____
အဲဒီနေ့က ဟန်ထွဋ်အမေက သူ့သားနဲ့ ခွဲသွားရတော့ တစ်နေကုန် မျက်နှာမလှဘဲ မှိုင်နေခဲ့တာ ။ အဲ့လိုနဲ့ ညနေဘက် နေစောင်းတဲ့အချိန်မှာ ကိုယ်ဝန်အရင့်အမာနဲ့ အမျိုးသမီးတစ်ယောက်က အထုတ်လေးတစ်ထုတ်ကို ဆွဲပြီး အိမ်အရှေ့မှာ ဟိုမျှော်ဒီမျှော်နဲ့ ရပ်နေခဲ့တာလေ..။
အဲ့ဒါကို အမေနျူက တွေ့တော့ အိမ်ထဲက ထွက်လာပြီး -
"ဝေ့ သမီးငယ်.. ဘယ်သူနဲ့ တွေ့ချင်လို့လဲကွယ့်.."
ထိုသမီးလေးမျက်နှာက ပင်ပန်းမှုကြောင့် လူက စုတ်ဖွာနေပြီး ညှိုးငယ်နေသည် ။ လွယ်ထားရသည့် ဗိုက်လေးကို အသာအယာ အုပ်ကာ အမေနျူ့ကို ခေါင်းသာ ခပ်ယဲ့ယဲ့ ခါပြသည် ။
"သမီးက ဒီရွာကတော့မဟုတ်ဘူးထင်တယ်.."
ထိုအမျိုးသမီးငယ်က ခေါင်းညှိတ်ပြလေသည် ။
"ဪ..ဒါဆို အထဲမှာ ဝင်နားပါဦး..ဒီအိမ်က သူကြီးအိမ်ပဲကွယ့်..လာ..အကူအညီလိုတယ်ဆိုလည်း ကူညီပေးပါ့မယ်.."
မေနျူက လှိုက်လှိုက်လှဲလှဲ ခေါ်သော်လည်း ထိုအမျိုး သမီးငယ်က မဝင်ရဲဘဲ တွန့်ဆုတ်နေခဲ့သဖြင့် မေနျူက အနားကို လျှောက်သွားခဲ့ပြီး လက်လေးကို လှမ်းကိုင်လိုက်တော့ ကလေးမလေးရဲ့ လက်က ကျစ်ကျစ်တောက် ပူနေလေသည် ။
"ဟယ်..ကိုယ်တွေ ပူနေပါလား.."
မေနျူက စိုးရိမ်တကြီးနှင့် နဖူးကို စမ်းလိုက်တော့ တကယ့်ကိုပင် ကျစ်ကျစ်တောက် ပူနေလေသည် ။
"လာပါကွယ်..အထဲကိုလာပါ.."
မေနျူက အထဲကို တွဲခေါ်သွားပြီး ထိုင်စရာနေရာပေးလိုက်ပြီး ရေနွေးခွက်လေးကို ချပေးကာ အဖျားကျဆေးတိုက်ဖို့အတွက် စားစရာမုန့်ခြောက်အချို့ကို ယူလာပေးခဲ့သည် ။
"ဘာမှမစားရသေးဘူးထင်တယ်..စားလိုက်ပါ..ပြီးရင် ဆေးလေးလည်း သောက်လိုက်နော်.."
မေနျူက ချော့မော့ပြီး ပြောတော့မှ ထိုကလေးမက စားလေတော့သည် ။ နောက်စားပြီးသည့်အခါကျတော့မှ မေနျူ့က စကားစလေတော့သည် ။
"သမီးက ဘယ်နယ်ကလဲ.."
"..."
ထိုကလေးမက ဘာစကားမှ ပြန်မဆိုဘဲ မေနျူ့ကိုသာ ငေးကြည့်နေလေသည် ။ မျက်ဝန်းတွေက ညှိုးငယ်နေပြီး တစ်ခုခုကို ပြောပြချင်နေသည့်ပုံစံမျိုး ။
YOU ARE READING
Han_Chat (ဟန်ချက်)
RomanceAn adoration of you.. ' ဗန်းတဲ့ 'ဆိုတဲ့ ရွာလေးမှာနေတဲ့ကောင်လေးနဲ့ နိုင်ငံခြားပြန်ကောင်လေးတို့ရဲ့ နှစ်ဦးကြား အချင်းချင်းဖေးမမှု ၊မြတ်နိုးမှုနဲ့ ဘဝရဲ့ နိမ့်ကျနေတဲ့နေရာကနေ တဖြည်းဖြည်း အောင်မြင်မှုရအောင် ထောက်ပံ့ပေးမှုတွေကို ငြိမ့်ငြိမ့်လေးနဲ့ ခံစားရစေ...
အပိုင်း ၂
Start from the beginning
