إيكليبس | Eclips (اطلانطيدا ٢)

الفصل الأول(لا هندسة ولا طب إحنا بتوع اللب)

في منزل الصعيد و بالتحديد في غرفة <<جنى>> و <<إلياس>>، استيقظ <<إلياس>> من نومه و نهض من على السرير و هو ينادي على <<جنى>> و يقول

-"يا بلوه، جنى، إنتِ يا بلوه"

اعتدلت <<جنى>> في نومتها و قالت بانزعاج

="عايز إيه على الصبح"

رد <<إلياس>>

-"قومي شوفي هلبس إيه"

="إلهي يلبسك جن ما يخرج منك يا أخي، حد يصحي حد عشان يشوفله هيلبس إيه، ليه يعني معايا باسورد الدولاب"

جلس بجانبها على السرير و هو يقول

-"الي أعرفه إن الست بتقوم مع جوزها تساعده عشان يروح الشغل و متبقاش زي الدوده تحت الغطا"

اعتدلت <<جنى>> في جلستها و قالت

="متفكرنيش بحوار الدودة ده"

رفع <<إلياس>> حاجبه بتعجب و قال

-"مالها الدودة مش فاهم"

="كنت بقلب في المكتبه لقيت كراسه بتاعت الواد إبنك من و هو في سته ابتدائي"

-"مالها الكراسه و إيه علاقتها بالدودة"

ردت <<جنى>>

="أنا ساعتها كنت محفظاه موضوع تعبير عن الدود عشان كان عليهم في درس العربي فالميس بتاعتوا كتباله في الكراسه أكتب موضوع تعبير عن الدود فالواد كتب للدود أشكال كثيره و أنواع أكثر"

-"طب ما الواد نبيه أهو إيه المشكله"

="إتقل بس، الصفحه الي بعدها مكتوب فيها أكتب موضوع تعبير عن الفواكه راح كاتب الفواكه أنواع و بعض أنواع تلك الفواكه مثل التفاح يظهر بها الدود و الدود أنواع و مكمل بقيت الموضوع بتاع الدود رحت قلبه الصفحه لقيت أكتب موضوع تعبير عن السياحه فكتب يأتي السياح من جميع أنحاء العالم لزياره المومياوات و عندما تتعفن المومياء يظهر الدود و الدود أنواع و مكمل بقيت الموضوع بتاع الدود"

ضحك <<إلياس>> و قال

-"طيب ما الواد أتصرف و عرف يوظف الموضوع في كل حته، و بعدين يعني هو هيجيبه من بره"

نظرت له <<جنى>> و هي تضيق عينها بشك و تقول

="قصدك إيه بهيجيبه من بره دي"

ربت كتفها و قال و هو ينهض

-"ولا حاجة يا حبيبتي، كملي نوم"

نظرت له بشك ثم دخلت أسفل البطانيه و غطت في النوم، و في الحديقة الأمامية للمنزل كان يجلس كلاً من <<أمجد>> و <<إناس>> بهدوء و قال <<أمجد>>

~"هما العيال فين"

ردت <<إناس>>

_"أدم في الكُلْيَة و الرقاصه أسيا نايمه و نجاة بتشتري حجات"