"اللى ربى بتاع مربى" 😉🙄

الحل عندى🤔😂

فى هدوء بعد المغرب كده
وفى يوم هادئ خالص مالص
وفى بيت مفيهوش غير كل سكينة
(وده حقيقى فعلا مش تريقة😂)
قاعد راجل كبير في السن شعره أبيض وجمبه زوجته واللى سنهم كمل السنادى ٧٠ سنة مع بعض
هما عموما مع بعض في كل حاجة ملهومش في الدنيا غير بعض لكن..........
مجيدة لزوجها اللذى يجلس على السفرة:كل كويس يا مصطفى أكلتك مش عاجبانى
مصطفى بضيق مضحك:مش عاجباكى إزاى يعنى ده أنا واكل لغاية دلوقتى تلات أطباق رز بالخلطة ونص فرخة لواحدى
مجيدة وهى تغرف له:مش كفاية يا مصطفى كل...كل انت محتاج تتغذى شوية
مصطفى بضيق: يا ولية معدتى اتملت هودى الأكل ده كله فين
مجيدة وهى تمسك الملعقة وتقربها من فمه:الهم والمم رايح فين
مصطفى:ييييييييه
مجيدة وهى تفتح فمها:ها....ها...يلا هم يا جمل
مصطفى:صدقى بالله انتى لو ما بطلتى الشلل ده لقوم ألبسك الأطباق دى فى خلقتك
مجيدة وهى تتخصر:شوف الراجل ده جزاتى....ده جزاتى يا شايب يا عايب ياللى الأتب في ضهرك واصل للسقف ياللى أمك كانت بتلبسك لبس النسوان وانت صغير لغاية أما مكناش عارفينك واد من بت
مصطفى وهو يقف غاضبا:كانت خايفة عليا من الحسد يا أختى ايه قولك بقى يا أمو المتشردين
مجيدة وهى تجلس لتأكل: خلاص يا أخويا أكل نفسك بقى الحق عليا اللى بهتم بيك زى البت اللى اسمها سردين عز دى ما بتقول والنبى انت ما ينفع معاك غير البت البركة القادرة المستقوية دى اللى اسمها رضوى الشربينى عشان يبقى أخرتك الاكياس السودا
مصطفى بتريقة:طب خودى دوا الأعصاب الأول يا أختى عشان ايدك مترعش وانتى بتقطعى
مجيدة:على الأقل أنا باخد الدوا مش زيك سايب نفسك كل شوية ضغطك يوطى وتقع على الأرض زى ما يكون بينك وبين الأرض قصة حب على شاطئ الهوا
مصطفى وهو يضربها على قفاها:طب كلى ولغى انتى بدل ما هنستخدم مكبرات وعدسات بعد كده عشان نشوفك وخلى بالك من نفسك انتى سيبك منى أنا حلو وزى الفل أهو
مجيدة وهى تناوله الطعام:يا راجل ده انت لو دخل عليك دور برد هيضيع مستقبلك
مصطفى وهو ينظر لها بضيق:هو ده الاهتمام...ايه هيضيع مستقبلك دى هو أنا في الثانوية العامة الملافظ سعد يا بومة
مجيدة:بتبلى عليك يعنى طب فاكر لما جالك دور البرد إياه وفضلت راقد في المستشفى شهر ونص والدكتور كان هيوديك العنايه المركزه
مصطفى:ليه كان عندنا منخفض جوي جاى من روسيا....ده دكتور حمار واخد شهادته بالواسطة ده لو كان محترم وبيحضر محاضراته مكنش فاته قعدنى ده كله
مجيدة بتريقة:آه كان فاتك اتكلت على طول في لفحة برد زى دى
مصطفى ببرطمة:كان يوم ميعلمبوش إلا ربنا يوم ما شوفتك
مجيدة بتحسر:ده كان يوم زى القمر ده أنا كنت بدر ومربربة وحلوة زى......
