه مني وتشتغلين من اليوم مع المنظمات اللاجئين هذي المنظمات امينه ومحميه
هسه ابدل وانطيني العنوان اروح
بين ماابدل كانت تستفزني بكلامها وتكلي تلگين رجلج هسه ويه الالمانيات وانتي ذابحه روحج عليه
ام وليد اتمنى اعرف شنو قصتج انتي هواي حاقده على الرياجيل اني بيوم من الايام كنت مثلج بس انس غير فكرتي وخلاني احب واصدگ بالحب
تريدين تعرفين قصتي تزوجت عن حب وبعد اربع اشهر اكتشفت خيانته كان استاذ جامعي سامحته بعدها بسنه اكتشفت خيانه ثانيه سامحته بعدها كنت راجعه من سفر لگيته ويه بنت عمي بيتي وافراشي
بلغت عنه وعنه فضحتهم اثنينهم اخذت صور اله والها دزيتها لزوجها ونشرت صوره على موقع الكليه تخبلت ماعرفت شسوي شهور والناس والجامعه تحجي بقصتي وحتى الجرايد نشرت الخبر تطلگت منه ورجل بت عمي ضربه طلقه وهو طالع من المحكمه ومات ورجل بت عمي دخل السجن وبت عمي لحد الان منعرف وين حطمت حياة ناس هواي بعدها تركت امريكا واخذت ابني وامي واشتغلت بالمخابرات ورجعت قبل فتره بين مالناس تنسى
اويلي الله يساعدج بس انتي غلطانه اول معرفتيه خاين المفروض اتركيه
والفضيحه الي سويتيها مالها داعي معتبرته جوراب قديم وشامرته بالزبل وخلص
وتريديني اصدك بالحب وقصصه
راح يجي يوم يدخل رجال لحياتج ويغير افكارج
عندي رجال وليد ومااحتاج غيره
الله يخليه الج
رحت على الشغل وبديت العمل وياهم وانتقلت الشقه جديده وبديت ارتبها على امل اجتمع بزوجي
