الرحمة 2 MERHAMET

PART 68

‏‎" أزمة تربية "

Vote+ Comment فضلاً ولـيس أمراً

الكاتبة : زهــــور‏

حسابي فالانستا : @bezhorr
حساب الرواية : @merhamet_friends

بارت طويل جدا تعبت وأنا كنكتبو والله خليو ليا تعليقات على الصغيرة والكبيرة الصغيييرة والكبيرة

كولشي هنا استغفرو الله أولا 🌸

____________

كلسات فالناموسية كتفكر شحال تاصونا ليها تيليفون فيقها من الشرود ديالها جاوبات : وي ؟

مروى : هبطي أنا حدى الباب

قطعات وناضت دارت واحد الكاب سخون مطبوع فيه ماركة گوتشي لبساتو فوق البيجامة دالحرير السوداء من قطعتين، حشات رجيلاتها فبانطوفة دالريش رجليها البويض ضفارهوم مقادين ومصبوغين بالحمر الغامق، ونفس اللون تافيديها مقاداهوم بطول ماقصير ماطويل أناقتها ديما حاضرة وهادو من الحوايج لي كانو كيعجبو رضـى فيها أنها منوعها ديما أنيقة عمرك تشوفها فشي حالة ماهياش واخا تكون جنازة.

كانت جامعة شعرها كعكة خفيفة وشعرها أسود لامع، نزلات مع الدروج الڤيلا ديال واليديها كبيرة ومفرشة كلها بآتات تركي كلاص والارض ديما لامعة ونقية بالخدامات لي فدار، دايزة على مها كانت گالسة فصالون كتشوف فطابليت هزات عينيها شافتها : إسـلام فٌين غادا ؟

ردات خصلات مور وذنيها مكملة طريقها ومجاوباها فنفس الوقت : غير جات عندي مروى أماما عايني.

فتحات الباب خارجة خلات مها مصغرة عينيها فيها.

قطعات جردة وخلات العساس يفتحليها الباب خرجات لعندها كانت واقفة جنب الڤيلا لي قبالتهوم بطوموبيلتها الرانج فالكحل كيف وصلات لعندها حلات الباب ركبات حداها السقيل والسكات بحكم ساكنين فحي الرياض وكيكون ديما ساقل خصوصا بالليل.

إسلام : أمضرا ؟

مداتليها مروى ميكة كحلة ومغطية فشحال من ميكة : هاكي هانا جبتهاليك شوفي قاتليك خدمتها اللخرى راها قادتهاليك ولكن أطونسيو خاسك ضاروري تكملي هادشي وتخطاه داك الحمارة وإلا سحورها مايكملش

شافت فالميكة ورجعات شافت فيها : ياك قالت تقدر تخدم غامن بعيد

دورات مروى كتأكد من حداها ورجعات ردات الزيف من على شعرها واخا ماكاديروش ولكن مخبية راسها فيه: شوفي دقتها مضمونة ولكن دقة لي بعيدة ماكاديرش المفعول مزيان فهمتي داكشي حدو سيمانة جوج كيفوت خصوصا لكانت داك خيتي شي وحدة لي كتصلي ولا قلبها محصن، كتكون القضية صعيبة أما إلى كلات ولا تخطات ولا تقاست راه دقة ببطلة ماتوليش تنوض منها.