انا و حبيبة زوجي (باللهجة الجزائرية)

partie 05

حكاية انا و حبيبة زوجي الجزء التاسع 09

23)….وليت انا نبكي عرفتو مش حب ولا جيتو في بالو هو برك حاب يزكر في مروة ويعذبني انا قتلو ماعندك حتى حق عندي روح عليا قالي كي نعود حاب ماتقدريش تمنعيني درت في روحي كوراج وخرجتو من البيت وغلقت الباب ومت بالبكا وعلاه يديرلي هكذا واش درتلو انا والله نحبو والله نحبو علاه يديرلي هكذا جبدت هذيك السنسلة تقطعت ونحيت هذيك الروبة ورقدت ديتها سمانة منشوفش في وجهو هههه …وهو كي عاد حاب يزكر فيا تصالح هو ومروة ومن يروح وهو وياها على سكايب ويغلق عليا الشومبرا حتى ساعات نرقد في الصالون ..الي دارو فيا فارس مايتنساش ……..
24)….المهم انا كنت في الدار نلبس الطويل ونخفف مكياج وساعات منديرش من جيهة نحشم من بابات فارس ومن جيهة معندي لمن نعدل ونحرقس ههه فارس ميشوفش معايا مره مش حاسبني شافتني أم فارس ولاحظت هذا الشي قاتلي يا بنتي اذا مكنتيش مرتاحة معانا في لبستك و خصوصياتك قوليلي على خاطر فارس راهو عندو دارو وحدو في العصيمة اذا تحبو تروحو تسكنو وحدكم انا قتلها والله يا ماما ماراهي خاصتني حاجة معاكم بالعكس انا كي نكون معاهم نستراح وتتنحالي لغبينة الي معيشني فيها فارس بصح هي مصدقتنيش وراحت حكات معاه وقاتلو بلي يروح يشوف حياتو ويستقر في دارو ويعمرها هو عجباتو الفكرة هكذا باه يعود يقدر يدخل وقت مايحب ويخرج وقت مايحب ويقدر يتلاقا مروة وقت الي يحب فاتو يمات ووجدت انا الكابات والقش ورحلنا شبعت بكا عليهم ورحت معاه كي لوحيدة نتبع طريق طويل وهو ساكت انا مقيمتوش ثاني درت قرآن في تلفوني وقاعدة نسمع حتى داني النوم بعد ساعات وصلناااا للعاصيمة …………………..
25)….عالم اخر جابني ليه ودارنا الجديدة كانت في بير خادم فيلا صغيرة وباهية دخلنا حطينا الكابات كنا غير وحدنا برك كانت الدنيا معمرة بالغبار انا ريحت شوي و بدلت قشي وبديت الميناج عمرت الحالة بالما والصابون ونغسل جاتني وحد الفرحة هكذا قلت بعد على مروة خلاها لهيه بلاك ينساها كان هو يسيق قدام الباب ويسقي في الشجر وانا الداخل مخليا هذاك الما وندور من بيت لبيت الكوزينة داتلي عقلي لقيتو دخل وقال واشي هذا الصابون قتلو دير بالك طيح ضك نجي نسيقو مشبعنيش هدرة مره وراح لقيتو هز البالي وقاعد يخرج في الما وليت لحقتو بالفريطوار ونسايس في روحي حتى نشوف فيه راحو رجليه ويزلق ويطيح ههه مقدرتش نحكم في روحي ونطرطق بالضحك
عليه وهو كل مايجي يوقف يعاود يطيح وانا مت بالضحك ورحت ليه نعاونو لقيتو يضحك أول مرة شفت ضحكتو من نهار تزوجنا قلبي فرح مديتلو يدي حكمها وناض ولا يشوف مع الباب ووجهو تبدل ……………………

