مسألة انتقام

الجزء 8

الجزء الثامن :

الدرك و الشرطة القضائية و الشرطة العلمية بداو تحقيقات فالجرائم، أول جهة غادي تبدا التحقيق هي الدرك الملكي ديال تمارة من بعد ما لاحظو الناس الريحة خانزة خارجة من الدار و الدم فالباب اتصلو بالدرك الي جاو خرجو الجثة ديال مراد بنعثمان، بداو البحث ملقاوش لا البصمات لا حتا دليل غير اثار دم فالأرض من شي سباط قياس ديالو 42 ، و الرقم لمكتوب بالدم حدا الباب (1/5).
أما عصام السويدي ملي طاح فالقهوة و هزاتو سيارة الإسعاف وصل للسبيطار ميت، الطبيب ملي شافو لاحظ شي حاجة نازلة ليه من فمو لونها أبيض و حس انه الوفاة ماشي طبيعية و ممكن نتيجة ديال شي حاجة مسمومة كلاها ،قالوها للشرطة الي مشات للقهوة و شدات النادل ،قامت شرطة العلمية من بعد بإجراء بحث في مواد القهوة مستعملة فماكينة القهوة و كل ادوات لقات كلشي طبيعي ولكن في نفس الوقت تأكدو من تشريح انه عصام سويدي مات حيث قهوة مسمومة ،بداو التحقيق مع النادل و هو يقوليهم انه كلشي كان طبيعي إلا ملي مات السيد و من بعد ملي دخل للطواليط لقا فالمرايا مكتوب (2/5) بالعكر و مسحها بواحد زيف.
سمير الفاطمي وصل للسبيطار ابن سينا فحالة صعيبة و تقريبا محروق كامل حروق من درجة ثالثة و لكن مماتش ،جات الشرطة مقدروش يهدرو معاه حيث لقاو الطبيب دخلو للإنعاش، و لكن لاحظو فزاج ديال الطوموبيل لور رقم (3/5), إدارة الأمن الوطني غادي تربط بين الجريمتين حيث بجوجهم فيهم نفس الاشارات و الأرقام مرتبة ،شرطة قضائية عطاو للملف أهمية كبيرة و دوزوه للعميد عبد الرحمان بوذار من نخبة الامن الوطني على صعيد الوطني و معروف بحله للعديد من القضايا الصعبة، بدا البحث وشك انه ممكن تكون عصابة مخدرات كتصفي الحسابات تواصل مع درك تمارة لأخبروه عن قضية قتل مراد بنعثمان و نفس الإشارة (1/5) ، ملقا حتا علاقة بين هاد ثلاثة و عصابات المخدرات و صافي عرف بلي الي قتل هاد ثلاثة شخص واحد يمكن صاحبهم عندو معاهم شي حساب!!! كلشي ممكن، قاتل محترف مكيخلي من وراه حتى أثر أو دليل إلا إمضاء ديالو بالأرقام ،الأمل ديالو الوحيد هو يفيق سمير و يهدر أو القاتل يدير شي خطأ.
العميد عبد رحمان بوذار ركز على أهمية ديال هادوك ارقام /5 و استنتج انهم باقين جوج ،دار بحث و لقا 3 الناس صحاب 3 لماتو، دار معاهم تحقيق و لقا عندهم حجة الغياب و معترفو بحتا جريمة أخرى،عرف العميد انه جوج منهم غادي يقدرو يموتو و دار عليهم الحراسة، بوليسي سيڤيل بحوايج عاديين على كل واحد كيحضيه من بعيد فين ما مشا.
البنت : هادشي كامل ماغاديش يمنعني باش نكمل الانتقام ديالي رجعت سمعت التسجيل الولد رقم 4 هو خالد المعتوق ،واحد الخايب مفيه ميتشاف و قصير و هو لكان كيشرب فيهم بزاف و مكيبقاش عارف شنو كيدير كيفوت فالشراب,مراد وراني فين كيسكن و قاليا انه كيشرب معاه فواحد بار معروف فوق شارع محمد الخامس بالرباط، مشيت ليه حدا الدار ديالو واحد صباح غير باش نشوفو من بعيد جلست فواحد قهوة و بان ليا خرج و لكن شفت واحد تابعو من بعيد و عرفتو بوليسي مراقبو ،صافي تراجعت و لكن حتا حاجة ماغادي تمنعني ضروري غادي نكمل الخطة ديالي......
#بنت_وزان
#كلكم_ظلمتوني
#إغتصاب_فتاة