انا و حبيبة زوجي (باللهجة الجزائرية)

partie 02

حكاية انا و حبيبة زوجي الجزء الثالث 03

5)….تفاهمو على راسي وفتحو عليا وداوني كي الاطرش في الزفة باه نعقد رحنا للبلدية انا وبابا وسي فارس جا هو وباباه باين جابو بالسيف باباه يضحك وهو وجهو مظلم ومقلب انا كنت حاسة بلي كاينة حاجة مورا هذا الراجل بصح سكت كي شفتو هذي ثالث مرة نشوفو دخل قلبي وعجبني بزاف ستيل تاعو يقتل وعينيه يهبلو بصح هو ماخزرش فيا مره سنيا في العقد وراح باباه قالنا بلي وجدولنا لغدا عندهم مالا رحنا معاه لدارهم كي دخلنا على الباب حسيت روحي راني في الترك هذيك الحطة ماعندي مانوصف الصالة وكلش كان ولا في الاحلام قعدت مدهوشة ويماه تضحك وجات ليا تحضنتني وقاتلي البيت بيتك بنتي واختو سلمت عليا وداتني شفت بيت فارس انا كي دخلت عينيا طاحو بيتو قد دارنا كاملة ههه قاتلي عجباتك بيتك الجديدة انا مالقيت واش نقول حليت فمي ولات قاتلي هيا نهبطو يما وجدتلك غدا سبيسيال المهم تغدينا عندهم وروحنا ……………..
6)….فاتو ليامات وانا نروح نخدم عادي فرحانة زهري تحرك عايلة فارس يحبوني وهو بقلاوة طاحت عليا ههه ..كانت اختو ايمان تجيني للخدمة تاعي وتقعد تحكيلي على دارهم وعلى فارس زدت حبيتهم كثر وتعلقت بيهم ماكنتش عارفة واش رايح يصرالي ممبعد …كانت تسقسيني اذا حكيت مع فارس في تلفون انا كنت حشامة مقدرتش نتصل بيه ونحكي معاه كانت تشجعني في كل مرة وتقولي هو ماعندوش رقمك كون عيطلك …انا قلت لها اديلو نميرو تاعي لازم هو يعيطلي ماش انا هكذا باه نعرف بلي راهو حابني صح …هي داتولو وقاتلي كتبتني عندو زوجتي هو شافها بصح عمرو ماعيطلي في شهر هذا …حتى وحد النهار لقيت تلفون تاعي فيه آبال مونكي “زوجي” شديت تلفون انا ومت بالفرحة وعاودتلو رفد عليا قالي آلو سلام قتلو وعليك السلام قالي كشما خصك انا دهشت في لافاصون تاعو قتلو والو لقيتو كوبا عليا غاضتني روحي ومافهمت فيها والو جات ايمان ماحكيتلها والو خليتها في قلبي ….لحق وقت العرس وانا السيد ما حكيت معاه ما عرفت عقليتو نشوف غير في دارنا ودارهم زاهيين وفرحانين وانا وهو واحد ماسامع بلوخر يما واختي يديرو في القاطو وبابا وخويا يعرضو في لافامي والجيران وايمان تجي تديني نخير في لا روب بلونش وانا قلبي مزير مانيش عارفة علاه ……………..
7)….صباح العرس جات ايمان بالطوموبيل تاعها داتني للحفافة وقعدت معايا خلصتلي الحفافة شعري وقاعدة ديرلي في الماكياج حتى نسمع في تلفوني يصوني رقم مانعرفوش رفدت عليه وقلت آلو صوت مرا قاتلي آلو ..سلمى خطافت لرجال ؟؟! ..قتلها كيفاش !! شكون معايا قاتلي سرقتيلي حب حياتي فارس حنوني انا حبيبي انا تاعي انا جيتي اليوم دمرتينا قضيتي على حبنا والله ماتربحي والله ماتربحي وماتتهناي في حياتك وكوبات في وجهي انا مت بالبكا والحفافة تقولي واش بيك حبسي فسدتي الماكياج وانا هابلا بالبكا ونعيط جيبولي ايمان جيبولي ايماان جاتني ايمان قاتلي واش بيك واش كاين قتلها شكون هذي الي سرقتلها انا حبيبها فارس قاتلي واش راكي تقولي واش هذا قتلها قوليلي الصح ماتخبيش عليااااا…………… حكاية انا و حبيبة زوجي الجزء الرابع 04

