الشاعر ايهاب المالكي
انه من الجرح يا صاحبي تعافيت
عبرت و المنية بيومه اتبدل
لكطت السنين و لحكت على الضال
و ضحيت المصوفر كبل لا يذبل
تانيت منياتي المامنعسه تنام
حته اكدر بسكته من القيود افتل
عفت بيت ابوذيه عله العش مكتوب
كلبي بفركة الخلان وج ناح
وبديت انحاز للشمات وج ناح
صدك خليتلي ريشات وجـ ناح
لكن صفك جنحي لمن رتدت ارحل
صفك جنحي لحت غيمه
عفت ذاك الغصن هيمه
عمر وياك ادور حل
جبيره السمه وين اسأل
اخاف اشرد و ماندل
الا ان قررت حسيت عمري ضاع
شفت الطير ثاري من يطير اسهل
اثاري العش عذر للمايعرف يطير
اكول الشامت شبيه ما يريد ارحل
حركني الظن مثل لعبت الغميضان
وره حايط شوك بلوعتي تختل
جنت الخاطرك تحلف بخلكي الناس
انازع و ليمر يشوفني مدلل
حكت لغلاطك بنصين كلبي اعذار
ترفه تغار منهه احياكته المغزل
اضوكك بالجفن و ستطعمك بالروح
واجمد بعدك و بهواك انحل
مدينة ظني تشبه دولة افلاطون
شفتك بيهه فكره استبعدت تفشل
طين اتغلب بقوه عله نار ابليس
تغلط بس انه اشوفك بس اكول اغفل
وتلمس اجفونك لمست المكفوف
اريد الكالي دمعه لو جفن مبتل
و اتركك وسمع بعزتك تصهل خيل
خطوه تكلك امشي خطوه لا تنذل
وانه غيمة برد ما بيهه بس افياي
اطي الشمس ظهري وانجوي اتحمل
مرات اختنك لمن يجيني الليل
وفك شباج صدك ووكف اتأمل
صياد احس روحي و النهر و شل
اشوفك جاي ليه واركض اتخيل
اوصل للنهايه و ابتدي من اول
اذا رفضت اضنوني جيتك عله البال
اغافلهن واكلك ما عليك اقبل
اغافلهن مغافل روج بالراس
عله نيتي وثاري طبع الذيب بالراس
العكل شيفيدني ومتروك بالراس
و الكلب ليه الراي و الشور و الحل
يومن بدونك كنت اكضيه مكسور
تبطي الدكايك فيه و الوكت يثكل
روحي بجنبك مثلت شاهد الزور
والحق من صوبي لصوبك تحول
كنت ارتجيك تكون في ظلمتي نور
وليل بروحي بله لابعاد طول
لما تركتك صاحلي الشوك معذور
و الحب من مهر الاماني ترجل
عفتك بس مدري شنه نسيت وياك
اطمأنان روحي و الامان اختل
اخاف من الندى و الورد ما ثق بيه
اذا بلبل يغرد نار يمه اشعل
وراك الماي صافن و النجوم احجار
خصر الشمس شفت منه ليل انسل
اجيتك و التعب جف اليفك الباب
احس لوحة حياتي بفركتك تكمل
وصيت كلبي وكلتله كلشي يهون
نوط اجروحك عله الروح شكله
يكلبي وسبب ذل الطير شكله
منو يعرف النوم شلون شكله
لانه لا شايفه ولا مار بيه