مصطفى:زى سيد قشطه
مجيدة:مختلفناش أهى قشطة في الأول وفي الآخر لولاش بس عيونى جالها عمى ثلاثى وحبيتك واتنيلت اجوزتك
مصطفى:ده كان من حظك ونصيبك طب ده أنا النسوان كانت بتقطع بعضيها عليا تقطيع
مجيدة:قصدك مين الولية الكحيانة أم على اللى قتلت جوزها وعانته في الفريزر أربعين يوم ولا حفيظة اللى سرقت أبوها وهربت ولا اسمها إيه أم صورم تفيدة اللى كانت فاتحة كباريه من أيام الإنجليز
مصطفى بفخر:كانت فتحاه لتعليم اللغات ولنشر العلم والثقافة
مجيدة:ولقلة الأدب مش كده
مصطفى:شايفانى يعنى اتنيلت ما أنا جمبك أهو ولازق فيكى مش هسيبك
مجيدة:وعاوز تسيبنى وتروح فين بقى بسلامتك
مصطفى:فيه إيه يا ولية مش احنا متفقين
مجيدة:على ايه يا عم الحاج
مصطفى:انى هموت قبلك
مجيدة:وأعيش بعدك أقرف في مين يا أخويا لا ماليش فيه انا اللى هموت قبلك
مصطفى:أنا الراجل يا ولية
مجيدة:النساوين أولا يا عم الحاج
مصطفى: خلاص نروح هوبا احنا الاتنين سوا
مجيدة وهى تمسك المعلقة وتقربها منه:طب سيبها على الله وخليك في الأكل الأول عشان الدوا بدل ما انت خسيت كده وبقيت شبه عود الخيزران الناشف
مصطفى وهو يفتح فمه:أتاريكى انتى اللى مخلصة الباقة
مجيدة وهى تدس الطعام في فمه:أحسن ما خلص على اللى جابوك ولا إيه
مصطفى وهو يبعدها:مج..........
فى الوقت ده اتفاجئوا بحد بيخبط على الباب خبط مش طبيعي خالص وبيرزع جامد.....
مجيدة موسعة عينيها بصدمة ممسكة الملعقة بيدها:فيييييه ايييييييييييييييييااااااااااااااع
مصطفى بقرف: اييه شلل يشلك فيه إيه
مجيدة وهى تترك الطعام:معرفش والله
مصطفى للشغالين:يا بهاااااااااااااء
بهاء بأدب:أيوة يا مصط.......
مجيدة:انت لسه هتعد تمجد فى أمه افتح الباب
بهاء:حاضر يا مجيدة هانم
بهاء فتح الباب واتفاجأ مصطفى ومجيدة ببنتهم جاية بشنطة هدومها وبتعيط......
فجأة رمت الشنطة على الباب ودخلت قعدت معاهم على السفرة وقعدت تعيط كتييير أوى
مصطفى بطبطبة:يا هيام بقالى ساعة بسألك مالك وانتى بتعيطى
هيام بتبكى وبس بقهرة
مصطفى:طب قوليلى بس أمك زعلتك في حاجة
مجيدة:وأنا مالى انا يا راجل الله
مصطفى بطيبة:جوزك زعلك طيب
مجيدة:مين هشام ابن كوكب....هى بتشوف خلقته أصلا
مصطفى وهو يحدف عليها حذاؤه:هو انتى ايه بركان....بتولعى البت أكتر ما هي والعة....مالك بس يا بنتى
هيام ببكاء:مفيش...مف...مفيش يا بابا
مصطفى:طيب...براح......
مجيدة وهى تخلع حذائها:هو انت لسه هتحسس وتقولها مالك مفيش
ثم نظرت لهيام:بت تصدقى باللى خلق السماوات والأرض إن ما نطقتى لخلى الشبشب ده يزغرط على خلقة أبوكى
هيام ببكاء:مام.........
مصطفى وهو يقف بينهما:انتى من يهود بنو قريظة ولا إيه ما تسيبها براحتها واقفلها على الواحدة ليه هى لحقت تقول حاجه
مجيدة وهى تضربه بالشبب على قفاه:طب وسع من قدامى انت
مصطفى وهو يضع يده على قفاه:يمين على يمينك لولع فيكى بجاز النهاردة
مجيدة:طب لو جدع قربلى
هيام ببكاء:طب وأنا يا جماعة
مصطفى:انتى اطلعى فوق الأول كده عما نشوف الولية اللى متربتش دى
هيام:كفااااااااية بقى واسمعونى
مجيدة:وأما انتى هتنطقى يا حيلة أبوكى مكتومة من ساعتها ليه
هيام وهى تجلس مرة أخرى:أنا في كارثة يا مامى
مصطفى:وهى دى يتقالها يا مامى دى تقوليها يا ست أبوها يا ام أربعة وأربعين يا ساحرة الجنوب لكن مامى دى متجيش
مجيدة:انت بتعصى البت عليا يا راجل يا مهزق
هيام:يييييه هتشاكلوا تانى برده
مصطفى:طب احكى يا روح أبوكى احكى
مجيدة بقرف:يا حنين
مصطفى:أوف....احكى يا بنتى بقى
هيام:أنا في كارثة بسبب ولادى
مجيدة بخضة:ليه مالهم العيال يا هيام
هيام: الاتنين يا مامى ع.............
