ضحايا٨
#زينب_الموسوي#
بقينا يومين اشوف ناصر متضايق ومتوتر
سالته ناصر اشو مو على بعضك خير
ابو خليفه مقبل تطلعين مع المجاهدات
ليش مقبل ومنين عرف
تعرفين ليش مقبل وهو الي يختار
الاسماء بس عندي خطه احسن راح نطلع مهمه قتاليه وهناك اقتله محد يدري.هي مواجهات تصير حوسه
كانت هذي خطة ناصر وطلعوا للمهمه صابني الخوف والتوتر اتمنى اخلص من كل هذا وماادري شلون بيومها توجهت لرب الجلاله يدري ماعندي سند بهذي الدنيا وفقدت القدره على التحكم بمسير حياتي
كل تفكيري كان بالطفل الي جاي شنو مصيره وتوسلت بربي يارب هذا الطفل مالها ذنب خلصني لخاطره يارب بتت الليله واني خايفه الصبح انطرق الباب كان نساء اثنين ومعاهم ابو خليفه
بشراكي لقد فاز ابو براق بالجنه استشهد البارحه وهو يقاتل الكفار
تضاربت ردود الافعال عندي وتذكرت قول الله تعالى من قتل يقتل ولو بعد حين
تماسكت وبكيت مو حزن على ناصر لكن على المصير الي اختاره وخلاني ضحيه لغبائه واجرامه
بعد اسبوع اخذوني للمضافه وجتي ساعه المخاض ولدت بنت في حياة مبهمه سميتها غربه لكن الباقيين سموها براق مثل ماكانوا ينادون ناصر ابو براق واثناء رضعاتها حسيت ان هي مريضه اخذوها بنات. للمستشفى لان اني كانت عندي حمى النفاس رجعوا خبروني عدها اضطراب بدقات القلب
ومافي علاج الها
اي علاج عشتار وين تتصورين نفسك بعدها زارتني مرى اسمها حليمه وخبرتني ان ابو خليفه اختارني زوجه وهي جايه تعدني للزفاف
اي زفاف والعده مخلصانه
عدة الحامل الارمله حتى تضع حملها
لابشرفج هاي وين لگيتيها
يجب ان تتحدثي الفصحى فابو الخليفه جميع زوجاته يتحدثنا الفصحى
ليش هو كم زوجه عنده
استعدي سااخذك غدا
حاولت افهمها مفتهمت والكل كان يخاف منه
طيب اريد اشوفه لابو خليفه واحجي وياه ممكن
نقلت اله طلبي واخذتني اشوفه بيته
مشيت واني ارجف يارب ميتقربلي هذا الكلب يارب اخلص
وصلنا البيت مليان اطفال ونسوان
دخلت للغرفه استنهضت كل قطره شجاعه عندي سلمت عليه رد عليه وجاوبني
ارفعي النقاب فانا لم اراك الا مره واحده في المستشفى
شلت النقاب واني هم شفتك مره وحده بالمستشفى
تبارك الخالق ستكونين اجمل زوجاتي
اني من يوم الي شفتك مشغوله بيك وزوجي المرحوم ياما حجالي عن بطولاتك وتمنيت التقي بيك وسعيده اكون زوجتك لكن عندي شرط واحد
اشرطي لك ماتريدين
اخلص العده الحداد يله اتزوجك احنا مسلمين
لقد انتهت عدتك بعد ولادتك الا تفقهين امور دينك
انتظرني اطلع الاربعين بعد شهر ونتزوج
شرط صعب لااستطيع الانتظار
اني هم صعب انتظر لكن مريضه
موافق ولي شرط ان تتعلمي الفصحى في هذا الشهر
سهله ياابو خليفه اتعلم من اجلك
عودي للمضافه ونتزوج بعد الشهر
انشاالله طلعت ممصدگه نفذت بجلدي اخر شي افكر بيه ارتبط بمجرم ثاني
بالمضافه خططت خلص انهزم واذ قتلوني اخلص من حياتي عرفت في بنيه تهرب بنات مقابل فلوس
انتي مهربه قبل بنات
لا لكن اذا تريدين استطيع اهربج
شلون تهربيني
هذا شغلي تريدين لو لا
اريد واليوم قبل باجر
لديك مال
عندي ذهب ومجوهرات
خلص في يوم تطلع النساء للتسوق
مااگدر اطلع حليمه ابو خليفه موصيها تقضي حاجاتي بدون مااطلع
