Star Love (I)

Chapter (25)

"မနက်စာကိုတော့ လမ်းမှာဘဲ မီးလျှံကို တစ်ခုခုဝယ်ကျွေးခိုင်းလိုက်တော့ကောင်လေးရေ.. ငါ့ဆီမှာက သွေးအပြင်ဘာမှမရှိလို့..."

လယ်ရီကထိုသို့ပြောလိုက်တော့ ရှိုင်းက အားနာစွာဖြင့် ခေါင်းခါပြသည်။

"ရပါတယ်.. ကျွန်တော်လည်း ဗိုက်မဆာပါဘူး. "

ရှိုင်းက ထိိုသို့ပြောလိုက်ပြီးတော့ ထိုင်နေသော မီးလျှံ အနားကိုသွားကာ သူ့လက်ဖျံလေးကို ထိုးပေးလိုက်လေသည်။

"ရော့.."

ရှိုင်းရဲ့ အပြုအမူကြောင့် မီးလျှံ မျက်လုံးလှန်ပြီး မော့ကြည့်ကာ ပြန်မေးလေသည်။

"ဘာလုပ်တာလဲ.. အဲ့ဒါ.."

"ခင်ဗျား Breakfast မစားဘူးလား..မနေ့ကလည်း သေချာ မစားဘူး.. ရော့.. "

"မစားဘူး..."

"ဗိုက်ဆာနေမှာပေါ့.. တော်ကြာ စိတ်ရူးပေါက်သွားဦးမယ်.. "

"မစားဘူးလို့ပြောနေတယ်.. ဘယ်လိိုဖြစ်နေလဲ.."

မီးလျှံ မျက်နှာကို တစ်ဖက်လှည့်သွားကာ မစားဘူးချည်းဘဲ ပြောနေလေသည်။ ထိုပုံစံသည် ကလေးဆိုးကြီးတစ်ယောက်နှင့် ပင်တူနေသေးသည်။

"ဘာဖြစ်လို့ မစားတာလဲ.. "

ရှိုင်းကလည်း လက်မလျှော့ ။ ထုံးစံအတိုင်း စကားအရစ်ရှည်နေပြန်သေးသည်။ ဒါကြောင့် မီးလျှံ စိတ်မရှည်တော့ဘဲ စူးခနဲမော့ကြည့်လိုက်ကာ ပြောလေသည်။

"မနေ့ကလေးတင် သွေးအားနည်းနေတယ်ဆိုပြီး သေမလိုဖြစ်ခဲ့တာ ဘယ်သူလဲ..."

မီးလျှံ ခပ်ဆတ်ဆတ်ပြောလိိုက်တော့မှ ရှိုင်းငြိမ်သွားလေသည်။

"မင်းရဲ့သွေးက ဒီအချိန်မှာ သောက်လို့ကောင်းမယ်ထင်နေလား.. ဘာအရသာမှကိုရှိမှာ မဟုတ်ဘူး.."

မီးလျှံရဲ့ စကားကြောင့် ရှိုင်းရဲ့မျက်နှာက ဆူပုတ်သွားပြီး လယ်ရီကတော့ တစ်ဖက်ကို လှည့်ကာ ခိုးရယ်နေလေသည်။ မနက်စောစောတုန်းက အားနည်းနေတဲ့ ရှိုင်းဆီက သွေးကို မသောက်ချင်ဘူးဟုဆိုကာ မီးလျှံ လယ်ရီဆီက သွေးတွေကို တောင်းသောက်သွားခဲ့တာကိုတော့ မီးလျှံ ခြိမ်းခြောက်ထားသဖြင့် မပြောရဲ။