قلت ليهو يا مصعب انا طالبة منك طلب ممكن؟
قال لي ممكن .. قولي ..
قلت ليهو عايزاك تحكي لي بالتفصيل.. الحصل والنقاش الدار في غيابي .. ومنو من ناس البيت الرافض الموضوع .. عشان انا اقدر اساعدك ل.. و فضل فيها مساعدة ..
قال لي مافي داعي اقوم افت ليك ناس بيتنا.. واقول ليك رايهم فيك .. كدا انتي زاتو ما بكون عندك تشجيع تعملي حاجة ..
قلت ليهو بالعكس .. كدا انا بمسكهم واحد واحد .. واقنعهم بطريقتي ..
قال لي والله طبعا" المشكلة كلها في الوالدة عمتك .. مارضيانة بالموضوع ..
عندها بت صاحبتها ساكنين في الجريف .. البت دكتورة .. لكن دكتورة رخمة كدا.. اصلا ماحبيتها ولاهضمتها .. اها اظنها الوالدة وعدت صاحبتها انها تزوج لي بتها ..
واتفقن بي وراي بدون مايكون عندي علم ولا راي ..
وامي تشيل وتشكر في البت .
والمشكلة البت الدكتورة ماصدقت .. بقت تراسلني وكدا.. لكن انا طبعا" حسمتها .. وقلت ليها الموضوع سابق لي اوانه وانا ماعندي استعداد نفسي ..
وهي قالت لي .. الزمن كفيل يغير رايك فيني .. اها لاهسي الزمن الكفيل ماغير راي فيها ..
و امي بتحاول تتكلم معاي .. عشان انا ما ارتبط باي انسانة غير دكتورة صفاء ..
وطبعا امي بتأثر على اخواتي بي كلامها ورايها .. واعتراضها مابتحكيهو لابوي .. لانو حيقول ليها .. كيف ترفضي بت خالو عشان واحدة غريبة ..
لانو ابوي مابفكر زي امي اساسا ..
وبهتم جدا بالارتباطات الوجدانية.. والحاجات المادية والظاهرية دي مابشتغل بيها ..
انا ياجماعة لمن سمعت كلام مصعب.. حسيت باني صغييييرة .. فعلا انا ما دكتورة .. ولا أهلي ساكنين الجريف .. يعني المقارنة بيني وبين صفاء معدومة ..
والله شدة بطني مافارت .. قلبي قال لي ارجع امتحن علمي تاني من الاول.. واجيب الطب وابقى دكتورة ..
شنو يعني دكتورة؟؟ .. غايتو جنس حالة ..
مع الاحباط الحصل جواي ..لكن كل راس مالي هسع .. تمسك مصعب دي اكتر حاجة مطمناني .
قلت ليهو مافي مشكلة يا مصعب انت ماتشيل هم .. امك دي انا بعرف ليها ..
قال لي لالا انا ماشايل هم .. هي اساسا عارفاني .. انا الفي راسي بعملو ..
قلت ليهو لكن يا الغالي.. انا مابقبل اخش لي على ناس هم رافضني ..
قال اهاااااااا ده الكلام المابنفع .. عشان كدا قبيل قلت ليك مابحكي ليك ..
المهم ياجماعة .انا عرفت كل الحاصل في غيابي .. واتفرقنا انا مشيت على صاحباتي وبقيت غاتسة في الحاجات الدراسية .. ونشتري في الدفاتر والامور دي ..
ولغاية نهاية اليوم ماكان في اي محاضرة لليوم التاني .. انا ماعارفة قصة اليومين الاوائل .. مابكون في محاضرات .. دي عادة سودانية عريقة ولا شنو؟
انتهى اليوم ورجعنا السكن .. والحمد اغلبية زميلاتي بتاعة السنة الفاتت معاي .. الا ليليان .. طبعا اخوها جا برلوم السنة دي ياداب .. في جامعة تانية انا ماشفتو نهائي ..
وامهم اجرت ليهم بيت .. ليهم الاتنين وسكنت معاهم خالتهم .. موظفة في ديوان الضرائب ..
وليلي جعفر معاي .. وبدريه .. وعشه .. الثلاثي المرح حبيبات قلبي . اصلا ما بنتفارق .. من اول ما اتلاقينا ..
ونفس الجهجة الكانت في الداخلية الفرعية .. هنا ضقنا منها انواع بطعم مختلف .
يوم جابو لينا برالمة في المجمع ..
وسكنوهن في المجمع وضايقونا في الغرف بتاعتنا .. ونحن عارفين انو البرالمة بودهم الداخليات الفرعية .. لكن اكتشفنا انو الحكاية فيها فرز ..
وفي بنات من طراز خاص كدا.. ودواعي حزبية بسكنو في المجمعات مع انهن برلومات ..
انا طبعا" ماكنت بصدق القصة دي الا شفتها بي عيني .. ياجماعة نحن مادام انو في الحقل التعليمي .. بنستخدم الوساطات وبنميز بين الطلبة ..
معناها حياتنا كلها حتمشي غلط ..
المفروض القانون البسري على الطلبة .. مايكون في ولا طالب مميز لا على اساس عرقي ولاحزبي ولا وساطات ..
عشان بلدنا تمشي لي قدام تحصل العالم ..
ونحن طبعا البتتكلم فينا .. الله قال بي قولا .. ممكن يلفقو ليها اي مشكلة ..وتروح في خبر كان .. عشان كدا عايشين جبناء لغاية ما طلعنا مستورين الحمد لله ..
وقلبي معا الطالبات الجداد .. الودوهن الداخليات الفرعية .. حيضوقو نفس الحناضل الضناها السنة الفاتت ..
مرت الايام وانا كاتمة جواي البشارة المفروض اكلم بيها مصعب ود عمتي .. وهي انو ابوي موافق على ارتباطي بيهو ..
ليه؟؟ .. لاني ماعايزاهو يخطي اي خطوة .. من دون مايزبط مواضيعو مع اهلو .. وياخد رضا والدينو ..
بس خايفة انو عمتي تقدر بطريقة ترمي مصعب في البت الدكتورة.. وانا اروح في خبر كان ..
يوم مصعب قال لي انا عايز اتشاور معاك في موضوع .. عندنا زول من أقارب ابوي من بعيد كدا رجل اعمال كبير .. جانا في البيت .. جاب زوجتو للوالدة .. اها الوالده اتكلمت معاهو انو يشوف لي شغل في شركة من شركاته .. وهو قال ليها ولدك شهادتو كويسة .. وانا بشغلو خليهو يجيني ..في مكتب الادارة في شارع الستين ..
وانا مضطر اقدم استقالتي من الجامعة .. والله انا ماكنت عايز افوت من الجامعة واخليك ..
لكن طبعا" الشغل ده .. انا كايس ليهو من زمن ..
اها طبعا" ياجماعة لاحظتو انو عمتي عايزة تبعد مصعب مني .. باي طريقة .. لكن انا مستبشرة خير .. انو مصعب حيلقى شغل كويس ..ويأسس حياتو .. كان لي انا كان لي غيري .. انا بتمنالو الخير ..
الى اللقاء ..
YOU ARE READING
القماري الغريبة... طارق اللبيب
Short Storyكل مرة بحكي ليكم القصة براي .. الليلة انا عايز اكون مستمع معاكم .. .. ونخلي بطل القصة يحكي لينا .. وبالاحرى البطله انثى .. القصة دي غير حقيقية . لا احداثها ولا شخصياتها .. وانا اخترت شخصية انتقائية .. لان الشخصيات العوجاء لاتعنيني .. وده منهجي...
