الجميلة والسايكوباثِ ( الجزء الثاني )

دامِس (29)

الجميلة والسايكوباثِ ( الجزء الثاني )

بقلمي أنا : چمارة عليِ 🤍 ..

بسم الرحمـٰن ..

_______________

- ابيجيل .. ابيجيل شبيج !

- فزيت من خلى أيدة على كتفي .. باوعت علي وعلى المكان إلي أني بي ! .. وأدركت أنو كان تخيُل

باوع علية الحر بأستغراب وكال ..

الحر : صارلي شكد اصيحج وين صافنة !

ابيجيل : ما أعرف شنو ارد علي .. إلى الآن ما مستوعبة الصار .. ما أعرف شلون هيج فكرت !! أحساس كأنة حقيقي ..

عفتة ورحت غسلت وجهي وشربت مي لأن حلكي يبس .. مجرد تخيُل وهيج صار بية !! أذا صدك ونشرد أني ويامن شيصير ..

عشت النهار مع حرب فكرية ..

عقلي يكول اخلصي من حياتج واشردي وكلشي يكون بخير ! ..

وگلبي يرجف وخايف اخطي هيج خطوة ! .. وبنفس الوقت خايف يضل هنا ويعيش يم وحش بشري .. ما يعرف الرحمة ..

خلصت كلشي وبالي شارد .. حتى ما عرفت انضف .. اليل كلة ضليت سهرانة .. والتفكير هد حيلي هد .. اتراجع لكن خوفي من المستقبل ويا دامِس يرعبني وأتراجع عن تراجعي ..

نومت روحي بالكوة ..

أجة الصبح ..

كعدت وأني تعبانة وخمول مو طبيعي أحس رجفة بگلبي وأحساس مو حلو كلش .. خوف على فرح على حزن على حماس .. خليط من المشاعر ..

كعدت سويت أنواع الريوگ ..

لأن أخر مرة ياكل من أيدي .. أول ما خلصتة أجة دامِس وجان بس الحر موجود .. ضل يباوع علية وعلى الأكل بأستغراب ..

دامِس : شعجب هالكد مسوية

ابيجيل : ردت أجفص مثل البارحة .. لكن تلاحكت الوضع وكلت ..

- هيج عجبني .. بس يلة أخر مرة هاي

تحولت معانية وما كدرت افسرها .. خلى تليفونة ومفتاح السيارة وبعض الأغراض بقوة على الميز وتحرك شوية وقدم أيدة علية وكال ..

دامِس : كل شوية آخر مرة وأخر مرة !!

ابيجيل : سحب نفس راد يحجي لكن سكت .. خزرني وكعد ياكل .. فجأة نزل الفهد والشاهين .. فرحت بجيتهم ورحت سلمت عليهم ..