HE'S INTO HER Season 3 | COMPLETED |

CHAPTER 174

Nagkamali ka ng binangga, Chairman Enrile. Ang kinuha mo sa amin ay katumbas ng buong pamilya mo. At kaya namin kayong ubusin.

Hindi namin alam kung saan matutunton si Taylor. Magmula nang mapahamak siya sa Palawan ay wala na kaming nasagap na balita tungkol sa kaniya. Hindi ko makakalimutan kung paano siyang inasinta ng hindi pa namin nakikilalang babae. Hindi ko malilimutan ang kaniyang mukha. Kung paanong nagkaroon ng ganoong kakilala ang mga Enrile ay hindi ko alam. Ngunit isa iyong patunay na hindi kami maaring magpadalos-dalos sa pagkilos. Kailangan naming maging maingat. Gayong nasaksihan namin kung gaano karami ang kumilos nang magpaunlak kami ng bala at pagsabog.

DEIB'S POV

Naging masaya ang klase ko buong araw. Meron akong apat na major subjects at apat na minor subjects. Hindi mapawi ang ngiti ko hanggang mag-uwian. Wala pa akong nagiging kaibigan. Pero sa tingin ko ay hindi naman ako mahihirapan. Kakikitaan ng interes sa kursong ito ang halos lahat ng kaklase ko, at iilan lang naman kami. Masarap sa pakiramdam na ang lahat ng kasama mo ay tulad mong masaya sa ginagawa nila.

Tch. Hindi ko ma-imagine ang sarili kong nakaupo sa department of nursing at nagbibilang ng taong dumaraan sa hallway.

Nakangiti akong lumabas ng classroom at doon ko lang naalala ang iba ko pang dapat na gawin. Agad kong tinawagan si Taguro.

Mahal ko. Mahal ko. Mahal ko. Mahal ko. Mahal ko. Mahal ko. Mahal ko. 'Ayun!

"Oh?" hindi na talaga nagbago ang paraan ng pagsagot ni Taguro ng telepono.

"Hi, babe! I love you, babe!"

"Tss."

"Nasaan ka na?"

"Katatapos lang ng klase. Puro pagpapakilala, wala akong interes."

"Nakainom ka ba ng gamot mo?"

"Oo."

"Good. Pasensya na hindi kita napuntahan."

"Ayos lang. Kumusta ang klase mo?"

"Masaya." Hindi ko naiwasang mapangiti. "Nag-enjoy ako, babe. At dahil d'yan, lalo akong nai-in love sa 'yo, bwahahaha!"

"Mabuti kung gano'n." Batid kong hindi man lang siya kinilig sa sinabi ko. "Saan na ang plano mo niyan?"

"Ihahatid kita, syempre. Hindi ka pa magaling."

"Sige, magkita na lang tayo sa parking lot."

"Maaga pa, babe, baka gusto mo akong i-date?" nakangising tanong ko.

Sandali siyang nag-isip. Tch! "Wala ka bang klase bukas?"

"Meron. Pero tanghali pa. Gigising ako nang maaga para ihatid ka."

"Hindi mo na kailangang gawin 'yon. Kaya ko nang pumasok mag-isa."

"Kaya ko rin namang ihatid ka," nakangusong tugon ko. Bumuntong-hininga siya. Senyales na hindi magandang ideya para sa kaniya ang sinabi ko. Tch! "O, sige, bukas ay sasabayan na lang kitang kumain, ayos lang ba iyon?"

"Kung hindi makakaabala sa schedule mo, sa tingin ko ay wala namang problema."

"Napakapormal mo namang magsalita?" natatawang tugon ko. "Hindi ako ang mommy mo, babe."

"Pero ikaw ang boyfriend ko." Isa 'yon sa mga pinakakorning biro niya. "Tss, sige na, magkita na lang tayo sa parking lot."

"Pwede rin kitang sunduin d'yan, babe."