قصة..(عاشق يريد الانتقام)
يا زيدى يازيدى ...مين قدك النهاردة بقى هتخطب يا معلم عقبالى يارب"
التفت اسر الواقف امام المرأة لينظر الى اخيه الواقف ورائه ثم وضع يده على كتف اخيه وقال:يارب يا سيدى بس تكون احسن منى
مراد:حاسس بنبرة حزن فى صوتك ايه مش مبسوط ولا ايه دا انت رايح تخطب البنت الى بتحبها من وانت عندك عشر سنين
اسر:بحبها اه... اما هى ولا فارق عندها
مراد:هتحبك وهتموت عليك كمان وبكرة تقول مراد اخويا قال وساعتها ابقى اعمل فيها الى عملته فيك
ضحك اسر وقال:يا عم هى تحبنى وبس وانا مسمحها على كل حاجة عملتها فيه
مراد:طول عمرك اهبل وعبيط
اسر:دا من زوقك
سمعوا فى هذا الوقت نداء ابيهم
مراد:بابا بينادى يلا ننزل
اسر:استنى مقولتليش ايه رأيك فى شكلى
مراد:قمر والله العظيم
ابتسم اسر وقال:طب يلا ننزل لبابا
مراد:يلا
.................................................. ........................
كانت تمشى فى الغرفة ذهابا وايابا تارة تفرك فى يديها وتارة اخرى تأكل فى اظافرها
ندى:يا بنت اهدى بقى خيلتينى وربنا
مى:مرتبكة جدا ومتوترة ومتغاظة ومضيقة
وفجأة صرخت مى بصوت عالى ثم قالت:كل ده بسبب الزفت اخوكى
ضحكت ندى وقالت:احترمى نفسك ومتقوليش على اخويا كده اخويا هيظلموه اصلا علشان هيجوزوه واحدة مجنونة زيك
وقفت مى بمقابل ندى النائمة على الفراش وقالت:مش انا مجنونة روحى بقى قولى لاخوكى انى مجنونة و يمنع الجوازة دى
ندى:لأ ...اصل انا عايزاه يتجوز واحدة مجنونة وانتى مناسبة جدا
مى:غيظانى انتى وفرسانى ببرودك ده
ندى:انتى مكبرة الموضوع اووى ...طب اقولك على حاجة انا بجد بحسدك
مى:على ايه بقى
ندى:انك هتتجوزى اخويا ياريت الاقى حد زيه فى طيبته وحنيته كنت هوافق اتجوزه عالطول والله ...عارفة يا مى لو كان مراد هو الكبير ومتقدملك علشان يتجوزك انا كنت اول واحدة هعترض وهقف جانبك وهمنع الجوازة دى لان مراد شبه بابا بالظبط بس صدقينى اسر طيب اووى والله العظيم
مى:عارفة يا ندى انا امبارح فكرت فى كلامك كتير اووى بس فى حاجة جوايا بتقولى وافقى وحاجة تانية مخوفانى
ندى:مخوفاكى من ايه
مى:مش عارفة من ايه ....بس انا مش خايفة انه يطلع زى بابا او عمى ياسين انا متأكده جدا انه مستحيل هيكون زيهم ...بس انا مش عارفة خايفة من ايه
ندى:الخوف ده شىء طبيعى اى بنت كده لازم طبعا هتخاف لان الجواز ده مش سهل يا بنتى دى خطوة صعبه اووى عايزة تفكير جامد اووى قبل ما تخطيها بس بدام هتتجوزى اخويا انا بقولك اخطيها بقلب جامد
مى:هصلى صلاة استخارة النهاردة والى ربنا عايزه هيكون ان شاء الله
ندى:ربنا يعملك الى فيه الخير
مى:يارب...عمتى مش هتيجى طبعا
ندى:تفتكرى برضه بعد الى حصل بينها وبين خالى النهاردة ممكن تيجى
مى:بابا قالها كلام ضيقها اووى واكتر حاجة ضيقتها لما قالها دى بنتى ومتدخليش ما بينا
ندى:ايوة خالى غلط اووى فى الكلمة دى
سمعوا فى هذا الوقت صوت طرق احد ما على الباب
ندى: قومى افتحى
مى:حاضر
قامت مى ومشيت فى اتجاه الباب وفتحت الباب ووجدت الخادمة
مى:خير
الخادمة:محمود بيه بيقول لحضرتك وللدكتورة ندى تنزلوا
مى:فى حد تحت مع بابا
الخادمة:ايوة
مى:مين
الخادمة:الدكتور يا سين والدكتور اسر والباشمهندس مراد
مى:طب روحى روحى
التفت مى وقالت لندى:المحروص ابوكى وعياله تحت
ضحكت ندى وقالت:محروص وعياله انتى جاية من بولاق يا بنتى
مى:مش وقت هزارك يا ندى يلا قومى علشان ننزل بابا عايزنا
ندى:انتوا مش مراعيين خالص انى مريضة
ضحكت مى وقالت:بابا مش مصدق الحكاية دى اصلا مفكرها لعبة