8)…. مالا بدات ايمان تحكيلي وانا نبكي هي تحكي وانا نبكي حكاتلي كلش قاتلي هذي مروة حبيبة فارس يحبو بعضاهم من الصغر هو كان حاب يتزوجها وأمو منعاتو على خاطر مروة عاميتلو عينيه وحابة تلعب عليه كي عاد لاباس عليه انا شبعت بكا وتخسرلي المكياج كامل قلت لايمان انا منقدرش ندمر حب تاع سنين هنا وخلاص لا زواج لا والو قاتلي ايمان يا سلمى يا عمري ماديريهاش الله يسترك والله ماما تموت وبابا كاشما يصرالو قتلها وانا وانا ماعلابالكش لنتهنا في حياتي هذي ولا لالا هذي مش بلاصتي ماعندو ماداني ليهم ندمرلهم حياتهم وهوما يحبو بعضاهم قاتلي يا سلمى والله ماتقيسك بحتى حاجة وهو اصلا مخدوع فيها برك والله ضك ينساها معاك وانت قادرة عليه باه تبدليلو حياتو والله معاه مايخصك والو رفدت انا تلفون وقلت لاختي بلي رايحة نبطل العرس لقيتها بدات تعيط وتقولي هبلتي واش راكي تقولي تحوسي تخربيلنا بيتنا قاتلي الحب يجي بعد الزواج بركاي ما تهبلي في ماما وتفسديلنا فرحتنا وتضحكي علينا الغاشي قاتلي اصلا هوما رايحين يديوك يديرولك جنة في الارض ويخرجوك من المزيرية صكري فمك ..انا سكتت حكمتها في قلبي ورايحة نتمزق من داخل النار شعلت فيا لقيت روحي انانية كون نبطل ونفسدها عليهم كامل فرحنين قلت معليش نضحي بسعادتي على جال عايلتي وعيلتو ………………………………
9)….قلت لايمان معليش نكمل وخلاص فرحت ايمان تحضنتني ومسحتلي دموعي وعاودولي المكياج …
روحت لدارنا باه يجيو يدوني جات ليا ماما قاتلي بنتي اتهلاي في راجلك ودارك واخدميهم كيما كنتي تخدميني وحبيهم واحتارميهم وتحضنتني وانا الدمعة الحارقة طاحتلي وقتلها ايه ماما ونسمع في لاصونات جاو يديوني دخل فارس ودخلت معاه ايمان وماماه سلمو عليا وقاتلي مبروك ابنتي وهو ماخزرش فيا مره وقف معايا وخرجني ركبني في الطوموبيل كانت باااهية وركب هو وساق بيا كان طول الطريق وهو ساكت مانطقش مره وانا ثاني كان قلبي يوجع فيا على واش رايحة نلقا ممبعد في حياتي بصح درت ربي في قلبي وسكت قلت الي جابها ربي مرحبا بيها …وصلنا لاصال وعراس السطايفية فخمة من الحطة واللبسة والفرسان والبارود والبندير ههه حدرنا تفرجنا زغبة ودخلنا كان بزاف معاريض بنات ونساوين كامل واقفين يصورو فينا ويصفقو ويضحكو ويشطحو غير فارس كان شارد ماهوش في هذاك الهرج مره انا كنت نضحك بذراع مش بيدي كان قلبي يتعصر ولا ركبلي الخاتم خيرتها ايمان كانت كبيرة ومليحة بزاف وقطعنا لابياس مونتي انا هزيت باه نوكلو بصح هو محبش كلاها وحدو انا تنشعت بقيت هازا المغرفة وهوما كامل يتفرجو وليت حطيتها ولا خرج بقيت انا فما قاعدة والبنات يشطحو ومدايرين حالة انبيونس كبيرة سمعت زوج مراوات كانو قراب ليا قاتلها لعروسة مسرارة بصح هو مضحكش مره معرف واش بيه يشنف علينا …………………………
10)….وصل وقت لعشا هبطو المعاريض يتعشاو انا بقيت وحدي لفوق شفت الساعة لقيتها العشرة تاع الليل جات ايمان قاتلي فارس جا باه يديك وتروحو قاتلي كي توصلو قولو يطلبلك عشا قتلها ايه حدرت انا ستنيت عند الباب جا بالطوموبيل ركبت معاه ورحنا يسوق بسرعة كبيرة انا كنت حاطة يدي على قلبي وممبعد حبس هزيت انا راسي لقيتو اوتال حدر وحل عليا الباب حدرت انا ودخلنا طلعنا لشونبر الي كان حاكمها دخلني قعدت انا وحطيت الفاليز كنت ميتة بالغلبة والجوع لقيتو عيطلهم جابو عشا فخم حطوه قدامي ولا خرج قعدت انا نستنا فيه باه يجي يتعشا معايا لقيتو طول مارجعش فاتت ساعة والعشا هذاك محطوط يستنا وليت نحيت الروبة وحدي و تعشيت وقعدت نستنا زادت فاتت ساعة وماجاش ولات الثناش تاع الليل مت بالنعاس تكيت على السرير وعينيا يتحلو ويتسكرو لقيت روحي رقدت فطنت عليه وهو يسكر في الباب دخل الوحدة ونص قعد فوق الفوتاي وحط راسو بين يديه ولا جبد تلفون وعيط………………

Un vote + un commentaire =nouvelle partie😉