انا و حبيبة زوجي (باللهجة الجزائرية)

partie 03

14)….وحد المرة كنت نرتب في الخزانة تاعو لقيت البوم تاع التصاور جاني الفضول وحليتو وقاعدة نتفرج فيه لقيت فارس كي كان صغير وايمان وعايلتهم كامل وبديت نقلب في لي فوطو حتى صبت فارس ووحدة وبزاف تصاور هو وياها عند البحر عند الشلالة عند الجسور في الكافيتيريا هنا في بيتهم بقيت غير نقلب وانا مخلوعة والدمعة في عيني عرفتها بلي هذي هي مروة قاعدة نشوف معاها حتى لقيتو واقف عند راسي قالي واش راكي ديري هاتي من يدك وجبدولي من يدي بعنف حتى جرحني بظفرو في يدي طلقت انا الالبوم وحكمت يدي لقيت الدم يسيل منها قالي متزديش تتلاحي حوايج خاطينلك طريق فهمتي انا الدمعة طاحتلي وخرجت من الشومبرامن. حت للكوزينة جبدت لبوات ارجونس وقاعدة نداوي في جرحي لقيتو جا للكوزينة فتح لفريجيدار جبد الما وشرب انا من الخلعة تاعو وليت نرجف وعييت نغلق الشاش على يدي لقيتو جا ليا باه يقفلهالي قتلو خليني نقفلها وحدي وجبدت يدي وخرجت خليتو واقف فما .
لغدوة شافتني ماما ام فارس مضمدة يدي قاتلي واش بيك وكان فارس قاعد في الكوزينة ماراحش بكري اليوم شفت انا فيه وقتلها قست روحي بالموس البارح قاتلي ياعمري ربي يشفيك اتولهي يابنتي قريب قطعتي يدك ضحكت انا وقتلها ضكا تبرا عادي ……..
15)….مغاضنيش جرح يدي قد ماغاضني جرح قلبي انا صغيرة وجاية للدنيا تغبنت مع راجل ظاهرو يخفي باطنو فارس كان يكرهني كان جامي يشوف معايا كنا نرقدو جنب لجنب بصح هو كان يشوفني خيال قدامو كان ساعة ساعة نسمعو يهدر مع مروة في تلفون ويقولها توحشتك وحاب نشوفك ومانسيتكش انا نحس بالذنب نقول انا الي فسدتلهم احلامهم وخربتلهم حياتهم مكانش عليا نقبل من الاول مكانش عندي لمن نحكي هذي الهموم كنت نصلي وندعي ربي باه يفرجها علينا احنا في ثلاثة من غير ربي مكان معايا حتى واحد ماما من نهار تزوجت جاتني مرة ولا مرتين واختي ديمة تعيطلي نقولها عييت رايحة نطرطق تقولي ابلاك تفضحينا وتفرجي بينا الدنيا كنت نشوف في روحي وحدي ..
عندي شهرين ضكا زواج هانية حاجة متخصني والجمرة الي في قلبي والفتها عودت نفسي اني فارس منحسبوش راجلي نحيه من راسي باه نرتاح شوي ……………………
16)….وحد النهار قلت لايمان راني مخنوقة وحابة نخرج قالت هي لماما وكي جا فارس قاتلو اديها تحوس تنحي على خاطرها هو حاجة باينة مشتاش وقالها قولها توجد روحها انا كي لقيتو هو مديني قلت لايمان مانروحش اصرت هي عليا وليت لبست عبايتي ورحت معاه كان يسوق بزاف انا من نركب معاه ويدي على قلبي قتلو خفف شوي مارجعليش مره وكمل هكاك يسوق حدرنا في وحد لبلاصة هكا هادية وفيها لخضورة قعدت انا شميت شوي هوا وهو كان مقلق كون صاب راهو مع مروة انا حنينة كنت حاسة بيه ههه …قعدنا هكاك ساعة وقالي هيا ركبنا وجينا راجعين وهو يسوق هكاك بهذاك الجنان قتلو رايح تقتلنا سوق بعقلك لقيتو حبس وقالي حدري قتلو اه ..قالي حدري فتحت انا الباب وهبطت حسبت كاشما حبستلو طوموبيل ولا لقيتو غلق الباب وديمارا راح ايه والله راح عليا وخلاني واقفة وحدي معرفت وين راني حرت وجريت موراه زغبة بصح هو راااح قعدت فما كي المهبول معرفتش الطريق وقعدت نمشي نمشي ومعلباليش وين رايحين يديوني رجليا ونسقسي على الشارع تاعنا وين جاي كل واحد واش يقول مزال بعيدي دوري ادروات كملي طول جبتها على سعدي ثلاث سوايع وانا هايمة في الرود وحدي حتى وصلت ميته بالعيا كي دخلت لقيت ماما ام فارس تستنا فيا في الصالة وفارس قاعد فما يتفرج قاتلي يابنتي واش بيك هذا وين كنتي خرجتو مع بعض وليتو للدار كل واحد وحدو ..شفت انا مع فارس وقتلها انا ماما الي قتلو اديني عند حبيبتي توحشتها وراني نجي وحدي قاتلي ااه معليش بنتي معليش روحي بدلي حوايجك وارواحي كاشما توكلي انا رحت لشومبرتي لقيت رجليا منفوخين ويوجعو وحالتي حالة بدلت حوايجي ورقدت من التعب.. نسمع في ماما تقول لايمان خليها اي رقدت ..جا فارس دخل باه يرقد لقاني راقدة في بلاصتو ولا رقد فوق الفوتاي ………
......................................................

Commentaire +vote= nouvelle partie 😉
هذي هي روايتي الثانية  روحو شوفو الاولى  الحب الابدي و متبخلوناش باللفوت و الكومنت باه نحطولكم الجديد و انا متأكدة بلي مكانش شبيه لينا

لا تنبهروا بتواضعي احم احم ههه 😎😎😎😆😆😆