قامت ندى من فراشها ونزلا بالفعل لأسفل
ياسين:اهلا بعروستنا الحلوة
مى(بابتسامة مصطنعه):اهلا بحضرتك
ابتسمت ندى لمراد واسر وسلمت عليهما وعلى ابيها ايضا وفعلت كذلك مى ثم جلست مى وندى بجانبها على اريكة بمفردهما
تنحنح ياسين ثم قال:من غير مقدمات يا محمود احنا النهاردة جايين نطلب ايد مى لأبنى اسر
ظلت هذه الجمله تتردد فى اذنيه كم هى جميلة تلك الجملة (يد مى لابنى اسر)ابتسم حينها ولكن تلاشت الابتسامة فجأة عندما راوده سؤال هل ستوافق ان تكون لى ام سترفض؟؟؟
افاق من شروده على جملة محمود وهو يقول:انا عمرى ما هلاقى انسب من اسر ابنك زوج لمى بنتى
ياسين:يبقى على بركة الله ...بص يا محمود طبعا مى هتعيش فى الفيلة والشبكة الى هى عايزاها والفرح نعمله عالطول بعد اسبوع او اسبوعين بالكتير... قولت ايه
محمود:هو فى كلام بعد كلامك برضه
مى:ايوة طبعا فى كلامى انا ولا انا ماليش لازمة فى الليلة دى
نظر محمود اليها نظرة نارية ولكنها لم تؤثر فى مى
ياسين:عايزة تقولى ايه يا عروسة
مى: لازم برضه تعرفوا رأيا وتسألونى انا موافقة ولا لأ
اسر: وياترى هو ايه رأيك يا مى
لم تشعر مى بنفسها وهى تنظر الى اسر وهو ايضا كان ينظر اليها مباشرة فى عيناها ثم تحدثت اعينهم
اسر:اوعدك انى هعوضك عن كل الى شوفتيه فى حياتك وهتلاقى معايا الحنان والحب والامان الى اتحرمتى منهم بس وافقى
مى:مش عارفة ليه فى حاجة جوايا بتقولى وافقى وحاجة تانية بتقولى لأ ...خايفة منك يا اسر معرفش ليه
محمود:مى
التفت مى ونظرت الى ابيها وقالت:لازم اصلى صلاة استخارة الاول واشوف انا هوافق ولا لأ
ياسين(بسخرية):وماله بس متنسيش تدعيلنا بقى يا ست الشيخة
مى(بسخرية):وماله هدعيلك
ياسين:طيب يا محمود لما بنتك تصلى بقى صلاة الاستخارة وتعرف رأيها ابقى رد عليه
محمود(بغضب):ماشى يا ياسين
ياسين:نستأذن احنا بقى
انصرف ياسين واسر ومراد
انقض محمود على مى وقبض على يدها بعنف وقال:بتتحدينى يا بنت التييت
صرخت مى من قبضته وقالت:ايوة بتحداك وانا مش هتجوزه حتى ولو هتموتنى
ترك يدها ثم انهال على وجهها بالصفعات حتى خرج الدماء من فمها حاولت ندى ان تبعده عنها ولكن كان اقوى منها
ندى:خلاص يا خالو ابوس ايدك خلاص ورحمة طنط عزة خلاص
ابتعد محمود بالفعل ثم هرول تاركا الفيلة بأكلمها
هبطت ندى لمستوى مى وقالت:مى انتى كويسة
وضعت مى يدها على الدماء الذى يسيل من فمها وقالت:انا بنزف يا ندى
رأت ندى الدم فصرخت ثم قالت:هروح اجيب قطن ومطهر علشان اوقف الدم ده
اومأت مى رأسها فقط فقد كانت لا تستطيع التحدث من الالم
هرولت ندى مسرعه واتت بتلك الاشياء وعادت لمى وبالفعل استطاعت ندى ان توقف الدم
ندى:حاسة بأيه دلوقتى
مى(بدموع):مش حاسة بأى حاجة خالص ...فى اب بيضرب بنته بوحشية كده
ندى:معلشى يا مى
مى:انا ههرب من البيت ده يا ندى
ندى:انتى اتجننتى
مى:ابقى مجنونة لو فضلت هنا
ندى:وافقى يا مى وخلاص
مى:لأ مش هوافق
ندى:انتى مش عايزة توافقى علشان متحسيش ان بااباكى غصبك على حاجة انتى مش عايزاها صح
مى:ايوة صح مش هخليه يغصبنى اعمل حاجة انا مش عايزاها
ندى:هتعمليها
مى:لأ
ندى:هتتجوزى اسر يا مى
مى:بقولك لأ
ندى(بصوت عالى):انا الى بقولك هتتجوزيه هو الى هيرحمك من العذاب الى انتى فيه ده اسمعى كلامى بقى وبطلى عند واوعى تفكرى فى حكاية الهروب دى تانى فاهمه
تركت مى ندى وصعدت لغرفتها وارتمت على فرشها وظلت تبكى اما ندى خرجت من الفيلة وركبت سيارتها ووجدت نفسها تقود السيارة باتجاه فيلة عزيز
.................................................. ........................