26)….شفت انا للباب لقيت طفلة واقفة تشوف معانا و تبكي طلق هو يدي وراح ليها هي خرجت تجري وهو لحقها انا مافهمتش مره واش كاين لحقتو انا لقيتهم في الجنينة يقولها مروة والله ماكاين والو والله يامروة نحبك والله غير ماما برك سيفت عليا ماكنتش جايبها وهي تقولو زاهيتلك يالكذاب تقولي راني نتعذب راك تضحك وفرحان وماعلى قلبك هم انا قلت هذي واش جابها هنا لحقتني العاقبة حتى هنا مروة كانت تسكن فما دوريجين …شفتو كيفاه يحلفلها رجعت للدار كملت الحالة وحدي ورحت لشومبر باه نرتب القش في لخزانة لقيتو جا وجاب معاه ساشيات تاع قضيان حطهم فوق البوطاجي وراح خرج رحت لقيتو جاب اكل سريع كليت انا شوي ماقدرتش حتى نبلع واش في فمي غصة في قلبي طاحت الظلمة وهو مجاش واول مرة نجي لبلاصة بعيدة خفت وحدي والتواقي معندهمش ريدوات الحالة تبان خلااا نصبر في روحي غير بالقرآن ونقول ماعندو وين يروح ويخليني هنا وحدي ..لقيتو جا غلق الباب ودخل للشومبرا …………………..
27)….لقاني راقدة نوضني قالي هذي شومبرتي انت روحي ارقدي في شومبرا اخرى ..غاضتني هذي الهدرة قطعتني احنا عرسان معدناش خمسة اشهر ويرقد كل واحد في شومبرا بصح لميتها وسكت ورحت لشومبرا لخرا لقيتو لحقلي قشي الي رتبتو في خزانتو ورماهولي فوق السرير و خرج ..انا كل ما نغمض عينيا تجيني صورتو كي ضحك وتولي تروح وتجي صورة مروة هي شابة وسيفيليزي بصح مش كيفي محجبة وباهية ههه..
صباح نضت بكري كملت الميناج وخرجت للجنينة قعدت نشم شوي هواء لقيت فارس جا عندي قالي وجدي روحك نديك كاشما تشري حوايج للبيت اول مرة يحكي معايا جملة مفيدة ههه
فرحت انا ولبست قشي ورحت معاه داني لسوبر ماركت ماخليت مانجيب ههه ريدوات كوفروليات زرابا وهو يتبع ويخلص وانا نختار على ذوقي وكي نسقسيه نقولو اللون هذا مليح ولا مايجاوبنيش مره مالا قلت واش عندي فيه ندي على رايي ههه….
28)….خلصت القضيان مت بالغلبة والجوع قتلو هيا نروحو جعت وغلبت قالي عندي خدمة بعدها نوصلك رحت معاه لوحد بلاصة هكا من راح مجاش وانا نستنا في طوموبيل وكرشي تصوني ههه وليت هبطت من طوموبيل قلت كاشما نلقى حانوت نشري منو كاش حاجة صالحة للاكل درت درت ومالقيت والو خاليا مرره رجعت للطوموبيل مالقيتهاش حوست من من مالقيتوش مت بالخلعة وانا مانعرفش مرره البلاصة وحتى كون نحكم طاكسي منعرفش نقولو وين يديني قعدت ندور كي المهبولة وميتة بالجوع فاتت ساعة وانا هكاك هاملة وتلفوني خليتو في الطموبيل مشيت مشيت حتى لقيت بتزيريا صغيرة دخلت جيت كاشما ندوموندي قالي اسمحيلي سكرنا خرجت بغيت نبكي وليت كملت المشية حتى صبت حانوت دخلت شريت قرعة ما وشوية شيكولا ههه ونمشي ونوكل فيها وحاطة راسي بالارض حتى نسمع في الراجل يعيط اااعندك ونلقا روحي قدام طوموبيل قد قد شعرة مادهمتني ………………