مجيدة:يا خرابى الاتنين جرالهم ايه انطقى بسرعة
مصطفى:ما تستنى يا ولية ميبقاش قلبك رهيف كده
مجيدة:أصلك جبلة معندكش دم
مصطفى: أحسن من التلامة اللى عيانة بيها الجحشة اللى عايشة معايا
مجيدة لهيام:انجزى العيال مالهم أصل أبوكى رغاى مش هنخلص من زنه
هيام لوالدها:مراد عاوز يتجوز يا بابى
مصطفى باستغراب:عاو...........
مجيدة: لولولولولىلىلىل ألف مبروك ومين العروسة يا حبيبتي
مصطفى لمجيدة:انتى عبيطة يا ولية
مجيدة لمصطفى:بتقولك هيتجوز مزغرطش عشان حفيدى
مصطفى:وأما هى جوازة بنتك هتيجى تعيط ليه
مجيدة بنظرة مشدوهة للفراغ:آه صحيح
ثم نظرت لهيام:أومال انتى هارية وبارية نفسك كده ليه يا بت
هيام:أصله عاوز يتجوز واحدة مش من م.........
فى الوقت ده الباب خبط تانى
مصطفى:استنى يا هيام يا بنتى....بهااااااااااااااء
بهاء بأدب:أيوة يا...........
مصطفى:اخرس....افتح الباب يالا
بهاء:حاضر
مجيدة وهى تمصمص شفاهها:حضرلك الخير يا إدلعادى
وأول ما فتح الباب لقوا واحدة داخلة عليهم بشنطة هدومها وبتجرى بسرعة كإن فيه حد بيجرى وراها
مصطفى ومجيدة بتفاجأ:فايزة
فايزة وهى تنظر لبهاء:اقفل الباب بسرعة
مجيدة:فيه إيه بس يا بنتى خايفة من إيه كده
فايزة وهى تنظر لهيام:ايه ده هيام انتى هنا بتعملى إيه
هيام وهى تمسح دموعها:جاية في مصيبة وانتى
فايزة:زيك بس في خمس مصائب
مصطفى: خمسة مرة واحدة...فيه إيه يا فائزة
فايزة وهى تنظر ورائها:خبونى طيب
مجيدة بنظرة نارية:هو الواد جمال عملك حاجة
فايزة وهى تنظر ورائها بخوف:مش...مش عارف......أنا..أنا خايفة وخلاص
مصطفى:ليه يا بنتى انتى عملتى إيه بس
جمال وهو يقتحم المنزل فجأة بعيون يملؤها الشر:أيوة اسألها....اسألها عملت إيه الهانم هى وولادها انا خلاص جضيت منهم
هيام:براحة يا جمال فيه إيه
جمال:اخرسى خالص انتى كمان
ثم نظر لزوجته:بقى لما عيالك يبقوا بايظين بسبب تربيتك يا هانم تقومى تضربى شكلة وتسيبيلى البيت بالأربع مصايب اللى فيه وتمشى
مصطفى:انت يا حمار انت إزاى تتعامل مع مراتك بالشكل ده
فايزة بخوف:لا وبيمد ايده عليا كم.......