كان واقفا فى شرفة الفيلة يتطلع الى السماء يتأمل فى منظر القمر الجميل فقد كان عمار من عشاق القمر جاءت سارة من خلفه ووضعت يدها فوق كتفه وقالت:سرحان فى ايه كده يا ابيه
التفت عمار ونظر الى سارة وقال:سارة
اومأت سارة رأسها وقالت:ايوة سارة
عاد عمار الى وضعه مرة اخرى ناظرا الى القمر وقال:عادى مش سرحان ولا حاجة انا بس بتأمل فى منظر القمر ...شوفتى شكله جميل ازاى
نظرت سارة الى القمر بالفعل وقالت:اه جميل
عمار:قوليلى يا سارة عملتى ايه النهاردة عند ندى وانتى بتزوريها
سارة:كان يوم جميل اووى طنط ليلى اخدت مى ونزلوا تحت وفضلت انا وندى لوحدينا فضلنا نتكلم كتير اووى
عمار:كنتوا بتتكلموا فى ايه بقى
سارة:كانت بتحكيلى عن مواقف حصلت ليها مع المرضى الى كانوا فى المستشفى بتاعه باباها بس مواقف كوميدية جدا فطست من الضحك عليها وهى كمان كانت فطسانة من الضحك
ابتسم عمار وقال:بتبقى جميلة وهى بتضحك
ثم نظر الى سارة وقال:صح
نظرت اليه سارة بشدة وقالت:صح
عمار:جابتوا سيرتى وانتوا بتتكلموا
سارة:مش فاكرة
عمار:حاولى تفتكرى
سارة(بعد تفكير):ايوة افتكرت سألتنى انت بتشتغل ايه
عمار:بجد
سارة(ببراءة):اه والله
عمار:قولتلها ايه
سارة:قولتلها انك مصمم ازياء
عمار:وقالت ايه
سارة:معلقتش غيرت الموضوع عالطول
عمار:مسألتكيش عن اى حاجة تانية خاصة بيه
حركت سارة رأسها يمينا ويسارا فقط
عمار:احكيلى يا سارة كل الكلام الى دار بينكوا بالظبط
سارة:هحكيلك بس بشرط
عمار:اشرطى يا ست سارة
سارة:بعد ما هحكليك هسألك سؤال لازم هتجاوبه
عمار:ماشى موافق
سارة:اوكشن احكيلك بقى
عمار:احكى
.................................................. ........................
