« ម៉ាក់ ម៉ាក់យ៉ាងម៉េចទៅហើយ »
លោកស្រីផាកបើកភ្នែកមកឃើញកូននិងប្តីហើយគាត់ក៏និយាយឡើងតិចៗ បងសម្លាញ់ ប្រុសហ៊ុន គាត់ក៏សម្លឹងឃើញរាងស្តើងដែរតែមិនបាននិយាយអីទេ រាងស្តើងក៏មិនហ៊ាននិយាយអីដូចគ្នានាងបានត្រឹមសម្លឹងមើលគាត់ដោយក្រសែភ្នែកសប្បាយចិត្តដែលឃើញគាត់ដឹងខ្លួន តែក៏នៅព្រួយបារម្ភពីស្ថានភាពរបួសរបស់គាត់
ពេលគ្រូពេទ្យបានពិនិត្យមើលអាការគាត់បន្ថែមហើយឱ្យគាត់ញ៊ាំអាហារនិងលេបថ្នាំរួចរាល់ លោកស្រីផាកក៏កាន់តែមានកម្លាំងឡើង ពេលនេះគាត់មានកម្លាំងមានស្មារតីអាចនិយាយបានច្បាស់ដូចធម្មតាវិញហើយ តែគ្រាន់តែគាត់នៅឈឺកន្លែងដែលប៉ះទង្គិចនិងកន្លែងរបួសបន្តិច ឃើញគាត់បានស្រួលមកវិញបែបនេះសុងហ៊ុនក៏សាកសួរគាត់ពីហេតុការណ៍ដែលកើតឡើង
« ម៉ាក់ ហេតុអីបានជាម៉ាក់ស្រាប់តែធ្លាក់ពីលើជណ្តើរបែបនេះ ពេលនោះតើមានរឿងអីទៅ »
« ម៉ាក់ក៏មិនដឹងទេកូន ពេលហ្នឹងម៉ាក់មានអារម្មណ៍រាងមិនស្រួលតិចៗ ហើយក៏គិតថាចុះមកក្រោមមើលទេសភាពស្រូបយកខ្យល់អាកាសបន្តិចដើម្បីឱ្យបានធូរ ម៉ាក់ចុះជណ្តើរសុខៗ តែស្រាប់តែមានអារម្មណ៍វិលមុខខ្លាំងចង់ហៅគេឯងឱ្យជួយតែក៏ហៅមិនទាន់ ម៉ាក់ទន់ជើងហើយរបូតដៃដួលធ្លាក់ចុះមកដោយមិនដឹងខ្លួនទាល់តែសោះ »
« ពុទ្ធោ ប្រពន្ធសម្លាញ់របស់បង បើអូនមិនស្រួលខ្លួនហេតុអីក៏មិនព្រមប្រាប់គេឯងឱ្យជួយនាំចុះមក បើមិនអញ្ចឹងទេខលប្រាប់បងក៏បានដែរណា ហេតុអីក៏អូនសុខចិត្តចុះមកម្នាក់ឯងទាំងមិនស្រួលបែបនេះ » លោកផាកនិយាយហើយលោកស្រីផាកស្រាប់តែមានអារម្មណ៍សោកសៅចង់ស្រក់ទឹកភ្នែក គាត់ដកដង្ហើមធំបន្តិចរួចតបទៅលោកផាកវិញ
« ខលប្រាប់បង បងមានពេលមកមើលអូនទេ ? »
« ហេតុអីក៏អូននិយាយបែបនេះ ឱ្យតែអូនប្រាប់បងបងប្រាកដជាមកភ្លាម »
« បងនិយាយបាន តែអូនខ្លាចតែបងធ្វើមិនបាន រាល់ថ្ងៃផ្ទះយើងធំណាស់ ធំដល់ថ្នាក់អូនមានអារម្មណ៍ល្ហល្ហេវហើយ ព្រោះត្រូវរស់នៅតែម្នាក់ឯង ព្រឹកឡើងប្តីនិងកូនចេញបាត់ៗ ពេលថ្ងៃក៏ញ៊ាំបាយម្នាក់ឯង ទាល់តែពេលយប់ទើបបានជុំគ្នា តែពេលខ្លះយប់ហើយក៏មិនបានជុំគ្នាទៀត » លោកស្រីផាកនិយាយទាំងអួលដើមក គាត់គិតថាគាត់ដូចជាស៊ាំនឹងរឿងអស់នេះហើយតែហេតុអីពេលរំឭកវាឡើងគាត់ស្រាប់តែមានអារម្មណ៍ថាឯកាខ្លាំងបែបនេះ ឃើញលោកស្រីផាកបែបនេះទាំងលោកផាកនិងសុងហ៊ុនក៏សម្លឹងមើលគាត់ដោយក្រសែភ្នែកដែលបង្ហាញអារម្មណ៍អាណិតហើយនិងដឹងខ្លួនខុស
YOU ARE READING
My two boyfriends ( Completed )
Romanceរឿងរ៉ាវផ្តើមចេញពីស្រីក្រមុំវ័យ18ឆ្នាំម្នាក់ដែលសម្រេចចិត្តទាក់ទងមនុស្សប្រុសកម្លោះពីរនាក់ក្នុងពេលតែមួយ ហើយពីដំបូងៗគ្រប់យ៉ាងគឺដំណើរការទៅដោយរលូន តែបន្ទាប់ពី3ខែក្រោយមករទេះភ្លើងក៏បានបុកគ្នា🫣 « គឺវាពិតជារឿងចៃដន្យពិតមែន អូនមិនដឹងទេថាJakeជាមិត្តរបស់បង ហើ...
Part 59 : ពិសោធន៍ចិត្ត
Start from the beginning
