هاجسي وافكاري شاغلها غرامه

Part 25

ريماس:" غريبه ما شفتيه"

الترف بحده:"وش يدريني عنه ما شفت احد"

فاتن:"زين زين درينا انك ماشفتينه"

رفرفت الترف عيونها وهي تزم شفايفها من غير ماترد على فاتن اللي صارت تضحك بهمس وهي تناظر في ريماس اللي كانت تعض على شفايفها حتى تمنع ضحكتها

ناظرت الترف فيهم وقبل لاتتكلم تقدمت اثير منهم وهي تقول:"خلص اذان المغرب معد لكم عذر حق تقفلون المسجل"

ضحكت فاتن وهي تسحب جوالها:"ابشري وش تبغين نشغل"

ابتسمت اثير للترف:"لا خلينا نرقص على شي من ذوق الترف"

اشرت الترف على نفسها:"على ذوقي انا ليش؟"

اثير:"اي انتي ليش ماتسمعين اغاني؟"

ضحكت الترف:"اسمع بس صدقيني ان الحريم اللي جالسين في المجلس بينقدون عليكم اذا سمعو الاغاني اللي ارقص عليها"

جلست اثير على متكى الكنب بقرب الترف وهي تضحك بعد ما شافت فاتن شغلت شيلات وبدت ترقص هي وريماس

ناظرت اثير في الترف:" وش تحبين تسمعين لايكون انتي بعد زي سعود اخوك؟"

رفعت الترف حاجبها باستغراب:"ليش وش يسمع سعود؟"

اثير:"محمد عبده"

الترف:" وانتي مين اصلا؟"

ضحكت اثير:"اخت الهنوف"

تاففت الترف وهي تناظر في اثير:"منجدك انتي ومين الهنوف بعد؟"

اشرت اثير على اختها اللي كانت جالسه في صدر المجلس:"شفيك زوجة ولد عمك"

اؤمت الترف راسها بطفش لكن رجعت تبتسم بعد ما مدت اثير يدها لها وهي تقول:"انا اثير"

الترف:"وانا مايحتاج اعرف بنفسي ضنتي انك تعرفيني دامك تعرفين حتى وش يسمع سعود اخوي"

ابتسمت اثير باحراج:"تعرفين عاد جيران من سنين"

قاطعت الترف كلام اثير وهي تقوم من جنبها بعد ما شافت جدتها تاشر لها من بعيد:"استاذن جدتي تناديني"

رجعت اثير ظهرها على المسند وهي تكتف يدها على بعض وتهمس بصوت مايسمعه غيرها:" ماتنبلع"

وفي الجهه اللي قبالها وقفت الترف قبال جدتها اللي قالت لها:" بنت خالتك احوت وينها ماقلتين انها بتجي"

الترف:" الا يا جده بتجي بتجي"

صافيه:" عادت الدنيا مغرب متى بتجي ارسلي حد يشوف لها لا يكون فيها شي"