ألقى كل الاشياء التى كانت موضوعه على المكتب امامه ثم قال بصوت عالى:هى ليه مش عايزنى
وضع مراد يده على كتف اخيه وقال:يا بنى اهدى البت قالت هتصلى صلاة استخارة مغلطتش يعنى
اسر:هى مقدرتش تقول انها مش موافقة لانها خايفة من ابوها فقالت تتحجج بحجة زى دى مؤقتا لغاية ما تشوف هترفض ازاى
مراد:مأظنش
اسر:لا هو كده بالفعل ...انا الى مضيقنى هى ليه مش عايزنى ماهو لو فى حد فى حياتها خلاص هنسحب وهرفض الجوازة دى بس انا متأكد ان مافيش يبقى ليه مش عايزانى
مراد:يا بنى هى متعقدة من الرجالة كلهم وشكلها مش عايزة تتجوز خالص
اسر:ليه هما كل الرجالة زى ابوها
مراد:هى شايفة كده
اسر:انا مش هستحمل انها ترفضنى انا هنزل اقول لبابا انى مش عايز اتجوزها
مراد:بطل جنان على اساس ان بابا هيقولك خلاص يا حبيبى الى انت عايزه ... بابا عايزك تتجوزها حتى ولو انت رفضت هيخليك برضه تتجوزها
اسر:ليه
مراد:دماغ ابوك دى محدش يفهمها غيرى
اسر:طب ماتفهمنى
مراد:بص يا سيدى شركات عمى محمود نصها باسمك والنص التانى باسم عمى محمود الى هتبقى بتاعه مى بعد ما يموت وطبعا لما مى تتجوز... جوزها اكيد هياخد كل حاجة علشان مى مالهاش فى البيزنس وبدل ما مى تتجوز واحد غريب ويجى يقرفك فى الشركة تتجوزك انت وتبقى انت صاحب كل حاجة فهمت يا كبير
اسر:بابا بيفكر بالطريقة دى
مراد:طبعااااااا يا بنى مش بقولك دماغ بابا دى محدش بيفهمها غيرى
اسر:لانك شبهه فلازم طبعا تكون فاهمه كويس
مراد:تصدق اول مرة تقول حاجة صح
اسر:تصدق بقى انك صدعت دماغى اتاكل على الله بقى وروح اوضتك
مراد:ماشى يا عم متزقيش
.................................................. ........................
"انا كده حكتلك كل حاجة قولناها النهاردة اسألك السؤال بقى"
عمار:اسألى
سارة:انت ليه مهتم بندى كده ...هو انت حبيتها ولا ايه
عمار:لسه بدرى اووى على الكلمة دى ممكن اعجاب مش اكتر او بحس انها مختلفة عن كل البنات وساعات بحس ان هى دى البنت الى انا عايزاها تكون شريكة حياتى...حقيقى مش عارف
سارة:حسيت بكل ده فى الفترة القصيرة دى
عمار:شكلى ببالغ اووى صح
سارة:مش عارفة .
عمار:اانا محتاج اتعرف عليها اكتر بس ازاى
سارة:اخطبها
عمار:اخطبها!!!
سارة:ايوة لازم يكون فى حاجة رسمى بينكوا علشان تقدر تتعرف عليها اكتر
نظر عمار امامه فوجد البواب يفتح بوابة الفيلة وسيارة احد ما تدخل من الفيلة
عمار:مين الى جاى ده
نظرت سارة وقالت:دى عربية ندى
وبالفعل كانت ندى فتحت باب العربية ونزلت منها
عمار:دى بجد ندى
سارة:ايه الى جايباها وهى تعبانة
عمار:مش عارف...روحى افتحيلها الباب
سارة:حاضر
خرجت سارة من الشرفة بالفعل وفتحت الباب قبل ان تدق ندى على الباب
ندى:ايه يا سارة كنت عارفة انى جاية ولا ايه
سارة:انا كنت واقفة فى البلكونة وشوفت حضرتك وانتى بتنزلى من العربية
جاءت ليلى من الخلف وقالت:مين يا سارة
ندى:انا يا ماما
وذهبت اليها وعانقتها
ليلى:مالك يا ندى وايه الى خرجك وانتى تعبانة
ندى:ممكن نقعد وهحكيلك كل حاجة
ليلى:ممكن
ذهبوا الى المكان الذى يجلس فيه عزيز وعمار الذى انضم اليه بعدما خرج من الشرفة عندما اتت ندى وجلسوا جميعهم سويا
ندى:ازيك يا عمو عزيز
عزيز:ندى ...ايه الى خرجك وانتى تعبانة
ندى:انا كويسة يا جماعه والله
ليلى:انتى عالطول كده بتقولى انك كويسة رغم الى جواكى بيكون عكس كده تماما
ندى:انا جاية النهاردة مش علشان نتكلم عنى انا جاية علشان نتكلم عن موضوع مى واسر
ليلى:انا معترضة على الجوازة دى وقولت رأى وانتى سمعتيه كويس يا ندى
تنحنح عمار وقال:بعد اذنكوا يا جماعه انا وسارة هنطلع اوضنا
ليلى:اقعد يا عمار انت مش غريب
عمار:بس
قاطعه عزيز قائلا:خلاص يا عمار اقعد بقى
عمار:اوك
عزيز:نرجع لموضوعنا ممكن افهم بقى انتى معترضة ليه يا ليلى
ليلى:علشان مى مش عايزاه هتجوزوها غصب عنها
ندى:ماما مى مش معترضة على اسر هى معترضة على فكرة الزواج عموما
عزيز:يعنى مى مش عايزة تتجوز خالص
ليلى:ايييه!!!
