Daeက ကျွန်တော့်အိမ်ကိုပြန်လိုက်ပို့ပေးခဲ့သည်။ မပြန်မချင်း ကျွန်တော့်ကို ကလေးတစ်ယောက်လို တတွတ်တွတ်မှာနေသေးသည်။ ကျွန်တော်လည်းစိတ်အစဥ်တို့ လွင့်မျောလျက်အိပ်ခန်းအတွင်းသို့သာ တန်းဝင်လာလိုက်တော့သည်။
စိတ်ထဲမေ့ပစ်ဖို့ကြိုးစားကြည့်သော်လည်း ကျွန်တော့်မျက်လုံးထဲမှာ ထိုအမျိုးသမီးကို ကြည့်နေတဲ့ကိုကို့အကြည့်တွေက နေရာယူလာပြန်သည်။ ထိုအမျိုးသမီးဟာအပေါ်ယံအမြင်မှာတင်ကိုပြီးပြည့်စုံလွန်းသည်။ ယောကျာ်းတိုင်း စွဲမက်လောက်တဲ့ ခန္တာကိုယ်သွယ်သွယ်လျလျလေး၊ စိတ်အစဥ်တို့ငြိမ်းချမ်းစေရာ အပြုံးချိုချိုလေး၊ စသည့်အချက်များကို ထိုအမျိုးသမီးက ပိုင်ဆိုင်ထားလေသည်။ တစ်နည်းအားဖြင့်ဆိုရသော် ကိုကိုလိုချင်သည့် အနာဂတ်အမျိုးသမီးလောင်း၏ အချက်လေးတွေဖြစ်သည်။ ကျွန်တော်ဘယ်လိုယှဥ်နိုင်ပါမည်နည်း။
ခေါင်းအုံးထဲကို မျက်နှာအပ်၍ ရှုံးပွဲချငိုမိသည်။ ပထမဦးဆုံးအကြိမ် အချစ်ကြောင့်အသည်းကွဲခြင်းဟု အဓိပ္ပာယ်ဆိုရအောင်လည်း ကိုကိုနဲ့ကျွန်တော်ရဲ့ ဆက်ဆံရေးသည် နိမ့်လွန်းနေသေးသည်မဟုတ်ပါလား။ ဘယ်လိုပဲအဓိပ္ပာယ်ဆိုဆို ရင်ကွဲမတက်ခံစားရသည်မှာတော့ သေချာသည်။
~~~~~~~~~
ကျွန်တော်အိမ်ပြန်ရောက်တော့ Riအတွက်ဝယ်လာခဲ့တဲ့မုန့်တွေကိုရေခဲသေတ္တာထဲထည့်ကာ ရေမိုးချိုးလိုက်သည်။ ထို့နောက် ထိုကောင်လေးမလာခင် အခန်းထဲမှာတင် သီချင်းထိုင်ရေးရန်ဆုံးဖြတ်လိုက်သည်။ နောက်ပြီးကျရင် " ကိုကို " " ကိုကို " ဟုဆိုကာ အသံတစ်ဆာဆာ နှင့် ဝင်လာမည့် ထိုကောင်လေးကိုတွေးကာ ကျွန်တော်ပြုံးမိသွားသည်။
ခံစားချက်တွေကို သီချင်းစာသားအဖြစ်ချရေးလိုက်တော့ ကျေနပ်စရာကောင်းတဲ့ စာသားလေးတွေထွက်လို့လာသည်။ ကျွန်တော် သူမကိုတွေးရင်း ဖျစ်ညှစ် ထားတဲ့စာသားလေးတွေပါ။ တစ်ချက်တစ်ချက် Ri ဆိုတဲ့ကောင်လေး အတွေးထဲရောက်လာတာကလွဲလို့ပေါ့။ ဘယ်သူ့ကိုရည်ညွှန်းမိမှန်း မသေချာသလို ဘယ်သူ့အတွက်ကြောင့်ဒီလိုစာသားတွေ ဖြစ်လာသလဲဆိုတာလည်း မသိတော့ချေ။ သူမကြောင့်ပဲလား။ Ri ဆိုတဲ့ကောင်လေးကြောင့်ပဲလား။