انا و حبيبة زوجي (باللهجة الجزائرية)

partie 03

حكاية انا و حبيبة زوجي الجزء الخامس 05

11)…. كان مداير دوباف سمعتها صوت مرا قاتلو آلو قالها آلو مروة قالها اسمحيلي عمري اسمحيلي حبي والله مابيدي والله مابيدي وهي تبكي وهو يقولها ماتبكيش عمري تفوت والله تفوت ولا هو يبكي ويقولها اسمحيلي لازم نديرها وهي تقولو مادرهاش وهو يقولها لازم نديرها اسمحيلي مروة انا قلبي تقطع عليهم قلت انا هي السبة غاضني هو ياي يموت عليها دموعو يجريو على خدو ولا كوبا عليها وهز راسو وخزر فيا لقاني نبكي ثاني جا لعندي قالي دمرتينا فسدتيلنا فرحتنا سرقتيلنا احلامنا انا مت بالبكا قالي انا حلفت لمروة عمري مانتلاح لبنت خلافها واليوم رجعت كذاب قتلو انا متتلاحش ليا نخليوه زواج على الورق وخلاص ضحك وقالي فاهمة بسلامتك تحوسي تبرئي روحك انتوما البنات واحد مايقدر عليكم وحكمني من ذراعي وهزلي وجهي وشاف مع عينيا قالي هذا اليوم الوحيد الي راح نمسك فيه اول مرة وآخر مرة ورماني على السرير انا قاومتو مكنتش حابة يمسني بعد ما وجعلي قلبي بهذ الهدرة كامل بصح هو كان قاوي عليا ماسيسنيش مره دار واش يلزم بالعنف وناض لبس حوايجو وخرج وانا بقيت مرمية هكاك محسيت بحتى حلاوة كيما كانو صحباتي يحكيولي محسيتش بلي تزوجت في لحلال محسيتش بالحب والحنانة محسيتش بالراجل الي نحوس عليه ليلة الدخلة الي تتمناها اي طفلة وتحلم بيها على ضو الشموع انا شبعت فيها اهانات وبكا حسيتو اغتاصبني مش تزوجني …نضت طول بهذيك الحالة دوشت وبدلت حوايجي لقيتو فجر وليت لبلاصتي رقدت شوي بصح واشمن نوم ومنين يجيك النوم …………………
12)….لغدوا فطنت وحدي بين اربع حيطان رقدت والدمعة في عيني ونضت وهي في عيني طول النهار وانا نستنا فيه باه يجي يديني ماجاش ليا مره نساني ولا بالذمة مجاش انا عيطت لايمان قتلها ارواحي اديني قلقت وانا قاعدة وحدي قاتلي ضك نجي لبست انا حوايجي وقعدت نستنا فيها لقيت الباب طبطب قلت هذي ايمان وصلت فتحت لقيتو أب فارس مت بالحشمة وطاح وجهي تبهديلة عدنا احنا العروسة ماتقابلش الرجال نهار صباحها ملقيت وين نحط وجهي هو قالي صباح الخير بنتي مبروك عليك وسلملي على راسي وعطاني دراهم انا قتلو يبارك فيك كثر خيرك بابا قالي هاتي حوايجك وهيا كامل يستناو فيك انا هبطت معاه وفي الطريق داني عند الكوافار ورحنا ممبعد للدار وصلت لقيت خالات فارس وعماتو وبناتهم استقبلوني ورحبو بيا و ايمان قاتلي اسمحيلي مقعدتش بعثتلك بابا وقربت ليا وقاتلي في وذني بضحكة كيفاه كانت الليلة قتلها مليحة وسكت …فارس طول النهار مجاش حتى لليل جا دخل طول بدل حوايجو ورقد وفي الصباح ينوض بكري ويروح …………………….
13)….فاتو يمات وانا عروسة والناس حاسديني على الراجل الي ديتو حطيني ديت كاس العالم زين ومال وحطة بصح انا شابعة مرار كنت نضحك ونشايخ باه نحي على قلبي نوض بكري نخدم في الكوزينة مع ام فارس نطيبو لغدا نسيقو نغسلو كنت نظال نخدم باه مانحسش بالفراغ ايمان كانت تقرا في الجميعة مسكينة مع لي كونترول تحظر أب فارس كان حنين عليا كان يعيطلي بنتي يجيبلي الي نطلبها كي يدخل على الباب وجهو فرحان انا نموت عليه نغسلو رجليه ونسلملو على راسو بزاف انسان طيب ..هكذاك مرتو وبنتو غير فارس كان ديمة يجي في الليل وفي النهار يروح بكري تقريبا مانشوفوش مره …
انا في بيت فارس مكان خاصني والو بصح مكنتش حاسة بلي متزوجة وعندي راجل الي يحبني ويخاف عليا انا بالرغم مادار فيا فارس كنت نحبو من قلبي كيفاه منحبوش وهو كلش فيه يتعشق بصح جاتني كلي حب مراهقة تاع حب من طرف واحد تاع الليسي ههه …كنت كي منشوفوش في النهار ندير الفطوات تاعو في التلفون ونتفرج فيهم ونتمنى كون يحبني بصح نتفكر مروة واني دخلت بيناتهم نتقطع ………
حكاية انا و حبيبة زوجي الجزء السادس 06