ندى:ايوة هى مقررة كده
ليلى:ليه
ندى(بحزن):خايفة تتجوز واحد يعمل فيها الى بابا عمله فى حضرتك وتجيب طفل يتعذب زى ما انا اتعذبت او يكون زى خالو محمود وبرضه يعمل زى ما بيعمل فى مى
ليلى:طب ما انتى اتعذبتى زيها بقيتى زيها برضه معقدة ومش عايزة تتجوزى
نظر عمار الى ندى بشدة عندما سمع هذه الجمله وانتظر يسمع اجابتها بلهفه شديدة
ندى:لأ طبعا
عزيز:ليلى انتى الى بايديك تقنعيها وتخليها توافق على الجوازة دى
ندى:ايوة يا ماما هى بتثق فيكى جدا وبتسمع دايما كلامك فاكرة لما اقنعتيها انها تدخل كلية الحربية رغم انها كانت معترضة تماما بس كلامك اقنعها وخلاها توافق
ليلى:يعنى انتوا شايفين ان الجوازة دى هتكون صح
ندى:ايوة طبعا اسر طيب اووى وحنين كمان هتلاقى معاه كل الى اتحرمت منه وهيحميها من تسلطات ابوها وعمره ما هيسمح لخالى انه يدخل فى حياة مى بعد كده
عزيز:وقبل كل ده اسر بيحبها انتى مش لاحظتى كده خالص يا ندى
ندى:لاحظت كذا مرة بس كنت بكذب نفسى لان لو كان بيحبها بجد هيتعذب اووى لانه حب من طرف واحد وانا مش عايزة اخويا يتعذب
عزيز:مى فى النهاية بنت محتاجة للحب واالامان والحنان لو لقت كل ده مع اسر هتحبه اكيد وطبعا مينفعش اسر يبين ليها كل ده الا وهو جوزها
ندى:لو كلنا حاولنا نقنعها وعرفناها اننا كلنا موافقين هتوافق اكيد
عزيز:صح ...قولتى ايه يا ليلى
ليلى:خلاص هحاول اقنعها
ندى:ايه رأيك يا ماما تيجى معايا دلوقتى انتى وعمو عزيز ونقعد معاها ونحاول نقنعها
ليلى:دلوقتى
ندى:ايوة
ليلى:مستعجلة ليه كده
ندى:خير البر عاجله يا ماما
عزيز:خلاص يا ليلى نروح معاها ونقعد نتكلم مع مى وكمان مى اكيد محتاجة ليكى دلوقتى جدا
ليلى:خلاص يلا بينا
عزيز:عمار ...سارة ...هتيجوا معانا
عمار:لا يا خالو اتفضلوا انتوا
عزيز:ماشى .
انصرف عزيز ومعه ليلى وندى وتبقى عمار وسارة
عمار:عارفة يا سارة
سارة:هااا
عمار:حسيت من كلام ندى قد ايه هى حزينة
سارة:ايوة
عمار:ندى هى كمان محتاجة للحب والحنان زى مى بالظبط
سارة:تفتكر اسر اخو ندى ده هيكون زى ما هما قالوا
عمار:ايوة... صحيح انا متكلمتش معاه غير يوم كتب الكتاب بس ارتحت ليه اووى وحسيت انه جدع ورجل بجد
سارة:يارب يكون بجد كده لان مى صعبت عليه اووى بس اكيد ربنا هيعوضها بيه وندى بكرة اكيد هتلاقى الشخص الى هيعوضها عن كل الى شافته فى حياتها ندى بجد تستاهل كل خير بس الله اعلم هتلاقيه امته وفين
عمار:الشخص ده موجود ومستعد بجد يحبها ويسعدها ويعطيها كل الى هى محتاجاه ومش لاقيها
ندى:مين الشخص ده
عمار:مش مالى عينك ولا ايه يا بت انتى
سارة:انت يا ابيه
عمار:ايوة انا... خلاص قررت انى هفاتح خالى فى الموضوع ونروح نطلب ايدها
سارة(بفرحة):بجد يا ابيه
عمار:بجد
سارة:فرحتنى اووى ...ربنا يتمملك على خير
عمار:امين
أنت تقرأ
عاشق يريد الانتقام
Romanceتظن ان عليك الهروب ربما ألمك ما انت فيه لذلك تريد ان تهرب لا تعرف الى اين بالتحديد ولكن ما تعرفه انك تريد ان تهرب الى مكان تنسى فيه جروحك واحزانك واهاتك والامك ربما قرار الفرار صعبا فكيف تترك المكان الذى حييت فيه بسهولة ذلك المكان الذى شاهد اجمل...
