السارقه البريئه

⚘️كلمتين⚘️

بصي انا عارفه ان الدنيا جت عليكي و بالقوي كمان

بس انتي جدعه و هتتحملي و هتكملي

انتي زوجه معاكي واحد ميستهلش  كلمه راجل ديما بيقلل  منك و محسسك انك اقل من الكل و مش بتقومي بواجباتك ....بيقارنك بزوجات أصحابه او اخواته و مفهمك ان كل الستات احسن منك
برغم انك بتعملي فوق طاقتك عشان بس تثبتي ان كلامه غلط بس بردو بيزيد  فالي بيعمله

غلطانه و غبيه عارفه ليه ....لأنك صدقتي واحد مريض عارف و متأكد انك احسن منه مليووون مره عشان كده بيحاول يفقدك ثقتك في نفسك لمجرد بس انه يرضي نفسه المريضه

هو عارف انك مضطره تكملي معاه يا اما عشان ولادك او عشان مجتمع متخلف هيعاملك باحتقار لمجرد انك مطلقه

انتي بقي تعملي ايه ...و لااااااا أكنك سمعاه....شوفي نفسك من جوه و اعرفي قيمه نفسك ....خليكي واثقه ان الكل شايفك جدعه و بميت راجل و ست بيت شاطره ....هو بقي ...طظ
و لا يشغلك

انتي بقي بنوته حلوه امك بتقارنك  بقرايبك الي هما اصلا ممكن يكونو اقل منك في كل حاجه

هقولك بردو ...طظ....اوعي تصدقي أن في حد احسن منك ....انتي عارفه قيمه نفسك ....يبقي لما تقولك كده اضحكي فوشها  و امشي....روحي بعدها بصي لنفسك فالمرايه ....بس مش لشكلك لا ...لروحك الحلوه و قلبك الطيب....هتلاقي نفسك احلي و احسن مليوووون مره من اي حد اتقارنتي بيه

يا جماعه بلاش تدمرو ولادكم بالمقارنة الفاشله دي لأنك ببساطه متعرفيش البت الي انتي شيفاها ملاك و بتدمري بنتك او ابنك عشانها...هي ايه من جواها و لا مع أهلها

عاملو ولادك بحب و صداقه عشان  يشيلوكم في كبركم....و لو فضلتي كده متجيش فالاخر تقولي ابني و لا بنتي عاقين

ازرعي حبك جواهم  الأول بعدها حاسبيهم.....مش حب الام الفطري الي اصلا موجود جواهم  لا حبك انتي لشخصك ...حبك انتي عشان ملقوش  ام زيك

بلاااااش قرف بقي

و انتي يا سكر ...خسرتي شغلك ...و لا الدنيا داقت عليكي

ليه متعمليش زي ربنا ما امرك فالقرآن

(  و قلت استغفروا ربكم انه كان غفارا...يرسل السماء عليكم مدرارا ..و يمددكم  بأموال و بنين....و يجعل لكم جنات و يجعل لكم انهارا)

كل ده ربنا بيوعدك  انه يديهولك  بس استغفري

يبقي اتلمي بقي و بدل ما تقعدي تشتكي همك لناس ممكن من جواها تكون شمتانه فيكي ...اشغلي  لسانك الي عايز قطعه ده بالاستغفار و الصلاه علي النبي ....و شوفي حياتك هتتغير ازاي

و انتي بقي يالي صاحبتك بتتعوج عليكي و لا بتقلل منك ....اوسخ جزمه و اديها بيها فوق دماغها ....هي و لا بتاكلك  و لا هي احسن منك في حاجه يا ماما

اوعي تخليها تعمل منظر و شخصيه علي قفاكي يا هبله....يروح صاحب يجي عشره المهم كرامتك....و لو مجاش يكون احسن ادام مش صداقه بجد

اتلمو بقي و اعرفو  قيمه نفسكم جاكم القرف بجد
متسمعو الكلام بقي

اخر حاجه ...لكل الي بيتكلم علي أخطاء املائيه ...مش الصفرا 🤣🤣🤣 
لا غيرها

برغم انها حاجات بسيطه بس تمام

انا ايدي لسه وجعاني  و برغم كده رجعت اكتب و انزل كل يوم تقديرا ليكم

و ربنا يعلم علي ما اخلص البارت الي بتقولو عليه قصير ببقي حاسه بايه

فلو الكام حرف من وسط اكتر من ٣٠٠٠ كلمه مدايقينكم ...او شايفين ان ٣٠٠٠ كلمه و اكتر بيتكتبو  كل يوم دول قليلين

قولولي و ممكن اوقف لحد ما اخف خالص

او انزل مرتين فالاسبوع بارت اطول من كده

فريده بنت الحلواني الي هتجلطوها و ربنا