29)….فشلو رجليا وطحت من الخلعة لقيت راجل هبط منها يجري وقالي اسمحيلي والله ماشفتك مدام على سلامتك قتلو معليش معليش هزيت راسي لقيتو فارس الدمعة طاحتلي وعنقتو وقتلو ويينك ويينك علاه رحت عليا وخليتني وحدي لقيتو قالي اني جيت اني جيت اني هنا ووشدني باه نوض ركبنا في الطوموبيل وانا مزالني نبكي قالي ساي يخي ماصرا والو انا مقلبتلوش وبقيت نبكي شاف معايا لقاني رافدة شيكولا قالي جعتي هزيت راسي انا بمعنى ايه لقيتو زاد شوي وحبس قدام ريسطورون حدرنا قعدنا دوموندا بيتزا و كولا كليت انا حتى شبعت وهو صونالو تلفون راح يهدر معاه وانا رفدت تلفوني لقيت 30 آبال “زوجي “ههه ضحكت وحسيت بالفرحة أول مرة يعيطلي في تلفوني معليش ليشتا آبال مونكي ههه ..كي عنقتو حسيت بالأمان والحب شعور جامي حسيتو اااااااااه ههه …………….
30)….قتلكم مالا روحنا للدار رقدت انا وغدوا بديت نفرز في الدار ونركب في الحوايج هو لقاني هكذاك مقلبة الحالة خرج ماعوني ماوالو انا درت كلش من صباح ووجدت لغدا ستكيت الحالة وخرجت للجنينة سقيت الشجر وقلمتهم وحطيت فيها كراسة باه نقدرو نقعدو فيها كي رجع فارس بقى حاير في الحالة عجباتو وباه مايبينليش ويفسدلي الفرحة طلع لشومبرا تاعو وهبط يهدر مع حبيبتو مروة قالها وين حابة نتلاقاو انا قلت واش عندي فيهم يتلاقاو يتحابو الله يساهل انا المهم مانفسدش فرحتي ماعبرتوش مره وطلعت لشومبر تاعي قلبتها زي تاع مراهقات علقت فيها الورد واوتوكالون ههه ..
انا حسيت بالراحة في الدار هذي فارس يروح يخدم ويرجع وقت لغدا والعشية يرجع بكري ..توحشت ماما واختي وعايلتي كنت كل يوم نهدر معاهم بالصح مش كيما نشوفهم وايمان مسكينة كانت كل يوم تتصل بيا مقلقتني غير مروة هو اصلا فارس يشوف فيها غير هي انا في هذيك الدار كي الخدامة تاعو نحرسلو البيت ونطيبلو وخلاص بصح كنت راضية بمكتوب ربي ماعندي ماراح ندير كون نهدر معاه يقولي طيري عليا بحتى انا منيش مسحقك كانت ابسط جاست منو تفرحني كنت نحبو الله غالب …………..
31)….مرة كنت نحكي مع ايمان وماماها في تلفوني ونضحكو وهو قاعد في الكوزينة يتعشا ويسمع لينا مالا ايمان قاتلي جوزيلي فارس نحكي معاه انا خفت نهدر معاه بصح رحت وديتلو تلفون وقتلو ماماك تحوس تحكي معاك شدو هو وحكى معاهم ورجعولي وكمل يوكل وممبعد قالي تلفونك قديم مايسمع والو قتلو انا بصح انا عاجبني سكت وطلع وغدوة جابلي تلفون جديد قالي هاكي هذا قتلو كثر خيرك وخليتو شادو وطلعت لشومبرا تاعي لقيتو طلع وضرب الباب عليا ودخل خلعني قلبي طاح قالي انا منحبش الي يكسرلي كلمتي ومانحبش نعاود هدرتي ورمالي تلفون في حجري وشاف مع الشومبرا وخرج باينة عجباتو ههه بدلت انا لابيس درتها في تلفون الجديد وخبيت لوخر كيما قالي .................
Vote + comment = une nouvelle partie
شوي تفاعل حبايبي لاني طولت هذا البارت من اجل متابعات القصة حبيباتي   ❤❤❤❤💕💓