سلامه عليكوا

رخصة للحياة

في ناس أن الحياة الحقيقية بتبقي و احنا اطفال و ناس تانيا بتقول أنها بتبدأ بعد سن ال60، لكن الحقيقة بقي أن الحياة بتبدأ أول ما تطلع رخصة و يبقي مفتاح عربيتك في جيبك. بلاش يا سيدي عربية، أن شالله حتي تكتك...بس علي الأقل ماقعدش أشحت حد يوصلني قبلها بأسبوع!!!

التوصيلة دي بتبقي أهم سبب في فشكلة خروجة أو معاد أي حد تحت 18 سنة! أنت متخيل أن حياتك كلها ممكن تقف علي توصيلة!!! يعني أنت لازم تفضل متزنب في البيت و مش عارف تخرج تشم هوا لحد ما حد معاه عربية يعطف عليك و ياخدك في سكته و هو نازل ( دة طبعاً لأنه عمره ما هينزلك مخصوص)

و علي فكرة الموضوع دة مش في الخروج و بس، ده في أي حاجة مالهاش دعوة بالدراسة. يعني أنت مسلاً لو لا قدر الله عندك موهبة في أي حاجة بعد الشر و عايز تنميها بcourse أو عايز تروح تمرين رياضية (و دة للبنات أكتر) أو حتي لو عايز تشترك في حاجة خيرية بتتعمل، هيبقي عندك حل من 2
1_تتزل و يطلع عين اللي جبوك عشان كل مرة تقنع حد يوصلك
2_يتخرب بيتك تاكسيات (دة طبعاً لو أهلك وافقوا)

و في الحالتين هتحرم تخرج برة بيتكوا و تدعي ربنا أنه يهون الكام سنة اللي واقفين بينك و بين الرخصة دول! هونهم علينا يا رب!!
سلامو عليكو