السيئون في الروايات

بوست فيسبوك

في أثناء رحلة بحثي عن السيئين في رواية أحدهم وجدت إهداهن قد نشرت هذا المنشور على الفيسبوك و أحسست أنه كما لو انها تلقي محاضرة علم نفس ..

بداية البوست 

هنتكلم النهاردة عن ..

الشخصية الوسخة ..

وكلمة وسخ مدرجة فى معاجم اللغة العربية ماتتكسفوش

اول ما يميز الشخص الوسخ .. انه مش بيبقى عارف انه وسخ !!

الوساخة ترسخت فيه لدرجة انه عنده يقين و عقيدة ان هي دى طبيعة البشر العادية .. هو وسخ من غير ما يفكر ..

وسخ بالفطرة ..

وسخ بالسليقة ...

و دا يجرنا للميزتين التانية و التالتة ..

انه مينفعش معاه عتاب ..

لأنه اصلا مش عارف انت بتعاتبه على ايه ؟!!

يابني انت أذيتنى

_اللي هو ازاي يعني ؟!

بقولك خدعتني

_لأ طبعا .. انا في العادي جدا .. انت بس اللي بتبالغ وبتحب الدراما !!

و بالتالي الميزة التالتة .. مش بيحس بالذنب أصلًا ..

علشان كدة متتوقعش منه توبة ابدا ..

لأنه اصلا ايه ؟!

مش بيعمل حاجة !!

الشخص الوسخ .. متصالح جدا مع نفسه .. هاديء جدا .. عنده القدرة انه يعتصر قلبك بقبضة باردة دون ان يطرف له رمش ..

عنده القدرة انه يطعنك في ضهرك وياكل لحمك و يضحك في وشك و هو بيسألك : مالك فيك إية ؟!

الشخص الوسخ .. في الغرام بقى قلبه كبير اوي .. اوي ... اوي ...

قد اتوبيس النقل العام كدة وقت الذروة .. ممكن يساع من الحبايب الف ..

ممكن يحبك و يبقى صادق جدا في مشاعره على فكرة ..

و يحب واحد تاني و هو صادق برضه ..

و يعشق تالت و والله برضه صادق ..

عارف الشخص اللي لما تسأله بيحب مين تلاقيه يقولك في عمق و هو مضيق عينيه ومتأثر و بيتنهد : انا بحب الحب .. يا سلااااام الله يفتح على اللى خلفوك

و هو متصالح برضه مع نفسه في الحتة دي ..

يعني كلامك معاه في اللحظة دي عن الخيانة و الاخلاص وجرح المشاعر وازاى قادر يشوف غيرك و الكلام الفاضي دا بيبقى نوع من أنواع العبث بالنسبة له ..

الشخص الوسخ .. يحب يتشتم على فكرة !!

يحب تبهدله و تسبه و تلعنه و انت بتواجهه بوساخته .. لأنه فضلا عن انه مش بيحس بالذنب فهو كمان في اللحظة دي بيحس انك ظالمه كمان !!

اه و الله شتيمتك ليه بتديله قوة انه يرد عليك و يبجح و تلاقيه ممكن يصرخ باستمتاع مرضي .. ايوااا انا وسخ .. انا كذاااب .. انا خاااااين .. انا غداااار ..

هو مش بيقول كدة اعتراف .. لأ .. هو بيقول كدة علشان انت تحس بالذنب انك غلطت فيه !!

نوع من انواع الالعاب النفسية ..

الشخصية الوسخة مش على طول بيبقى فاقد الشعور بالذنب .. بتيجي عليه لحظة يشعر بالذنب برضه .. و في اللحظة دي بيحتاج انه يطهر نفسه .. و افضل و سيلة عند الشخصية الوسخة انه يعترف !!

تلاقيه عمال يرمي في اعترافات في لحظة من لحظات العمق ..

يا جماعة انا وحش و ممكن اكون غلطت و عارف اني ظلمت ناس كتير .. بس انا مش بكون قاصد ..

الاعتراف دا بيريحه جدا .. وبيرمى بية المسؤلية على حاجات تانية

و في ناس بتفهم غلط ان الاعتراف دا بداية لطريق الاصلاح انه يعترف بغلطه .

عند الشخصية الوسخة الاعتراف مجرد تفريغ للطاقة السلبية و بالنسبة له مرحلة الاعتراف هي المرحلة الاولى و الاخيرة في عملية الاصلاح !!

و بعدها ....

بيرجع لوساخته عادي يعني !!

الشخصية الوسخة بيبقى حريص اوي انه يحافظ على الاشخاص السذج حواليه .. علشان متعته انه يمارس وساخته على ناس مش فاهمة اصلا انه وسخ و دا بيرسخ عنده احساسه الطبيعي انه مش وسخ فعلا !!

و الدليل الناس الجمال (السذج) اللي لسة ملمومة حواليه

لعبة نفسية معقدة زي ما قلت لكم ..

اوسخ انواع الشخصيات الوسخة هو الشخصية الوسخة الغلبانة !!

و دا متكتشفش انه شخصية وسخة إلا بعد ما تعاشره وقت طويل .. و وساخته الوسخة اوي تكمن في النقطة دي .. انك ممكن تضيع معاه عمر بحاله و تكتشف في الاخر ان عمرك راح هدر مع شخصية وسخة..

البوست دا مش القصد منه انك تعرف ان صاحب الشخصية الوسخة هو بس الشخص اللي بيكذب عليك او بيخونك او بيغدر بيك وبتبقى عارفة .. لأ ..

الهدف انك تعرف ان الشخصية الوسخة اللي في حياتك .. ممكن جدا .. متكونش اكتشفتها لحد دلوقتي !

نهاية البوست .. كل اللي فوق دا من أول بداية البوست لحد هنا مش كلامي ^^ .. في ناس فعلًا سيئين في الدنيا دي و في ناس فعلًا مجروحين جدًا .. أتمنى مكونش هنا أو هنا و أتمنى ليكم الخير دائمًا يا أصدقاء ..

إنتبهوا للناس الذين تثقون فيهم .. إنتبهوا لمن تلقون قلوبكم في ثيابهم فلا يلتقطوها و تسقط على التراب..

ربنا تعتقد نفسك شرير أو سيء في رواية أحدهم فتجد نفسك كنت مجرد ناموسة صغيرة للغاية و تجد في حياتك فامبايرز  و مصاصين دماء حقيقين .. انتبه أيها الشرير الصغير .. ولا تجرح أحد ..