عسى يفتديك لسان شاعرك و حصانه

٤

عند فيحان اللي تركوه عمانه و رجعو المشب
تقدم عنده خلف و هو يقول : شقلت لك انا ؟
تأفف فيحان و هو يسكر ياقة ثوبه : و انا شدراني احسبهم بيحزنون علي مير حتى العجيز تناظرني بأستحقار شكلها قافطتني
عارف : شكلها ؟ الا متأكده انت ماشفت نفسك حتى تمثيل مانت فالح به
فيحان ابتسم : المهم انفك رباطي و هذا اهم شيء
ضحك خلف و بدأو يتمشون بإنحاء المزرعه
و في وسط تمشيتهم مرو عند جبل و صعدو فوق و فيحان رفع عيونه يناظر لـ بوابة الحريم البعيييده عنهم لمح وعد اللي تشطف بوابة الحريم ، و شهق : ابن ابووي ابنه
التفت خلف له : وش بلاك
فيحان مسك عارف و قال : عان عان
التفت عارف و يناظر و قال : ماقدر اشوف المكان بعيد ، كإنها وحده تشطف صح؟
هز رأسه فيحان : ايه
تقدم خلف : ورع لا تقعد تمقّل بالحريم استح
فيحان : والله ماقصدي و اصلا بعيدين عنا لكن انا مخروش
عقد حاجبه خلف : من وش تنخرش ؟
فيحان : اللي تشطف هي بنت عمي بدر
خلف : و إذا ؟
فيحان : تسوقها انت؟ عمي مايخليها تمر الباب بيذبحها لو شافها تشطف البوابه وانت تعرف عمي بدر
عقد حاجبه خلف : ياساتر تراها مزرعة ابوه و امه مامن غريب
عارف : تصدقون كل بنات عمي اعرفهم الا بنت عمي بدر حتى عينها ماشوفها
فيحان : كنها بسّ ماتطلع من جحرها
ضحك عارف : والله مسكينه عمي مو صاحي
استغرب خلف و أكتفى بالصمت ، هو يدري بإن بدر متشدد لكن ماقد دخل نفسه بالامور هذي ولا يحب يتدخل و يستكشف ، حتى أسامي بنات عيال عتيق مايعرفها من كثر ماهو متجاهل وجودهم أصلًا و كل همه شغله
،
عند البنات اللي خلصو الفطور و مسكت بدريه العصاير و هي تنادي فيحان ، جاها و قال : يهب ياذا الصوت بالعه كل حناجر اهل الديره ماتسدين حنجورك او تقصرينه انتي؟ جيت جيت
اخذ منها العصاير و قالت : لايكثر ، ورني قرصة العقرب يالخراط
فيحان بـ تجاهل : ماني موريك
بدريه و هي تلحقه : ورررع
هرب فيحان بالعصاير و دخل مشب الرجال اللي كانو فارشين السفره و حط العصاير بـ طرف السفره ، الجد عتيق : اخلصو يارجال المأذن بيأدن
وقف خلف و عارف و سعود و طلعو متجهين لبوابة الحريم و نطق خلف : درب درب
دخلو البنات جوا و سكرو الباب و اتجه خلف و العيال للمطبخ اللي كانت رديس واقفه و تقول : اسمع انت وياه ، مره ثانيه تجون من عند ذا الشباك
و تأشر على شباك المطبخ الكبير اللي يِطَل على البيت من ورا ، و كملت كلامها : يجي واحد و ياخذه منّا و يوديه مشب الرجال
سعود بـ ضجر : يا جده الطريق طويل من هنا اسرع
رديس : اي طويل الطريق ، تبون تبلشونا كل يوم داخلين تبون لكم درب ؟ البنات يشتغلون بالحوش مو كل شوي ينجحرون عشان تمرون انتم
تنهد عارف و اخذ الاكل مع خلف و سعود و توجهو لمشب الرجال يحطونه ، رجعو من عند شباك المطبخ الخارجي و اخذو الاكل من عند الشباك و كملو وصلوه لعند المشب ..