جمال وهو يقترب منها بشر:وأكسر عضمك كمان عشان تسمعى كلا.........آه
مجيدة ممسكة بطاسة في يدها: أحسن يكشى الضربة على راسك تجيب نتيجة زى الأفلام وترجعك لعقلك وتربيتك
جمال لأمه:انتى بتضربينى عشانها يا ماما
مجيدة:وأكسرك حتت كمان دى مراتك هو انت لاقيها في الشارع هو ايه اللي تمد ايدك عليها يا حيوان احترم نفسك انت عندك بنت وبكرة ييجى اللى يعمل فيها كده
مصطفى:لأول مرة أمك يبقى عندها حق في حاجة
مجيدة وهى تمسك له الطاسة:يعنى عشت معايا قرون ولسه جاى تقولى عندك حق
مصطفى بهدوء وجدية:آه
مجيدة:كسر حقك
مصطفى:واما أكسر في راسك القلة اللى جبتهالك أمك في الصباحية ودماغك تتفتح هتبقى مبسوطة
مجيدة:أوى عشان ساعتها هجيب سيخ الشاورما بتاع الراجل السورى بشار اللى جمبنا وأديهولك في دماغك
هيام بزن:طب ومشكلتى يا جماعة
جمال بتريقة:وانتى عندك مشاكل ايه يا نوغة
هيام:وانت مالك يا أخويا خليك في خيبتك
فايزة بشر:أيوة اديله يا هيام ده معيشنى في سواد أنا والعيال
هيام:طول عمره كده عيشته تقرف 
جمال:كلمة كمان وهدور فيكوا الضرب وما هيهمنى حد
مجيدة لمصطفى:شايف خلفتك الشوم الواد مش مكبر حد يا كبير يا عاقل
مصطفى وهو يضع يده خلف ظهره بهدوء وهو ينظر لخناقهم:وهى كانت خلفتى لواحدى يا شحاتة يا بومة
مجيدة متخصرة:آه يا أخويا أنا مستحيل الأشكال دى تبقى تربيتى
مصطفى:ليه يا أختى مخلفهم بالبلوتوث
مجيدة:لا بالوافاى يا روح الروح
حتى فاق الاثنان على قول زوجة ابنهما: والله ما هعدلك في البيت
جمال بصوت جهورى:انا كلامى يتسمع وإلا هطلقك
هيام:انا بجد مش مصدقة يا فايزة إنك عايشة معاه وهو بالطريقة دى
فايزة:عشان كده مش قعداله بقى في البيت ها
هيام: عندك حق طبعا
جمال وهو يمسك هيام من شعرها:خليكى فى نفس...........
مصطفى وهو يشده اليه بعنف:لا ده انت زودتها أوى
جمال وهو يبتعد:هى اللى..........
مصطفى وهو يكاد يرفع يده لصفعه على وجهه:آخر..............
فى الوقت ده الباب كان مفتوح أساسا ودخل ظباط في كل حتة
كلهم(مصطفى ومجيدة وجمال وهيام وفايزة) كانوا متفاجئين ومش عارفين ايه اللي بيحصل لغاية ما دخل عليهم حد هما عارفينه كويس
مجيدة وهى تضع يدها على قلبها:مش تقول انه انت يا زفت
مصطفى وهو ينظر لها:اتقلقلتى في النيلة انتى وهو هو فيه حد يدخل بيوت الناس كده
مجيدة وهى تنظر لابنها أكرم اللذى اقتحم المنزل بقوة من ضباطه:وماله يا أخويا مش ابنى وظابط قد الدنيا
أكرم بصرامة لوالديه:هما فين.
مصطفى وهو ينظر لمجيدة:هو ده ابنك المتربى ده ناقص يقبض علينا واحنا واقفين
أكرم:أنا بقول هما فين
فايزة:هما مين دول
أكرم:انا مسألتكيش
جمال وهو يضع فايزة وراء ظهره:لا عقيد على نفسك مراتى خط أحمر يا أكرم 
أكرم بنظرة ثاقبة:متدخلش في أى نقاش معايا أحسنلك
جمال:ليه يا أخويا هخاف منك ولا إيه
أكرم:انت ناسى إنى الكبير ولا إيه
جمال:كبير على نفسك يا أكرم مش عليا أنا ومراتى
هيام:انتوا هتتخانقوا بجد....بقولكوا إيه كفاية كده بقى
أكرم وجمال:ملكيش دعوة
مجيدة لمصطفى:شايف يا أخويا
مصطفى ببرود:لا
مجيدة:طيب يا أخويا ابقى فكرنى أروح أعملك نضارة كعب كوباية بدل العمى اللى انت فيه
فايزة بهدوء لأكرم:طلع ظباطك ولا عساكرك دول احنا في بيت ناس ميصحش كده
أكرم لفايزة:وانتى مالك ده يبقى بيت أمى وأبويا ايه اللي حشرك وسطنا أصلا
فايزة: والله مامتك دى تبقى خالتى وحماتى في نفس الوقت يعنى أنا مش بيت حد غريب
هيام:عندها حق إنما الغريب بصحيح اللى انت بتعمله يا حضرة العقيد
مجيدة وهى تقف وسطهم بهدوء وهى تضع يدها خلف ظهرها:تلم حواشيك دول بالذوق ولا.....