ادعي بنتك مريضه ولازم تاخذينها للعلاج
وبعدين شيصير
اني اخبرك بعدين
واجى اليوم للتسوق لبست كم قطعه ذهب والباقي خليتها بملابسي وطلعت بحجه بنتي مريضه معي المره المهربه دخلنا المستشفى وبعد نص ساعه اجتي سياره صعدتني بيها
انطيتها گلاده كنت البسها
السايق كان شامي فهمني راح يوقفوك بالسيطرات تجاوبين رايحه لاهلك لان ابوك مات وانا اخوك وحاولي تغطين الطفله
حاضر
وصلنا سيطره داعش فهمهم طالعين لحمص ابونا مات وهذي اختي
غطيت بنتي تماما وطلعنا الطريق كله بين العايشه والميته اخاف اباوع من الشباك وكل شويه اسال السايق ماوصلنا بعد شگد فدوه امشي سريع
وصلنا لمنطقه قريبه من مخيم لاجئين سوريين قريب من حدود تركيا
نزلني على مسافه وخبرني اركضي على المخيم واصرخي حتى يدخلوك قبل الليل
انطيته خواتم اثنين اعذرني اخي ماعندي فلوس
روحي اختي بالسلامه
اخويه يعني خلص طلعت من الرقه بعد ماكو داعش
خلصتي اختي صيري ذكيه وادخلي لتركيا لاتظلين بالمخيم ظروفه صعبه
مامصدگه خلص الكابوس راح اكون حره واعيش اني وبنتي بسلام ويمكن الكه اهلي
نزلت امشي ويه كل خطوه ادوس على المراره والالم الي اعيشه معقوله بعد ماكو دم وقتل وموت وحشيه واجبار على المعاشره وضرب واهانات وبشر تتگطع اشلاء
وصلت على حدود شلت النقاب اريد اصدگ خلصت اريد اشوف السمى اشوف اديه ماعليها دم ومشيت اتعثر الجو بارد بس دموعي ساخنه كانت في خمس عوائل سوريه و٣شباب عراقيين
واحد منهم معاق رجله والحدود مغلقه وميفتحوها دائما بقينا خارج السور صار الليل وبدا الخوف خلص حليب غربه وبدت تصرخ كان عمرها ١٤يوم گعدنا بالارض هذي العوائل فرشوا كانوا حاسبين حسابهم وانطوني حليب وبسكت اليه البرد كان مينوصف الشباب العراقيين جمعوا حطب واوراق وشعلنا نار تجمعنا كلنا غرباء يجمعنا الضياع
وامل بيوم افضل بدينا نتعرف واحد على الثاني توقعوني شاميه لكن من حجيت عرفوني عراقيه حجى الولد المقعد اسمه انس من بغداد وصار سنين بسوريا كان يتعالج من اثر تفجير انتحاري بالعراق وامه وياه ومتوفيه محاصرهم داعش ومهزومين مع اصدقائه سعد وماجد واصلين هنا سالوني منين انتي اختنا
عراقيه من بغداد اسمي عشتار وهذي بنتي غربه
وزوجج وين
مات بالقصف (ماحجيت شي )
وانهزمت من داعش رادوا يقدموني للجهاد
انس ئي هذا اسلامهم الجديد البنيه يموت زوجها يقدموها للجهاد
هسه شراح يصير اخاف ميدخلونه واني بنتي بدون حليب ومريضه قلبها ضعيف
انس لاتخافين يدخلونه بس اول يذلونه وانتي گولي كنت مختطفه عند داعش حتى تدخلين لتركيا مو تبقين بالمخيم
ها وانتم تدخلون
سعد ندخل راح نكول مرضى وهذا اخونا معاق وماعنده غيرنا يداريه
انس عندچ احد بتركيا
لا ماعندي
انس لعد ابقي ويانا لاتخافين انتي عراقيه شرفنا ومنا وبينا
ظلوا يتذكرون الايام الي مرت عليهم
والسوريين بدوا يغنون
اكتب اسمك يابلادي عل الشمس مابتغيب لامالي ولااولادي على حبك مافي حبيب
نزلت دموعنا احنا العراقيين خلصنا عمرنا نبچي عاى وطن ماتهنينه بيه ولا بدونه
انس باليل تمرض وصخن وظلوا يسووله كمادات وظل يهذي يصيح يمه يمه
خنگتني العبره واني اسمعه وتذكرت امي
