انا و حبيبة زوجي (باللهجة الجزائرية)

partie 11

78)….قاتلو هذا آآآمي برك قالها لي سونسيال واشنو هذا قاتلو وشنو ورالها الفطو وهي وجها تبدل قاتلو واشنو هذا وانا وين علابالي قالها صبتها عند سلمى قاتلو شكون سلمى قالها مرتي قاتلو واش دخلني انا قالها انت الي راكي بعثتهالها هي تخلعت وهو بدا يسب فيها قالها أمنتك درتك حبي وراس مالي وعمارت الدار ونويتك للحلال وانت درتيلي هكا قاتلو انت الي خليتني وتزوجت قالها انا كنت نحبك بصح انت كنتي تحبي دراهمي وداري وطموبيلي خدعتيني بصح ربي يخلص في الي ظالم قالها انا ربي عوضني عليك ببنت لحلال الي رايحة تعمر عليا الدار وانت روحي كي الشيفونة اليوم يمسحوبيك وجوهم وغدوا رجليهم هي ماقالت والو كانت غير وجها مزير انا كنت ركبا في طموبيل سمعت كلش قالها هاذي لافوطو نهار رحت معاك للبحر يا ندامتي على الي فات ممبعد خلاها وجا ركب في طوموبيل وديمارا قالي المهم انا ضكا نحبك انت والي يقرب ليك نحيه من الدنيا قالي وجدي روحك باه نرجعك لداركم وباه نشوف كيفاه ندير مع هذاك الكلب تاع أنيس ….روحنا طول الطريق وهو ساكت وصلنا حطني قدام دارنا وراح دخلت انا لقيت عمامي وخوالي كامل عدنا وماما تبكي وبابا الدنيا مقلبة قتلهم واش صرا جات اختي تجري ليا وتحظنتني قاتلي حسبناك متي علاه مرفدتيش تلفون ضحكتلها انا ضحكة صفرا وقتلها لاه نموت هذا وتلفوني طاحتلي لاشارج اصلا كنت عند صحبتي نلقا ماما قاتلي يابنتي قريب قتلتيني بالخلعة علاه ماقلتيليش وبابا تنارفا قالي والله وماحشمتش نخبطتك بكف انا حطيت راسي ودخلت وهوما كل واحد راح لدارو ……………………………
79)….قاتلي اختي حتى خطيبك انيس وماعلابالوش وينهو قتلها متجبديليش على هذاك الكلب قاتلي لاه واش صرا قتلها ساي رايحا نبطل زواج معاه ماما قاتلي يابنتي انت رايحة تقتليني راكي كبيرة مش صغيرة بركاي متلعبي قتلها انا راني علابالي واش ندير رحت هدرت مع بابا شبع فيا سبان وممبعد رفد تلفون عيط لانيس قالو رانا صبنا سلمى و ارواح عندي هدرة معاك أنيس خاف يجي يعود بابا يقتلو ولا كاشما يديرلو حاسبني قتلو بعثلي ميساج أسكو قلتيلهم واش صرا قتلو لالا مالا صحح وجهو وجا لدارنا وهدر مع بابا قالو بابا انا ماعندي مانخير عليك يابني بصح بنات اليوم راهم فيهم قول ودور اسمحلي بنتي بركيت مانمدهالكش انيس تشوكا وقالو منقبلش واليوم نشكي بيكم تلعبو بالغاشي ودار فوضى وبابا قالي بهدلتي بيا وانا وجهي وجه سبان حاملة السب وماقتلوش الصح خفت نزيد عليه وكاشما يصرالو قتلو انا نموت ومانديهش أنيس زايد بالهدرة مع بابا وقالو كلش قالو هاني واش درت في بنتك وهاني وش درت وحمد ربي كي راني رايح نديها ونسترها كون يحبلي نخليهالك فضيحة بابا دخل للدار هابل وعيطلي قالي هاو أنيس واش قالي هاو واش قالي انا ماحطيتوش خامج وواحد كلب لهذي الدرجة قلت لبابا كلش كنت ميتة بالحشمة بصح قلت نقولو الحقيقة نهدر ونبكي …………….
80)….حكيتلو كي داني وغدر بيا وكي ضرب فارس وكي فارس نجاني منو حكيتلو القصة كاملة بابا تشوكا مسكين وصدقني قالي عندك ماقسيتي يا بنتي وراح ديركت شكا بأنيس عند لابوليس وقالي سبابك فارس من نهار تزوجتي بيه وانت في المشاكل راح بابا هدر مع بابات فارس وقالو قول لبنك يخطي بنتي يخي طالقو ماعندو ماداه ليها خليها تعيش حياتها انا من كثر المشاكل عدت مانوكل مانشرب غالقة الباب على روحي ونخمم العام هذا ضاع هكذاك بين المشاكل نورمالمو كملت فيه قرايتي والزواج هو الاخر تعبت من كلش الدنيا ضياقت عليا بصح عمري ما تخليت على صلاتي ولا الدعاء لربي كان ايماني بربي كبير وهو الي يفرج الهموم عمري لفكرت بحاجة مخسرة الانتحار ولا نهرب من الدار كنت بنت واعية وصابرة ربي هو الي في يدو الحزن والسعادة وهو الي يفتح ويغلق البيبان ...................
  البنات هذا الجزء ما قبل الاخير  و نتمنى منكم تشجعوني لاني متاكدة مكانش صفحة تحط هادو قصص الدارجة الجزائرية 
لهذا حنا متميزين  عن غيرنا
Vote + comment = nouvelle partie