ثم أخرجت طاستها:ولا أدبك بدى على نفوخك
أكرم بنظرات ثابته لظباطه:اخلى المكان بسرعة 
مصطفى وهو ينظر لها:قادرة
مجيدة:طول عمرى
فأخلى أكرم المكان بغاية السرعة وجلس الجميع في الصالون ينظرون جميعا لبعضهم بنظرات حانقة لا يعلمون ما سبب تلك الجمعة وأى صدفة ألقت بهم بوجوه بعضهم البعض
مجيدة بصراخ لأكرم:وأما انت يا بهيم بتدور على ولادك جاى بتقتحم علينا بيتنا كده ليه كإنك قافشنى أنا والحاج المكحكح ده في وضع مخل بالآداب والنظام العام
أكرم بضيق: ماما
فضحك عليه الجميع 😂
مجيدة وهى تنظر لهم جميعا:وانتوا مفشوخين ضحك على ايه يا ولاد الجزم ما كل واحد جايلى ببلوة وكله من عيالكوا وتربيتكوا
مصطفى:اهدى يا مجيدة بس
مجيدة:اهدى ايه يا أخويا هو اللى زى دول اتربى عشان يعرف يربى
مصطفى بجدية:أنا عارف مين السبب أنا اللى مربتهمش أنا اللى معرفتش أحكمهم الغلطة كلها عندى أنا
مجيدة وهى تنظر لهم:اسفوخس على اللى جابتكوا
مصطفى:عندك حق
مجيدة:جرا إيه يا بلاصى يا مصدى ياللى مش معروفلك وش من قفاه يا مهبوش يا منكوش يا حلوف ياللى العيال في الشارع بيحدفوك بالطوب
فايزة بصدمة:هو ممكن حضرتك تقوليها تانى
جمال:ليه يا اختى
فايزة بشر:عاوزة أسمعهالك يا جمال وعاوزاك تعرف إن مرواح معاك مش هيحصل
جمال:ليه هتخرجى عن طوعى ولا إيه
مصطفى:احترموا نفسكوا بقى اكرم فين مراتك
أكرم:عند أبوها
مجيدة وهى تحدفه بالشبشب:وكمان مزعلها يعنى مطفش العيال ومزعل أمهم
جمال وهو ينظر لفايزة: والله لو مبتسمعش الكلمة يبقى تستاهل
هيام:ليه يا حبيبي هى الخدامة بتاعتك انت وهو ولا إيه
اكرم وجمال:اخرسى 
فايزة لمصطفى:شايف يا عمى 
مصطفى بجدية وصرامة:أنا مش شايف غير حل واحد بس والحل ده عندى أنا بس
مجيدة: ويا ترى هو ايه يا حفيد على بابا والأربعين حرامى
مصطفى وهو ينظر للفراغ:بكرة ومن غير مناقشة تيجولى بعيالكوا
أكرم:ليه يا ب............
مصطفى بقوة:من غير ليه كلامى يتسمع وبس
هيام:بس.........
مصطفى بصرامة:مش انا معرفتش أربيكوا ودى غلطتى يبقى أنا اللى المفروض أصلح الغلطة دى وانتهينا.......
..................................................................
معلش البارت قصير شوية عشان مكنتش فاضية انا مكنتش هنزله غير لما أكمله♥️
يا ترى جدو مصطفى في دماغه ايه؟
ايه يا ترى رد فعل ولاده بشخصايتهم الغريبة والمختلفة؟
تيتة مجيدة هتعمل ايه مع جدو مصطفى ؟
مستنية رأيكوا وتصويتكوا على البارت♥️