Fall In Love During THINGYAN ( Completed )

BL Couple ( Unicode ) 4

" ဟာ.. ချာတိတ်... အမှတ်မထင် လာ‌ဆုံတယ်နော် "

ပိတောက်မောင်ရဲ့ မျက်နှာကတော့ စိုင်းကူဆွဲ့ကို တွေ့လိုက်သည်နှင့် တခြားတစ်ယောက်ပြောင်းသွားသလို သုန်မှုန်စူပုတ်သွားသည်။

" မင်းတို့က သိနေတာလား "

သော်ဇင်မျိုးက အံ့ဩတကြီး ထမေးသည်။ သူရဇ္ဇကလည်း သိလို၍ နားစွင့်နေသည်။ သို့သော်လည်း အဖြေကဖြင့် ပြန်မရလိုက်။

" ဒီလိုပြန်ဆုံတယ်ဆိုတော့ ဖူးစာပါလို့ဖြစ်မယ်... တိုက်တိုက်ဆိုင်ဆိုင် ဆုံလည်းဆုံတတ်တယ်နော် "

" ခင်ဗျား ပါးစပ်ပိတ်ထားလို့ မရဘူးလား.. နားငြီးတယ် "

စိုင်းယံတို့အိမ် သွားတဲ့လမ်းတစ်လျှောက် ကားပေါ်မှာ ပိတောက်မောင်နား တောက်တဲ့လိုကပ်ပြီး သာလိကာလို တတွတ်တွတ်စကားပြောနေသည့် စိုင်းကူဆွဲ့ကို စိတ်မရှုပ်ဘဲ ဘယ်သူနေနိုင်မလဲ။ စိုင်းယံရဲ့အစ်ကိုဝမ်းကွဲပါတဲ့။ အဖေက ရှမ်း၊ အမေက ဗမာ။ ရှမ်းဗမာကပြားလေး စိုင်းကူဆွဲ့ကို သူ့အဘိုးအဘွားတွေက ခေါ်ထားလို့ ညောင်ရွှေမှာ ခဏလာနေနေခြင်းဖြစ်သည်။

ပိတောက်မောင် စိတ်အပျက်ဆုံးက သင်္ကြန်ရက်တွေအတွင်း ထိုလူနဲ့ တစ်အိမ်တည်းမှာ အတူတူနေရမည်။ မြင်တွေ့နေရမည်။ ဘာဖြစ်လို့ စိုင်းယံနဲ့မှ အမျိုးလာတော်နေတာလဲ။

" ဖူးစာ လူးလာ ဒူးကာလို့ မရဘူးဆိုတာ တကယ်မှန်တာပဲ... ကိုယ်ကတော့ ဘာမှကာထားမှာမဟုတ်ဘူး... ရင်ခွင်ထဲသာ တဲ့တိုးဝင်လာခဲ့ "

စိုင်းယံရဲ့အိမ်ရောက်တော့ ကားပေါ်မှ ကိုယ့်အထုပ်လေးတွေ ကိုယ်စီဆွဲလို့ အိမ်ထဲဝင်ဖို့လုပ်နေချိန် စိုင်းကူဆွဲ့က လက်နှစ်ဖက်ကိုဆန့်ကာ ပိတောက်မောင်ရှေ့မှာ ရင်ခွင်ကျယ်ကို လှစ်ဟလိုက်သည်။ ပိတောက်မောင်လည်း မျက်ဖြူလှန်မိလျှက် အရှေ့ကလူကို ရှောင်ကွင်းသွားတော့သည်။ သည်လူနဲ့ သင်္ကြန် ၅ ရက်ကို ဘယ်လိုဖြတ်သန်းရပါ့။

စိုင်းယံတို့ အဘိုးအဘွားများက သဘောကောင်းကြပါသည်။ သူတို့ကို နွေးနွေးထွေးထွေး ပျူပျူငှာငှာ ကြိုဆိုကြ၏။ စိုင်းကူဆွဲ့တို့၏အိမ်ကြီးက ကျွန်းနဲ့ဆောက်ထားပြီး အတော်ပင်ကျယ်ဝန်းသည်။ ဘိုးဘွားစဉ်ဆက် လက်ဆင့်ကမ်းလာသောအိမ်ဖြစ်၍ လက်ရာမှာ သေသပ်လှပ၏။