القماري الغريبة... طارق اللبيب

الأخيرة 2

  انا طبعا" خليت الناس بتكلمو في كلامهم ..وقمت خشيت جوة في الاوضة ..
معزة جات لاحقاني .. قالت لي انتي غبية يافاطمة؟.. قايمة ليه؟ امي قربت تقتنع .. امي هسي باقية بين نارين .. عايزاك انتي شديد .. ومتألمة من حالة مصعب ..
والله يافاطمة موضوعك ده شكلو ح يظبط .. قلت ليها كيف؟
قالت لي انا اتصلت على صفاء ..ووريتها الصورة انو مصعب مابحبها ..وبكرها وبحب فاطمة ..ومصعب ماقادر يتصرف عشان امي واعدة امك ..
وصفاء قالت براها بتفسخ الخطوبة .. بس انتي اصبري ..مسألة زمن
وقولي لي مصعب ..يطلع من الحالة دي ..الفرج قريب ان شاء الله ..
انا قلت ليها يامعزة.. انا مصعب ماعايزاهو.. انتو ماعايزين تفهموني مالكم؟
بالاختصار ياجماعه .. انا خليتهم في الحالة دي.. ومشيت الداخلية ...
يوم الجمعة من الصباح.. وتاني انشغلت .. وحاولت انسى .. قدر ماحاولت ماقدرت .. اول ما اصحى مافي خيالي غيرو .. وبنوم وهو اخر انيس في قلبي وروحي ..

حقيقي يا جماعة .. انه كلام مصعب لامو قدامي .. خلاني زي المشلوله ... و حسيت فعلا انه انا ما باقدر اعيش من دونو ... 

 لكن اسوي شنو.. انا زاتي مان عارفة .. واخبارو مقطوعة مني .. 

والسنة انتهت وانا امتحنت وخلصت الامتحانات باحر نفس . واشتغلت فيها زي الفل .. وبقيت على سفر ..وانا مسافرة عمي نصر قال لي كلام ..
قال لي موسطاني ليك عمتك .. تقبلي بي مصعب لانو خلا خطيبتو ..
وللا خطيبتو خلتو ماعارف .. !!
قلت ليهو معليش ياعمي .. اتاخر الوقت .. انا ماقبلانة .. بعدين انت قبل كدا ماقلت لي ابعدي منهم الناس ديل؟ ..
عمي قال لي المشكلة الظهرت يافاطمة .. هسي انو عمتك دي بتريدك ريدة مبالغة .. ودي حاجة نادرة ..
انا طبعا ماقدرت استوعب .. وافكر في كلام عمي .. لاني بقيت مزعزعة . ومامطمئنة ..
قلت ليهو اسمع ياعمي نصر . قول ليها قالت لالا ..
فاطمة رفضت وابت توافق وخلاص ..

  وبالي كلو بقى في السفر .. وكيف اقدر اودع صاحباتي وزميلاتي .. وكيف اقدر اعيش بدون ليلى وعشة وبدرية .. ديل بقن روحي وقلبي وكل حاجة في دنياي .. والله بكينا جنس بكا .. الداخلية دي اي واحدة تجعر بي جيهة .. غايتو سبحان الله .. وحات الله يومين نحن مانمنا بي الونسة .. وخايفين من الفراق .. ياسلام ياسلام .. ايام عجيبة عديناها .. بي حلوها ومرها ..
اكتر حاجة الزول يكسبها .. خوة ما بتتنسى ولابتروح .. والله اكتر من الاخوات بنات الام والابو الفي البيت ..
واليوم الاخير جات بيتت معانا ليليان العسل.. وطبعا برضو خطبها صاحب ابوها في السعودية ..ونحن قاعدين نكاوي فيها بي الود (تيتو).. دا اسم الدلع بتاع طلال علي .. بنقول ليها كيف (تيتو علي .. قالب الجلي ..)
ياسلاااااام على الايام ديك ..
ياسلام على بنات الداخلية.. زي القماري الغريبة الاجتمعت بدون سابق معرفة وتأخت ومسكت في بعض ..
ياجماعة . اي زول بقرا في حروفي دي انا بقول ليهم بنات الداخليات شريحة مظلومة ..
ماتقولو عنهن حاجة انتو ماعارفينها .. لو في اي انحراف.. بكون بي نسبة ضئيلة لاتكاد تذكر.. وانا شخصيا ما لاقاني .. بس انا بقول .. حقو الحكومة تصرف على بنات الداخلية.. زي مابتصرف على الاجهزة النظامية .. حقو الجهات الرسمية ماتحوج البنات ديل لاي شي .. ويحاولو يتابعو كل صغيرة وكبيرة عنهم ..

