هاجسي وافكاري شاغلها غرامه

Part 25

لكنه لاحظ بعد ثواني ماجد اللي كان على يمين فهد وهو ياشر له حتى يقوم معهم لكن رفع سعود له يده من بعيد ياشر له بالنفي

ابتسم سعود وهو يراقب حماس فهد ويلاحظ عليه تغيره بعد الزواج نزل انظاره للزل يرجع ظهره على ورا وهو يلف مسبحته بين اصابع يده يتنهد بعد مازارته في عقله اللي ماكان يقدر يفكر بشي ثاني غيرها

حتى وهي مهب حوله كانت قادره انها تنزع عقله ابتسم وهو يتذكرها وهي واقفه قباله تدور حول نفسها وتدلل عليه

ماكانت اريام الا مثل امنيه تمناها وجت له كامله بكل الصفات اللي تمناها فيها بشكلها وبروحها وشخصيتها

ضحك وهو يتذكرها وهي تداعبه وهي تمسح على شفايفه وهو يدري انها ماطولت الا حتى ترهق نبضاته

جلس فهد في هذه اللحظه جنب سعود وهو يضحك:"غريبه هادي مهب عادتك ماقمت لعبت"

نزل سعود مسبحته يرميها على فخذه:"يسد ماجد همج بالدنيا"

ضحك فهد وهو يناظر في ماجد اللي كان متحمس:"وش جاه اليوم مستانس العاده ماتشوفه الا مكشر في العزايم ولا ورا البيت يدخن"

ابتسم سعود لماجد اللي كان متحمس وهو يلعب على الانغام الجنوبيه وشاف مازن يتقدم منهم وهو يقول:"لاتناظر في ابوي ياشر لك الظاهر انه دورك تقوم تصب قهوه"

ضحك سعود والتفت بعدها على عمه اللي كان ياشر على الساعه اللي في يده وفهم سعود انه يبيه يعجل بالعشاء

ناظر سعود في مازن وهو يضحك:"قوم عاونه لين اجيب العشاء"

اؤما مازن براسه لسعود اللي ركب سيارته وقبل لا يحركها فتح جواله حتى يتصل على المطعم لكن ابتسم باتساع بعد ماشاف رساله من اريام ارسلتها له قبل نص ساعه

قرا رسالتها وهو يحرك سياره ويبتسم:"راح اموت اليوم من الخجل"

رد عليها:" بسم الله عليك من الموت وش جايك؟"

ناظرت اريام في جوالها بعد ما جاها اشعار من رقمه وماتاخرت عليه في الرد:"خواتك مو طبيعيات ناوين يذبحوني!!!جالسه اسوي نفسي مجنونه وانا اسمع تلميحاتهم"

ضحك سعود كونه كان مبسوط على طريقة كتابتها بعد ماصارت ترسل كل كلمه لوحدها في رساله:"وش يلمحون له؟"

ترددت اريام في رسالتها كانت تكتب وتمسح وسعود كان ينتظرها ترسل كونها تاخرت لكنه رجع يكتب لها:" ضايقوك بشي؟"

كتبت اريام بسرعه:" لا محد مزعلني"

ابتسمت بخجل وهي ترجع تكتب:"بس كل ماجابو اسمك ناظرو فيني وهم يضحكون وتخيل وجدان بعد وش تقول انها ماتبي الحريم يخطبوني ومدري ايش مافهمت عليها بعدين اشرح لك"

ضحك سعود وهو يقرا كلامها:"عاشت ام سعود"

اريام:" ولدها اسمه سعود؟؟؟"

سعود:" ايه سمي خاله"

ابتسمت اريام وهي تقرا كلامه وبعد لحظات ارسل لها:"رايح اعجل بالعشاء ما ودك اجنب لك لسان الخروف؟"

ضحكت اريام :"ماتنسى انت؟"

سعود:"تبيني انسى شي يخصك؟والله اني اخسي"

اتسعت ابتسامتها وهي تضحك بخجل:" سعودي"

وقف سعود قدام المطعم يضحك من اعماقه بعد ما قرا اسمه اللي نسبته لها تنهد وهو يبتسم قبل لا يتصل عليها

لكنها شهقت وهي تشوف اتصاله و رمت جوالها بجنبها باحراج من غير ماترد عليها

----------------------------------------------

3400 كلمه

بيني وبينكم ماجد شخصيتي المفضله في الراويه