• وقت الأذان
كانت رديس جالسه و حوااليها حفيداتها و حريم عيالها و ينتظرون الأذان ، سمعو المؤذن يأذن و التفتت رديس لهم : هذا مسجد ؟
دخلت ام غازي و هي تتنفس بسرعه : عسى ما تأخرت؟
رديس : مابغيتي تعالي اقلطي
وقفت ناديَه تسلم على ام غازي و سلمت عليها ، و نطقت رديس : السلام خليه بعدين ، اقلطي اذن
جلست ام غازي : ابركها من ساعه اللي جمعتنا على سفره وحده عساها عامره و دايمه
ردّو آمين ، و بدأو يفطرون
و بدأ المسجد يصلون صلاة المغرب و سمعت رديس الصوت : متى هم بانين مسجد عندنا قريّب؟
كوثر : المسجد ذا قريب مره من عندنا مدري متى بنوه
ردت ام غازي : يوييلي ماعلمتكم بالعلم هالمسجد بناه واحد فاعل خير يقول عشان اهالي المزارع يصلون به و خصوصا برمضان عشان التراويح للحريم
استغربت رديس : بالله ؟ هو به مسجد للحريم ؟
ردت ام غازي : اييه اليوم خاويني له
رديس : سمعتو يابنات ؟ تجهزن التراويح كلنا بنروح نصلي به عساه يتبارك
ام غازي : اكيد يتبارك ام ظافر دخلته ليه مايتبارك
ضحكت رديس : الله يسلمك ، بديران صبي لخالتك عصير خابرتها تحبه
ام غازي : ايوالله محد جابلي السكر الا هالعصير صبي يابنت
صبت بدريه و اعطته ام غازي اللي شربت و شرقت ، فزّت كوثر و هي تعطيها منديل و تقول : ماء ماء هاتو ماء
اخذت ناديَه الماء و اعطت ام غازي اللي تكح و تشرب ماء لين هدت و تقول : بسم الله الرحمن الرحيم
رديس التفتت للبنات : من اللي نفسها بهالكوب ؟
ام غازي : لا ماهم البنات
رديس التفتت لها : اجل من ؟
ام غازي : العصير كله سكر شرقت به
رديس التفتت لبدريه بـ حدّه ، بدريه توترت و سكتت و هي تناظر للعصير
رديس : منهي اللي سوت العصير؟
بدريه : انا
رديس : و لعنه ، متى تعلمين انتي ؟ رفله رفله ؟
تفشلت بدريه و تلعثمت و هي تحاول تبرر : والله الجيّك كبير توقعت ذا مقاس السكر المناسب له
ام غازي : يابنت الحلال اتركي البنت عادي عدّت
التفتت ناديه اللي متفشله من بنتها : امسحيها بوجهي يام غازي
ام غازي : انا ماني غريبه وش بلاكم عادي
رديس تناظر لـ بدريه بـ حدّه و نطقت : اسمعيني غسيل الصحون الليله كله عليك و انتن يابنات لو جاني طرف علم انكم ساعدتوها مايحصل طيّب لكم
شهقت بدريه بـ عصبيه و وقفت و هي تقوم من السفره و تدخل جوا
رديس تنهدت و قالت : والله العظيم .. قلة حيا و تتدلع تزعل بعد ! جعلك مارضيتي
التفتت ام غازي لرديس : الله يهديك انا مالي شان عندك ؟ ان كان لي شان اعفيها و اتركيها
رديس : والله ان شانك غالي يام غازي لكن تدرين انتي بدلع هالبنات مايبي لهم الا العين الحمراء لو تركتها بتتمادى
تنهدت ام غازي و كمّلو يفطرون ، قامت وعد من بينهم و دخلت جوا تدور على بدريه ، مشت للغرفه و انصدمت لما شافتها و هي متغطيه بفراشها و تبكي
تقدمت وعد : بلاش دلع
بدريه ما ردت و كملت تبكي
تنهدت وعد و شالت البطانيه و جلست بدريه و هي تبكي و تمسح دموعها بيديها ، وعد : تبكين ؟ انتي صادقه ؟
بدريه : وش يعني تنتظريني اضحك بعد ما فشلتني قدامهم؟
وعد : يعني ماتعرفين نظام العجيز ؟ كل يوم تسفل فينا و تسبسبنا مب شيء جديد و تعودنا
بدريه : بس اليوم زادتها علي ! خلتني اسوي الفطور لحالي و غير كذا تبي اغسل الصحون لحالي ! حرمة ابوها انا ؟
دخلت أثير : ماسويتي الفطور لحالك يادراما البنات مساعدينك بكل شيء و انتي ماسويتي الا العصير و فوق ذا تبكين
بدريه تتحلطم و تبكي : تعبت برجع الديره
ضحكت اثير و دخلت سلطانه اللي لحقتهم : نعم؟ مخططين على جريمه او شيء ؟ اللي تقومون ورا بعض و تنخشون هنا ؟ اذا الخطه هي عملية قمع العجيز و رفسها ف اسمحو لي اكون الموكّل و المحفز الأول لكم
ضحكت وعد و هي تقول : لا الموضوع أكبر من تخطيطات و جرايم
عقدت حاجبها سلطانه و تقدمت تجلس قدام بدريه اللي تبكي : احّا
أثير : لك ان تتخيلين يا سلطانه بدريه حساسه
سلطانه كتمت ضحكتها و هي تناظر لبدريه اللي تمسح دموعها و تناظر الارض ، رفعت راسها بدريه تناظر لسلطانه اللي كاتمه ضحكتها ، عقدت حاجبها بـ عصبيه : وش يضحك ؟ مهرج قدامك ؟ قاعده ابكي راعي احزاني
انفجرت سلطانه ضحك : لا بس أحاول اتذكر احد صافقك على راسك قبل تدخلين المزرعه ذي ولا وش ، متأكده انتي بديران حقتنا ؟ رديس تبكيك ؟
ضحكت بدريه بـ عز حزنها و نطقت : اص عني
اثير : شكل سارا أثرت فيها
ضحكت سلطانه : والله شكلها
وعد : قومي بس خلينا نكمل فطور زي الناس ولا عليك من العجيز والله ماعندها الا الضعوي