انا كل ما اتذكر مقبولة قلبي بوجعني ..   

  اها ياجماعة.. انا سافرت ووصلت البلد .. حزينة ومحطمة ومهدودة نفسيا .. وظاهر علي التعب والارهاق ..
اول ما وصلت .. بقى مصعب مسيطر على افكاري.. وماقدرت اعيش .. والاكل والشراب مسخان علي .. وكل يوم يمشي انا بحس اني ماشة وكرانة .. وحاتلة .. بدل ما انسى ..
وندمت ندامة شديدة على ردي الريتو على عمي .. وقفلت الباب براي في وشي ..
وبقيت بندب في حظي زي الهبلة .. وحسيت باني اتعاورت اكتر من اللازم ..

  واتمنيت لو القى فرصة .. وبصيص امل يجمعني بي اول حب دخل قلبي وسيطر على حواسي ..
بعد فترة امكن عشرين يوم.. ابوي اتصل من السعودية .. قال نازل البلد ..
وانا فرحت قلت جية ابوي ممكن تخفف علي شوية .. اها بوي لمن جا .. وبسأل فيني من اخباري ..
قال لي .. احكي لي الحصل مع مصعب ..
حكيت ليهو كل حاجة.. الا القصة بتاعة الاتهام والرسايل .. وقلت ليهو انا قفلت الباب ده يا ابوي .. مع اني انا عايزة مصعب.. ومصعب عايزني.. لكن حاسة انو عمتي قبلت بي ترضية لولدها ..
ابوي قال لي.. لالا يا فاطمة انتي غلطانة ..

عمتك شالت رقمي من نصر اخوي .. واتصلت علي في السعودية تبكي .. وقالت لي انا واقعة في عرضك يامحمد .. تقنع فاطمة تقبل بي مصعب ولدي .. نحن مابنقدر نبقى بدون فاطمة .. نحن بقينا نحبها اكتر من حب مصعب ليها .   

  تصدقو ياجماعة ابوي بحكي لي كدا انا بكيت ..
ابوي قال لي وانا وعدت عمتك اني ازوجك لي مصعب ..
وقلت لي عمتك .. ان شاء الله الوجعة السببتها ليك قبل سنين .. اكفر عنها بي اني اجمع مصعب وفاطمة .. انتي رايك شنو ؟
حتخذليني يافاطمة ؟
قلت ليهو مستحيل يا ابوي اخذلك .. انت البتقولو لي انا بنفذو.. واقول ليك سر يا ابوي؟ .. انا فرحت شديد  

  طوالي شال التلفون واتكلم مع عمتي .. وقال ليها خلاص يوم الخميس كويس تعالو حبابكم ..
يعني جايننا يوم الخميس؟؟ ..
والله ياجماعة انا فرحت فرح لايعلم بيهو الا الله .. وحسيت بالدنيا لونها اتغير بقى بمبي وطعمها اتغير بقى حليو حليو ..وبقت كل حاجة مختلفة ..
وطوالي قدام ابوي شلت التلفون واتصلت على مصعب .. (غايتو جنس خفة على انا)
وقلت ليهو حبيب قلبي .. يا ريتني لو بقدر امسك ضنب الخميس عشان اجيبو قبل التلاتاء ..
والله مصعب ده حسيت بيهو قرب يجيني طالع بالتلفون ..
وقلت ليهو ..اديني عمتي اسلم عليها .. وسلمت عليها واعلنت ليها شوقي وحبي وموافقتي ..
ويوم الخميس بيت ناس عمتي كلو.. اهلهم وقرايبهم جونا مالين حافلة .. وعمتي دي من الفرحة قربت تصدم .. التقول ماها عمتي المكجناني ديك .. وبارياني من حتة لي حتة .. فاطمة .. فاطمة .. لامن الناس قالو لي انتي عمتك دي عاملة ليها عمل سحر محبة؟
وامي تعاين لي عمتي وتتبسم ..
اها خطبوني.. وابوي قال ليهم نعقد طوالي عشان انا ماعندي زمن .. بس نحدد يوم المناسبة ..
والحمد لله ربنا تم لي مرادي.. ووقفني واتزوجنا احسن زواج .. وكانت وصيفتي في الزواج صديقتي العزيزة بدرية طه .. طبعا" كل زميلاتي وصحباتي في الداخلية جوني للعرس .. وهسي انا بتكلم معاكم
وراقدة على قفاي .. في الشهر الرابع باول حمل .. ادعو لي ربنا يتمو لي ويحلني بالسلامة ..
وشكرا ليكم على حسن المتابعة والاهتمام
وبوصيكم على القماري الغريبة ..