كمل غسان شقته الجديدة وكانت ولافي الاحلام أثثها بأحلي وأرقي أنواع الاثاث وجبس وديكور... ووفر فيها كل وسائل الراحة لعيون حبيبة القلب نيروز...
وجي اليوم المنشود يوم زفة غسان...طول فترة العرس كانت فجرية مسكرة عليها شقتها وتسمع في الزغاريط والغني وقلبها نار وحالتها مايعلم بيها الا ربي.....
تبدل لراسيل وأوس اللي أصرت حناهم أنهم يحضرو عرس بوهم...
راسيل: ماما....عرس منو هاذا !
فجرية تحاول تبان طبيعية : هاذا عرس بابا
أوس: ومنو العروسة انتي؟!
فجرية تنهدت: لا لا عروسة ثانية
أوس بغضب: وعلاش؟؟ عمي عنده عروسة واحدة علاش بابا اثنين! مانبيش نحضر العرس
فجرية: كل واحد براحته ياماما...وبابا يبي يدير عرس ثاني...يزعل منك كان ماحضرتش
راسيل: وحتي انتي بديري عرس ثاني ؟!
ابتسمت فجرية علي براءة الاطفال: هاتي كندرتك نلبسهولك أوس: هاذا علاش تبكي ياماما
فجرية انصدمت من كلام أوس امتي شافها أصلا... هي تحاول تكون متماسكة قدامهم...
فجرية: لا حبيبي نبكي لاني كنت تعبانة شويا
أوس شاف لأمه بنظرة عدم تصديق..وساد بينهم الصمت اللي قطعه صوت راسيل الفرحانه لانها مش فاهمة الموضوع..
راسيل: ماما دريلي أحمر اهني....وتأشر علي فمها
فجرية: لا لا عيب الصغار مايديروش
راسيل بااعتراض: لا لا نبي أحمر...😢😢
فجرية في خاطرها" ياهمي حتي بنتي اللي مازال مافقصت من الدحية تعرف الاحمر والاخضر وأني نهز في راسي"
لبسو الصغار ونزلو...فجرية قعمزت في دارها وتكمشت وكانت تبكي بمرارة...شويا وسمعت صوت السيارات والعروسة جت...سكرت فجرية وذانها بإيديها وكأنها تبي الصوت يختفي....
بس الصوت كان يزيد كل مايقربو السيارات....وأصوات المنظومة والزغاريط قالبة الدنيا
ركب غسان هو وعروسته وكانت فجرية تسمع في صوت الضحك والغزل ع الدروج....
ناضت توضت وصلت ركعتين وقعمزت تدعي لربي أنه يبرد نارها ويقويها ويعطيها الصبر.....
عند غسان وعروسته.....
غسان بفرحة: وأخيرا روزا حبي بين إيديا
نيروز: حبيبي ماتحرجنيش
غسان: يسلملي المتحشم ياربي....هيا بسرعة معاش فيا صبر نوضي خلي نصلو ركعتين....وبعدين عندي موضوع مهم جدا جدا جدا بناقشه معاك 😘
#يتبــع ....
